Ta monithwa iihuna ku yinakulu

1
485

KuMaria Namupala

UUTALA – Okanona koomvula omulongo nahamano komomukunda Oshituya moshikandjohogololo Okankolo oke  uvite uudhigu molwa omahepeko gopalutu ngoka ta ka ningilwa ku yinakulu. Yinakulu ngoka ota ku hokololwa a gandja iilonga kokatekulu haka okuza muKotoba gomvula yo 2013.

Phillipus Paulus nonande eli mepipi lyokuya koskola, okwa hokolola ye mwene kutya okwali a etha oskola opo a ka longele yinakulu ngono emu uvaneke ta kala te mu futu oshimaliwa shokomwedhi. “Onda kala noku takamitha iimuna ethimbo alihe ngame te kwathele woo niilonga yilwe megumbo,” Paulus ta ti.

Paulus ngono a kala noku tonatela iimuna kOshongwe omukunda guli muuzilo wOmuthiya, okwa  ti nonande a li ta longo iilonga ye ngashi shuuthwa ku yinakulu okwa ti okuza kesiku a tameka iilonga ye sigo omwedhi gwa piti ina mona nande oshimaliwa she shoka a kala ta longele ano ota longo owala iilonga kaa yi na ondjambi.

Petameko lyaDesemba gwomumvo gwayi Paulus okwali a dhengwa noku ehamekwa ku yinakulu nguka, nomankawa unene momeho ngono ga kala ga kengela oombinzi sigo onena.

“Kuku  okwali a dhengendje noonkondo no nda ningi omasiku omeho gandje ga pata go kaa ge weteko nande, sho a dhenge ndje okwali a thigi ndje mohambo moka, ye ina ninga nande onkambadhala ando a falendje koshipangelo ngame ndi ka mone ekwatho, onda kala tandi tumbwa nomeya kumukwetu ngoka ha tu longo naye, sigo omeho ga tameke ta ga tonata,”Paulus ta popi ngaaka.

Okwati shino hasho oshikando shotango ta dhengwa okwa kala noku hepekwa olundji. Onkalo sho ye ende yu uka komeho gumwe gwomaashiinda ya nakudhenga Paulus okwali ayi a ka talelepo aamati ye kohambo no kwali a mono Paulus nkene eli muuwehame womeho ngono ga kengela oombinzi,okwali a kuthako Paulus te mu eta pegumbo no ku mu fala koshipangelo kOnandjokwe hono a ka pewa omiti.

Yinakulu nguno sho ali a pulwa okwati okwa dhenge okatekulu haka konima sho mohambo mwa kana iikombo oyindji, mbyono ta ku hokololwa ya likapo kiiyamakuti, yemwene okwati okwali a hala a mone uupapa wiikombo mbyoka ya likapo ashike okatekulu sho ka kala no ku konga uupapa ina kewu mona sho osho she eta anuwa edhengo, tati okwa kwatwa kondjahi no ku uva nayi molwa iimuna ye tayi kana owala pwaana uuyelele.

Aavali ya Paulus oyali yu uvite nayi noonkondo oshoka ka yali yeshi ngele omwana okuliko a dhengwa, oyali ya pula okamwana ka futwe ngaashi tashi vulika. Paulus okwa uvaneke ta shuna moskola ye a mane eilongo lye.

1 COMMENT

LEAVE A REPLY

Please enter your comment!
Please enter your name here