Kankoshi a ti ina tuka Hango

0
316

KuPinehas Nakaziko

ONYAANYA – Oohapu pokati kakansela Henock Kankoshi gwoshikandjohogololo Onyaanya, na Mathew Hango omwiilongi gwomoshitopolwa kombinga yeyambidhidho ndyoka epangelo hali gandja  mokupulula omapya okonyala dhi hulile moshinima oshiwinayi.Mbaka yaali oya li yumbathana omalaka mokati kaantu iiwike yimwe yimwe komeho goKrismesa, nopethimbo ndika Hango otandi opo Kankoshi emu pe ombili montaneho, oshoka anuwa nguka okwe mu tuku .

Kankoshi okwa tindi kutya okwa tuka Hango, a ti ye okwa popi ashike nonyati  no newi lyakola na Hango sho a fatulula nkene hashi ende opo omuntu a ninge eindilo lyoku kwathelwa kepangelo ngele tashiya pokupululilwa epya.Okwa li wo a fatulula kutya oolye mboka taya vulu okukwaathwa pamukalo nguka. “Oofooloma dhekwatho lyokupululilwa ohadhi zi kUuministeli Wuunamapya Omeya nOmakuti. Ngaka ohaga ende pamwe nomutengenekothaneko gwiimaliwa oshowo aakalelipo yoshikondo shika.

Tse katuli mekondololo oopelesenda 100 dhoofooloma ndhoka ndele tse otwa tegelelwa ashike tu dhi tulithe miilonga,’ osho Kankoshi a lombwele Kundana.

Ndele Hango otati omutya nayi ogwa li wo oshitopolwa shomalaka ngoka mbaka yaali ya li ya taambekathana. Oohapu inaadhi opala ndhika anuwa odha tamekele posasiona yokunwetha omahooli na odha ka hulila pondunda yokunwina omalovu. Oohapu odha zi ashike meindilo ndyoka nda ningi ku kansela opo a gandje omayakulo koshigwana. Okwa ti Kankoshi okwe mu yamukula a ti  Hango okwa hala okuninga oye kansela. “Itashi  [kutya uuna nda popi na kansela tandi indile omayakulo] onda hala iilonga yuukansela. Aawe ngame otandi ningi ashike oshinakugwanithwa shandje ongo ogumwe gwaakwashigwana,’ Hango a ti.

“Omayele ngoka ndape kansela kutya uuna oofooloma dhomakwatho gokupululilwa tadhi ka gandjwa ishewe, osha pumbiwa ndhoka dhi pewe mboka ye dhi pumbwa unene, uuna ndoka ndhoka dha gandjwa itaadhi gwanene aantu ayehe.Omayele gandje inaga taambiwako nomwenyo omwaanawa kukansela, ngoka a li a dhiladhila kutya ngame onda hala iilonga ye ngiika.” Hango a ti. Ngashingeyi ota  indile kutya kansela Kankoshi ne mu pe ombili omanga Olyomakaya ndjika inaayi thika.

Kankoshi, ngoka a li mefudho pethimbo yu umbathana omalaka, okwa ti okwa ithana Hango kombelewa ye opo ya ka kundathane oshinima shika yo ya adhe etsokumwe.

Kankoshi okwa fatulula kutya eyambidhidho mokupululilwa ohali gandjwa shi ikwatelela kuuwindji wohectara ndhoka dha uthwa okupululwa moshikandjohogololo kehe, nomOnyaanya omuna ashike okupululwa oohektala dhili 180, tadhi kotha oodola omayuvi N$36 000 adhihe kumwe.Omagumbo ngoka taga vululu okulongitha eyakulo ndika ogo ashike konyala oopelesenda 10.41 moshikandjohogololo shoka.

Aanamagumbo mOnyaanya ka yena uudhigu nomukalo ngoka hagu longithwa okutopola omakwatho gokupulula ngaka, ya ti omukalo nguka oguna egamo oku ekelahi omagumbo ngoka ga pumbwa shili eyakulo lyoludhi nduka.

Omwaalu gwaanamapya mOnyaanya inagu tseyika kutya ogu thike peni, ndele Aanyaanya otaya ti oohektala ndhoka ooshona hadhi gandjwa okuza kepangelo ohadhi pewa wo naanamapya mboka taya vulu okupululitha omapya gawo inaa ya pumbwa ekwatho ndyoka hali zi koholomende.Omathimbo gamwe uuna shika shaningwa omagumbo ngoka ga pumbwa shili ekwatho ndika ohaga thigwapo inaaga mona uuwanawa mboka.

Kankoshi okwa ti Uuministeli Wuunamapya , Omeya nOmakuti owa gandja oodola N$300 000 kOshikoto omumvo gwoondima 2014/2015. Onkene ekwatho,lyokupululilwa mohektala yimwe megumbo olyo ashike ooN$200.00 mohektala yimwe. Ye omunepya kehe okwa pitikwa ashike okupululilwa oohektala ndatu

 

LEAVE A REPLY

Please enter your comment!
Please enter your name here