Omunona a yakwapo omanga yina eli mokandjugo

1
269

KuNuusita Ashipala

ENGELA – Opolisi moshitopolwa shaHangwena oya li moonkambadhala okukonga omunona omushona ngoka a yakelwapo moshipangelo shepangelo mEngela Omaandaha oshiwike shika.

Yina yokahanona haka omukadhona gwomimvo 17 a za komukunda Ouhongo moshitopolwa Ohangwena, okwa hokolola kutya okwa thigi omwana gwoomwedhi mbali moshipundi momukweyo gwokushangitha oonzapo dhomavalo omanga ye a  yi kokandjugo. Moku galuka kwe omunona gwe ine mu adhapo poshipundi mpoka a li  emu thigi.

Aantu ooyakwawo mboka a li nayo momukweyo oya ti yo inaya mona omunona ngoka oshowo inaya nongela  ngoka ngiika a kuthapo okahanona hoka poshipundi. Oshiningwanima shika osha ningilwe mokati komutenya gwOmaandaha oshiwike shika.

“Yina yokahanona anuwa okwa li momukweyo poshipangelo shepangelo pEngela  okushangitha omunona opo a pewe onzapo yevalo,” osho omupopiliko gwopolisi  mOhangwena Shisande Kuume Itumba a hokolele Kundana.

Otaku fekelwa kutya omukadhona gumwe ngoka wo a li momukweyo, otashi vulika oye a yakapo okanona hoka, oshoka yina yomunona sho a galuka omukadhona ngoka ka li mo we momukweyo. Omufekelwa okwa li a zala ohema ontokele.

“Ngele owa mono omukiintu ena okahanona, ndele nguka ka kwali omusimba, nenge ena omunona keeshi gwe  kwatathana nopolisi,’ osho Itumba a indile.

Okahanona oka li ka zala ombulukweya ontiligane nohema oshunga na okali ka siikilwa nekumbatha lyuunona eshunga.

Nonando yina ina ningilwa oshipotha natango, opolisi otayi tsikile nomakonakono  moshinima shika.

Yina yomunona otashi vulika a tamanekelwe okukala nuuhasha nomunona gwe nenge oshipotha shoku thigapo omunona, ndele shika otashi ikwatelele koshizemo shekonakono lyopolisi.

Uuyelele kombinga yaampoka omunona nguka a monika nenge kombinga yomukiintu ta fekelwa ena omunona kee shi gwe na wu pewe Detective Inspecta Rehabeam kongodhi ndjika  0812210704.

 

1 COMMENT

  1. omolwashike omuntu ena oku thiga okanona kemwendhi mbali kaheli metonatelo ngawo ehepeko lyokanona natu sileni unona oshimpwiyu yakwetu

LEAVE A REPLY

Please enter your comment!
Please enter your name here