Uudhano waShokonawa wokomumvo nonuumvo oko wuli

0
194

KuMaria Namupala

ONGHA – Ngaashi shili omukalondjigilile kutya pehulilo lyomumvo kehe Gabriel Shokonawa Marathon Academy ohayi unganeke uudhano wowina mono aatondoki haya kutha ombinga yo taya matuka no ku talike kutya omutondoki kamana ngono a thigi po ayehe olye.

Uudhano mbuno owa thanekwa tawu ka kala ko momasiku omilongondatu nalimwe gomwedhi nguka. Omutondokidhingi gwiinano iile Gabriel Shokonawa oye ta ka kwatela komeho uudhano mbuka. Shokonawa okwati aatondoki ayehe otaya ka tondoka pokati kOndangwa nOshikango no taya ka thikama poongeshefa dhoKambwa trading mOshikango.

Shokonawa ngoka eli enyakwa mokutondoka otaka tondoka  esiku ndyoka oshinano shookilometa 42.2, nuudhano mbuka owo tawu ka kala wesiku. Omuunganeki guudhano mbuno okuli oshilyo mo pariamende Billy Mwaningange.

Esiku ndyoka otapu ka tondokwa iinano oyindji shookilometa 5 naashono showina shookilometa  10, oshinano sho 21.1 km osowo shookilometa 42.2 mono Shokonawa oye teshi kwatele komeho. Omupeha-minista Omudhingonoko nOmatalelepo Pohamba Shifeta, Rafael Tuhafeni, kansela gwaNdola Ferdinand Shifidi, Julius Namolo na Komanda gopolisi moshitopolwa shaHangwenaTylves Paasa Kampolo oyo yamwe yomwaamboka  ta ya ka kala puudhano mpoka oshigwana tashi kuulukilwa kutya aakuluntu nayo nani otaya vulu ku kutha ombinga momaudhano gatya ngaaka.

Omukwatakanithi gongundu yoSWAPO mOshikoto Armas Amukwiyu okwa gandja okapandi koshimaliwa shooN$75 000, omanga omunangeshefa a tseyika nawa monooli Linda Naikaku a uvaneke ta a gandja oshimaliwa shooN$10 000, Shifidi naye okwa yambidhidha Shokonawa omolwa uudhano mbuka noshimaliwa no N$1000. Uudhano otawu ka patululwa pambelewa ku Shifeta.

Omaishangitho guudhano mbuka ogeli metifa notaga hulu mo24 ya Desemba. Shokonawa okwa indile kehe ngoka ena ehalo lyokutondoka oshinano kehe a kale iishangitha mbala, aantu otaya ishangitha kooN$50, omanga aanenentu mboka taya ka tondoka na Minista Shifeta otaya ishangitha koN$1000. Omaishangitho ota ga ningilwa pOngha.

Aatondoki oya tegelelwa ya ka tameke poheyali yongula sigo opomulongo. Shokonawa okwa indile aakwashigwana ya holoke no ku ya ya ondodhe omeho. Oyendji yomaatondoki yaShokonawa Marathon Academy oyati oyi ilongekidhila uudhano mbuka wokomumvo.

LEAVE A REPLY

Please enter your comment!
Please enter your name here