Aasindani mo kumatuka osho ya pewa omakopi gawo

0
226

KuMaria Namupala

ONGHA – Ngaashi sha li sha tseyithwa moshifo shahugunina omumvo gwayi kutya Gabriel Shokonawa Marathon oya longekidha uudhano wokomumvo wa hugunina, uudhano mbuno osho wa thiki noyendji oyali ye wu nyanyukilwa noonkondo.

Uudhano mbuno owali wa tameke poheyali yongula onene mono aatondoki yali ya kutha ombinga miinano ya yoolokathana. Shokonawa ngono ali a tondoka moshinano shookilometa 42.2 okwali a tondoka na David Nakale omutondoki ngoka wo e li  kadhenga ngono a thiki ponomola ontiyali a landula Shokonawa.

Omupeviminista gwOmidhingoloko nOmatalelepo, Pohamba Shifeta okwali naye a kuthombinga methigathano lyuudhano mbuka sho ye a tondoka pamwe na kansela opo a ganithilwa miilonga moshikandjohogololo shEndola omusamane Ferdinand Shifidi , moshinano shookilometa omulongo.

Okakadhona Elias Elizabeth okali ka thiki kotango omanga, kaamati Tomas Shiweda naye oye ali a thiki gwotango moshinano shookilometa omulongo. Mweuyehafo Joseph na Jonas Ongaleni oyali ya thikile oshita moshinano shookilometa omilongo mbali na yimwe. Aatondoki ya adha pomilongo ntano oyali ya kutha ombinga esiku ndyoka yo ta yi iyutha omagulu nokuza omagonyoto moongolo.

Uudhano mbuno owali wa ningwa momasiku 31 ga Desemba omumvo gwayi, Amushanga omukuluntu gwoNAWISA, Garoes Calos naye okwali eya  a kale ombangi muudhano mbuka no ku yambidhidha Shokonawa. Calos okwa ti yo nehangano lyawo oya tameka okukwathela Shokonawa okuza mo2010 nokwa uvaneke ta kala noku mu yambidhidha ethimbo kehe. Calos okwali a uvaneke taya ka landela aakadhona mboka ya thiki tango mokumatuka oongaku dhokutondoka, no taya ka gandja manga omapando goongaku geli omulongo.

Poshiindingili shono shali sha ningilwa poongeshefa Kambwa  Trading esiku olyo tuu ndyoka mOshikango Minista Shifeta ngoka naye a kutha ombinga moku matuka okwa ti shino hasho oshikando she shotango ta matuka pamwe na Shokonawa Academy ta ti oheshi ningi shito nelalakano lyoku ulukila oshigwana kutya nayo otaya vulu okutondoka.

Shifeta ta ti elalakano lyokutondoka okutunga ashike omalutu opo ga vule ga kale gena uukolele wa gwana. Ta indile kehe ngoka ena oonkondo no kuna ehalo mokumatuka a longithe ompito ndjika.

Shokonawa okwali a pandula aayambidhidhi ye ngaashi Kambwa Trading, Armas Amukwiyu pamwe naanangeshefa yoSWAPO, Sam Shaalulange gokoshikondo shoondholongo, Minista Pohamba Shifeta, kansela gwaNdola, aatondoki ayehe naamboka yi ile ya ondodhe omeho noku gandja omukumo kaatondoki. Ta ti ota pandula uumunisteli wUuhaku mboka wali wa gandja ambulasa naapangi ya kwathele pethimbo lyuudhano nonande inapu monika iiponga.

Uudhano wokomumvo mo 2015 owa thanekwa tawu ka kalako pehulilo lyomumvo nguka tawu ka ningilwa  pOmungwelume, ta indile mboka taya longekidha uudhano mbuka ya longe puuyuuki. Omupopiliko goShokonawa Academy, Joseph Nakashona okwati uudhano mbuka owe enda nawa lela oshoka aatondokidhingi oya pewa omakopi ngoka yi ilongela yo yene.

LEAVE A REPLY

Please enter your comment!
Please enter your name here