Eegululo lyomatala mOshakati lya katekwa ishewe

0
205

KuNuusita Ashipala

ONGWEDIVA-Natango kape shiwike kutya uunake omatala omape gokulandithila mOshakati taga ka egululwa pambelewa. Ehala ndika lya longithwa niimaliwa yoomiliona odhindji okwa li lya thanekwa li kale lya eguluka nale omumvo gwayi ashike sigo onena ina li eguluka.

Tango okwa li kwa tegelelwa omatala ngono ga kale ga patululilwa iilonga muJuni omumvogali, ndele molwashoka iilonga yokutunga yimwe ka ya li ya pwa, eegululo olya li lya undulilwa ku Septemba noshowo ku Novomba omumvogu tuu ngoka.

Konyala opwa piti omwedhi gumwe guudha okuza muNovomba ndele sigo oompaka omatala ngaka inaga eguluka noku gandjwa kaalandithi mboka ga nuninwa.Nando ongaaka omupopiliko gwelelo lyaShakati Jackson Muma okwa gandja euvaneko kutya ngaka otaga ka kala ga eguluka mbala, nonando ina tomona kondandalunde kutya mbala uunake.

‘Iilonga oyindji oya longwa omumvogu, ngashingeyi oyi ipyakidhila ashike nuulonga uushona okumanitha mpaka naampeyaka mpoka inaa pa pwa nawa, uuna ayihe mbyoka ya manithwa nena Elelo lyaShakati  otali ka pewa omatala ngaka okuza kehangano ndyoka lya li tali ga tungu,’osho Muma a hokolola.

Okwa ti ekateko olya etwa wo kelefa ndyoka tali tulwa moshungo yuule woometa 37 ndjoka tayi kala tayi pe aatalelipo yopomatala ompito yoku tala omutungilo gwOshakati okuza pombanda puule. Elefa ndyoka otali hambulwa moNdowishi  na inali pwa natango okuhambulwa, Muma a ulike.

Okwa ti elelo lyOshakati olyi itulila oodola oomiliona 12 membo lyiimaliwa yomumvo gwiimaliwa nguka opo li manithe iilonga yomatala ngoka sigo oompaka ga kuthamo oshimaliwa shoodola oomiliona 80 moshiketha shiimaliwa ya muni gwa Shakati.

Omatala ngaka uuna ga pwa thiluthilu otaga kala gena ombelewa yelelo lyago, ombelewa yokugandja uuyelele, uutala wokulandithila, oshinyanga shokuningilwa iigongi. Otaga kala wo gena uundjugo woshigwana, omahala gokupungula iinima mbyoka hayi yonuka mbala ano oongulu dhokutalaleka iinima, ehala lyokulandithila iilonga yiikaha, iikulya mbyoka hayi holoka pomathimbo ga yooloka gomumvo, ehala lyokulandithila onyama  ombihu nosho tuu.

Elelo lyaShakati otali indile oshigwana unene tuu kaalandithi yopomatala mboka ya tegelela nohokwe okutembukila komatala omape opo ya idhidhimike natango omanga tapa manithwa iinima mbyoka opo ngaka ga egululwe mbala.

 

LEAVE A REPLY

Please enter your comment!
Please enter your name here