Aakalimo yomoDRC sha Swakopmund ya indile muni a gwanithepo omauvaneko

0
216

KuEveline de Klerk

SWAKOPMUND – Pondje ya Swakopmund opena oshilando ‘shiinyakwi nenge shatungwa niipeleki oshowo na kehe oshitungithi’ olukanda nduka ohalu ithanwa Democratic Resettlement Community (DRC).

Efupipiko lyedhina lyolukanda nduka olya faathana naandyoka lyoshilongo shomokati kaAfrica Democratic Republic of Congo (DRC), ndele moshili aakalimo yomolukanda nduka oye li kokule noSwakopmund ngaashi yi shiwike oshilando oshiwanawa shomahala goku talelwapo kaapashioni omumvo kehe.

Aakalimo yomoDRC ka yena omeya , olusheno nenge uundjugo wokolela. Oya kala monkalo ndjika konyala uule womimvo omulongo. Ndele nee haa talelipo oyendji koSwakopmund yak ala ye shishi nenge ya tseya kutya opuna olukanda ndoka sigo omuNovomba 2014, sho oshilando nenge olukanda ndoka lwali natango inaalu yalulwa paveta.

Elelo lya Shiwakopo opo lya yalula olukanda nduka pambelewa, sho lya tseyitha oshinima shika muDesemba omumvo gwayi. Olye shi ningi konima yomimvo odhindji dhoonkambadhala dha ponya nomauvaneko inaaga gwanithilwapo aakalimo yomolukanda ndoka.

Aakalimo ngashingeyi oya loloka onkalo moka yeli na oya hala muni gwa Shiwakopo opo a gwanithepo omauvaneko ngoka eya ningila goku hwepopeka onkalo molukanda ndoka, unene tuu sho ngashingeyi nduka luli olukanda lwa yalulwa pambelewa.

“Ondi inekela elelo na muni otaya ka gwanithapo omauvaneko, na otatu ka kala tuna omagumbo omawanawa mbala gena omeya taga ende,’ osho Monica van Louw a popi neinekelo.

“Onda hala olusheno, omeya negumbo ewanawa moka tandi kalamo, na onda hala elelo lya Shiwakopo opo li gwanithepo omauvaneko galyo okuyalula olukanda lwetu,” osho omunamimvo 45 Jenny Maletzky ngoka eli omukalimo molukanda nduka uule womimvo 6 a ti.

Oondjodhi dha Maletzky  noshowo etegameno lye kombinga yolukanda lwawo odhi niwe wo kaakalimo yalwe yomo DRC mboka ya ningi olukanda nduka olwo egumbo lyawo konyala omimvo omulongo dha pitipo.

“Opena aluhe etegameno na otwa tegelela omasiku omawanawa geli komeho,” osho Maletzky ngoka ena omukumo a popi a ti okwiinekela otaka kala mbala tazi megumbo lili nawa okupitila melelo lya Shiwakopo oshowo metungo lyomagumbo ogendji ndyoka lya tulwapo kepangelo.

Maletzky, ngoka ha longo mosalona okwa kala moshitopolwa oshipe sha DRC hashi ithanwa Ocean View’, eli no yana yaali nokamwanagona oshowo nakuume ke Griffith Lewis.  “Nonando onkalo yetu ka yi shi ombwanawa ohatu fudhilemo ombepo ontalala okuza mefuta na ohatu vulu wo okuli mona omalupita,” osho Maletzky a popi ye ta yolo mo.

Omathaneko okuyalula olukanda nduka oga ningwa naakalimo oya kala noku kondja opo ngaka ga tulwe miilonga uule womimvo omulongo dha pitipo.Ngashingeyi oya uvanekelwa kutya, okuyalulwa kolukanda lwawo nduka pambelewa otaku ka ningwa nuumvo.

Maletzky okwa ti yo, ngaashi ashike aakalimo yalwe oyendji moshilando shika oya thiminikwa okumwenya monkalo yaa na uuyogoki oshowo olusheno omanga, haya ende oshinano oshile oku ka konga omeya.

Pahapu dha Maletzky onkalamwenyo moDRC kayi shi ombwiinayi , na okwa tegamena ndjika yi ka hwepopale ngele elelo lya Shiwakopo  olya gwanithapo shoka lya uvaneka okuyalula olukanda ndoka pambelewa.

Van Louw ota ti onkalamwenyo moDRC “kayi shi ombwiinayi , aanona yetu ohaya silwa nawa oshimpwiyu, ohaya yi kosikola nolye eshiwo kutya onakuyiwa yawo otayi ka kala ombwaanawa ngiini,’

Ye kena naanaa omaipulo ogendji kombinga yiilonga yomuyonena , ndele omaipulo ngoka ena esiku kehe oongoka guumbanda womulilo. “Ondina iilongitho ayihe yiikwamalusheno ndele katuna ehogololo lilwe lyaashi okutema niikuni nenge no gas. Onkene uuna egumbo limwe lya kwatwa komulilo atuhe otuli moshiponga, onkene oshapumbiwa opo tu tungilwe omagumbo geli nawa. Omathimbo ogendji omuntu oto yi kiilonga ndele owuna omaipulo kombinga yegameno lyaantu yoye mboka wa thigi megumbo oyo ayeke. ” osho van Louw  a ulike.

“DRC osha ningi egumbo kutse, osho ehala ndyoka tse tu shi ongo egumbo na olye keena ehalo nondjuulukwe okumona egumbo lye lyoopala nenge lya tungwa nawa.Omathimbo ga piti ondali handi hehela olukalwa moMondesa ondunda yimwe moka nda li handi kala naamwandje noku futa oodola 1 500, naashika kasha li sha nika ondunge yasha,” osho a fatulula.

“Ndika olyo etompelo ngame nda tembukile ko DRC. Ondina aamwandje yaakadhona yaali mboka ya mana osikola gumwe okwa mana osikola yopevi omanga omukwawo okwa pita onkatu yuu inginia womalusheno. Mbaka oyena wo oondjodhi  okututungila egumbo ewanawa, tse naamwayinamati naakadhona,” osho Maletzky a popi uuvite etumba.

Okwa gwedhapo a ti aanona ye oya hala oku mu kwathela opo a mone egumbo lili nawa oshoka , kehe shimwe shili megumbo lyawo. “ Kehe shimwe shi li megumbo ohashi vulu oku kwata omulilo naashika osha nika oshiponga. Okuza tuu kiinima mbyoka ya tungitha egumbo sigo okogasa ndjoka tse ha tu telekitha. Onda mona omililo moshigwana shetu na onda mona aantu taya  kanitha oomwenyo dhawo oshowo omaliko gawo, onke omuntu oto galikana aluhe opo oshiponga shika shaa ku adhe nando,’ osho a ti.

 

LEAVE A REPLY

Please enter your comment!
Please enter your name here