Pablo a tangwa koyendji

0
346

KuSabina Elago

WINDHOEK – Eyonukopo lyomuhikingalo gwomusiki yoludhi lwo Kwaito, ‘Pablo Diablo kali shi ehulilo lyuukwatya we uuwanawa, oondunge dhe oshowo onkalo ye yemanguluko no yaana iimpwiyu oyindji . Omaukwatya ngaka otaga kala noku dhimbulukiwa kaanezimo lye , ookuume ke oshowo aahikingalo ooyakwawo.

‘Pablo Diablo nedhina lye lyolela  Max Mweshininga okwa tseyika nawa momusiki ye ngaashi ‘TeelelaKashona’, ‘AllesMumwe’, ‘Second Half’ noshowo ‘Is DaaiTyd’.

Okwa huluko momasiku 29 ga Desemba 2014. Eso lye olya halutha ezimo, aahikingalo ooyakwawo oshowo aapulakeni yomusiki ye mboka ya ulike omaiyuvo gawo gehaluko ne uvo nayi lyawo okupitila momakwatathano gopankalathano oshowo moshituthi shoku dhimbulukwa onkalamwenyo shoka sha ningilwe kuyele oshiwike shika moVenduka.

Omupopiliko gwezimo lya nakusa Pablo,  Zenao Angula omumwayinagona gwanakusa  okwa ti Pablo okwa li a tseyika ashike oye  “Tate gwetu  Max” molwashoka okwa li a lukilwa hekulu.

Ota dhimbulukwa Pablo ongo omuntu ha gandja , omunandunge , omunambili  ehole aantu ye okuhole okulesha. “Pablo okwa li ehole okulesha , ngele owa yi mondunda ye , oyuudha omambo.Okwiilonga ontseyo yooveta moUnivesiti ya Namibia na okwa li pombanda moklasa yawo.Otwa li hatu mu ithana embwiitya hali ende,”  Angula a ti.

Okwa ti Pablo okwa li omuntu ena eitulemo “nezimo naakwanezimo ye ota ye ke mu yuulukwa unene molwa uukwatya we mboka,’ “Uuna a tokola okutalelapo omuntu iha tegelele oku hiwa nenge a tseyithe kutya oteya okukutalelapo. Oto mono ashike  eli peelo lyoye.Uuna eya okukutalelapo  nena ethimbo ndyoka eli pungoye okwe li ku nunina. Ye ishewe uuna eya kungoye oteya ongo oye Max ndele keshi Pablo omwiimbi nomuhiki gwoongalo,’ Angula a gwedhako.

Okwa ti wo Pablo okwa kala ta mwenya noku simaneka  ethimbo ndyoka ena, no he shi ningi aluhe  shikale tashi dhimbulukiwa . Angula ota dhimbulukwa omumwayinagona ongo omuntu omunambili . “Inandi mu mona nando olumwe ta kondjo nenge ta tsu oompata  nomuntu kutya nee onooyakwawo muuhiki womusiki. Okwa li aluhe  omunyanyukwi  no kandina esiku nda mwene a nika oluhodhi,’.

Okwa ti ishewe kali uuviteko kutya omolwashike Pablo a li ehole olwaala olutokele. Ndele okwa ti ezimo oli uviteko ngashingeyi kutya uutokele owa kalelapo ombili moka a kala ta mwenya onkalamwenyo ye ayihe. “Kutya nee okwa ninga uuwinayi wu thike peni mbuka itawu vulu oku siikila uuwanawa mboka a longa,” osho Angula  a gwedha ko.

Omuhiki gwoKwaito, Martin Morocky a tseyika nawa The Dogg, okwa tseya Pablo ongo omuntu keena mbudhi  ngoka ha kwatathana nuupu nomuntu kehe, kutya opethimbo lini. “Okuza ku Pablo ondi ilongo ko eifupipiko, okwaa iyulika nenge okukala nomutima omunene omolwa esimano.Oshitopolwa shomusiki otashi ke mu yuulukwa, unene sho a li gumwe gwaahikingalo dhingi mboka ya tameke oshitopolwa shuunangeshefa shomusiki moshilongo, no kakuna nantango nando ogumwe mokati ketu  a longo shoka ye a longa, ye omuntu iilile,’ osho The Dogg a ulike.

Lazarus Shiimi  nenge Gazza ngaashi eshiwike ota dhimbulukwa Pablo ongo omuntu keena mbudhi, ngoka emu longo kutya emanguluko ihali landwa. “Kali hi ipula niinima oyindji  naashika oshe mu ningi omuntu a manguluka.Aantu oyendji ihaya longo noku ninga shoka ya hala oshoka ohaya kambadhala oku opalela omazimo gawo,ookuume kawo nenge aalanduli yawo, ndele Pablo kali ngaaka.Ethimbo ndyoka nde mu tseya kandina esiku nde mu mwene ta kondjo. Okwa li monkalamwenyo ohwepo okuyeleka noonkalamwenyo dhaantu oyendji oshoka ye okwa li eli ngaashi eli.  Muye ondi ilongo ohokwe neidhidhimiko, otaka yuulukiwa nohole,’ osho Gazza a ti..

Moku tanga Pablo Diablo, John Walenga  okwa ti “ onkulungu miiyimbo onga  Pablo ina valwa natango’. Nakusa Pablo ota fumvikwa Olyomakaya ndjika moshilando shaandjawo Oshomeya.

LEAVE A REPLY

Please enter your comment!
Please enter your name here