Omuloka gwa tokelwa nelunduluko  monkalo yombepo

0
168

Omumvo omupe gwapititha ashike omasiku omugoyi, ndele nguka  ogwa fa gwa tameke  nomaipulo oshowo nuutile nonuumbanda kombinga ya ngele omvula ota yi ya tuu ngedhina lyayo?

Mokulesha oolopota miikundaneki oshowo mokutalelapo omahala gamwe unene tuu miitopolwa yokuumbangalantu oshowo oshilongo ashihe, otwa ndhindhilike kutya ina ku lokwa ngaashi hashi kala sha tegelelwa ethimbo ndika.Opena omahala gamwe nomikunda dhimwe mpoka omvula ya lokele nawa nomapya gaanamikunda mbaka ogena iimeno iiwanawa , yo aanamapya mbaka ohaya piti oongula taya helele omimeno dhawo nonando ngashingeyi epupyalo olya geya noonkondo.Komahala galwe ishewe omvula oya loko inaa yi gwana nenge oya loko yo aanamapya taya tameke okupulula omapya gawo nokukuna ndele okuza mpoka kehe esiku oya ligamena kegulu ya tale ngele taku zi omata. Momahala ngoka ga ningi elago moku mona omvula yili nawa petameko lyomuloka, iimeno oya nyanyukwa niimuma otayi napa tayi kuta okuyeleka nokomahala hoka aaniimuna yamwe ya thiminikwa okutumba dhimwe dhomoongombe dhawo oshoka ndhika odha nyengwa okupita mokwenye.

Osha li tashi tilitha okuuva kiilonga yokutengeneka onkalo yOmbepo yehangano lyElongelokumwe  Meyokomeho mUumbugantu wAfrica nenge SADC sho ya ti Namibia sigo oompaka okwa lokwa ashike omvula yuuwindji woomilimeta dhili kohi yethele limwe.Omuloka nguka ogwa lopotwa pethimbo lyetameko lyomuloka mu Kotoba , Novomba na Desemba 2014.

Ondjele yomvula ndjika oyili pevi shili okuyeleka naandjoka ya loko miilyolongo yilwe ya SADC ngaashi mo South Africa, Zambia, Zimbabwe na Angola. Mo Zimbabwe iitopolwa yimwe oya yelulwa.

Omaipulo mokati kaantu ngaka otaga uvikako onkene osha pumbiwa atuhe tu tameke okugalikanena omvula opo yi loke nawa no mbala.

Ihe nando ongaaka otuna woo okundhindhilika kutya onkalo yombepo otayi lunduluka nenge oya lunduluka, naashika oshina okutaambiwako ngaashi shi li.Omolwa omalunduluko ngaka aanamapya oya pumbwa okulongitha omikalo omipe nodhili nawa dhokulonga iipalutha ndhoka tadhi kwatha opo aalongimapya ya tsikile nokupalutha oshigwana opo shi kale noondya dha gwana.

Pamahokololo gaalongimapya yamwe mboka haya longitha omukalo omupe hagu ithanwa koyendji okutatula oluma oshowo oku egulula ashike evi mpoka opo tapa kunwa iikunwa oya ti omukalo nguka gwokulonga ogo omwaanawa kaakunawe mokulonga iilya.

Aanamapya haya longo omapya opo yi imonene iipalutha  miikandjohogololo Omuntele, Onyaanya, Uukwiyu-Uushona, Ohangwena noshowo mOmusati ohaya longitha omukalo nguka gwoku gamenenapo evi na oya ti nguka ogwe ya longela iinyengandunge.

Ogwo omukalo omwaanawa monkalo yombepo yethimbo ndika hagu kwathele mokugandja eteyo  lili nawa nopethimbo lya nika oluteni nuukukutu. Yamwe oya kala nokulongitha omukalo nguka uule womimvo hamano mokupulula omapya gawo okuza kuumbangaluntu yuuka uuzilo naashika osha gamene omapya gawo kepepwepo kombepo yepukupuku. Oshoka ekungulukepo lyevi omolwa ombepo yeshikanyandi ohali kala ewinayi uuna epya lya pululwa okuza kuuzilo wuuka kuuninginino.Aanamapya mbaka oya yambapaleke wo omapya gawo mokutulamo uuhoho wopaushitwe. Ishewe omukalo gwokutatula oluma ohagu egulula evi ndyoka hali kala lyankandala[lya kukuta noonkondo kombanda] naashika ohashi kwatha opo iimeno yi mene nawa nomidhi dha ya muule okukonga iikulya nomeya mevi.

Uumbangi waanamapya mbaka otawu popi kutya oya ndhindhilika ehwepopalo momapya gawo oshoka omimeno ohadhi eta eteyo olindji , yo uuna taya longo omapya gawo oha ye shi ningi mokulongulula momisinda ndhoka omumvo nomumvo. Oshikwawo omapya gawo oga yambapala miikulya yiimeno yopaushitwe oshowo moonkondo dhoku kala gena omeya ngoka taga longithwa kiimeno yawo.

Ndhika omikalo dhimwe ndhoka aanamapya yetu taya vulu okulongitha okukondjitha elunduluko monkalo yombepo pethimbo ndika.

Ndele sigo oompaka  tse otwa pumbwa omvula ombwanawa mbala. Onkene otatu tsikile okugalikana opo yi loke nawa nuumvo.

LEAVE A REPLY

Please enter your comment!
Please enter your name here