Oongombe heyali dha si konima sho dha nwethwa oovitamine

0
191

KuMaria Namupala

ONYATI –  Aaniimuna oyendji pethimbo lyoshikukuta ohaya kala taya kambadhala oku kongela iimuna yawo iikulya mbyoka tayi tungu, yo ya vule ya pe iimuna yawo uukolele oshoka omalutu giimuna ohaga ende taga thithonoka pethimbo lyondjala.

Iimuna oyindji oya tameke ta yi si noyindji tayi kwatwa kondjala no kuukumba yo yimwe ohayi kala tayi tumbwa oshoka oya tindila momitumba molwa ondjala nenota edhigu.  Iitopolwa oyindji konyala mOwambo nale oya kwatwa koshikukuta nomutenya omudhigu naashino osha ningile oshidhigu iimuna oyindji opo yi kale tayi ka konga uunapelo ,omwiidhi momalundu ogwa kukuta no gwasa.

Aakalimo yomomukunda Onyati moshitopolwa shaShikoto oyali ya kanitha oongombe dhawo dhili heyali ndhono dhasi konima sho dha pewa ovitamin.  Aanegumbo lya Jeremia Nangolo sho ya mono kutya oongombe dhawo otadhi ende tadhi kanitha uukolele oyali ya kambadhala opo yedhi kongele iikulya mbyono tayi vulu ku tunga omalutu gadho yo yi vule yi adhe koshikogo.

Gumwe gwomaanegumbo okwali a holola kutya oyali ya gandja iitungilutu mbika yoovitamin kiimuna ayihe moshigunda , nashino oyali yeshi ningi omaandaha ongula onene. Taya hokolola kutya lwokomatango oyali yi itsu ndatu dhomoongombe ndhoka dha sila moshiheke nokonima taya itsu ishewe dhili ne dha sila pomahala ga yoolokathana.

“Otwa li twa tokola opo tu kongele iimuna yetu iitungithi  mbyono aanafaalama haya gandja kiimuna yawo nelalakano dhi kale dhina uukolele,otwa li twa dhungu ondjema ndjoka yovitamine hayi tulwa mumwe nomeya, tse tatu nwetha oongombe, heke yimwe otwe yi nwetha oliitela yimwe yovitamine, otwa li tu shi otadhi kala dhina uukolele ashike nani odha si owala dho adhihe odhomoshigunda shimwe , otwa kanitha odhindji lela nomoshigunda omwa hupu owala oongombe dhili ntano adhike,” Ooyene taya gwedhspo ngaaka.

Oongombe ndhoka oyali yedhi tumbupo noku dhi fala megumbo opo ye kedhi yu ye nekwathelo lyaashiinda shawo. Otaya hokolola kutya mpa ya landa iitungithi mbyoka inaya pewa efatululo lya gwana sho osho ngiika sheeta iimuna ayihe yi se owala ngaaka, taya holola kutya natango oyena uutile oshoka kayeshi ngele ndhoka ntano dha hupapo otadhi hupu ngaa.

LEAVE A REPLY

Please enter your comment!
Please enter your name here