Iikokola ya fuula oyendji nokatanga kokoompadhi

0
286

KuShipi Elago

ONDJOLA-Iikokola Football Club oyakumitha oyendji sho yali ya ulike uudhano uukumithi nokusindanapo ekopi lyOndjola Annual Soccer Bash ndyoka lya li lyadhanwa pethimbo lya Krismesa moshitopolwa shaMusati.

Osipana ndjika oyina uumatyona wopomimvo dhopevi lela noyali ya ulikile oyendji komutse gwOndjamba, nando oyendji oyali yeyitala yafa Simoni yaMalombo petameko lyuudhano .

Iikokola oyali yeshipondola okusindanapo uudhano wawo medhingoloko lyahugunina nokwiilikolela ehala lyotango moka yali yambendekwa ekopi,oombandi dhoshingoli,noshipandi shoodola N$ 7500.

Onambula FC oyali ashike yina okutaamba ehala etiyali konima sho yakanitha uudhano wawo wahugunina sho ya dhengwa kOsipana yIikokola FC noyali ya toolapo oshipandi shoo N$4500, noombandi dhoshisiliveli, Ondalaye FC oyeya pehala etitatu nolyahugunina moka yali yahekelekwa nokapandi koo N$ 3000, noombandi dhoshikushu.

Uudhano mbuka wokomumvo mboka wa kala noku  dhanwa konyala uule woomvula ntano dhapiti owuli shili wasimana uunene moshitopolwa shaMusati nowuli hawu hili aantu okuza koombinga noombinga.

Oosipana dhili 25 dhetanga lyokoompadhi odhali dha kutha ombinga muudhano mbuka oshikando shika.

Jack Iipinge, omuunganeki guudhano mbuka okwati” ethigathano ndika ohatulilongitha okukongamo iitalenti mokati kaagundjuka ,okweeta aantu pamwe, okuulika onkuluhedhi dhoshigwana shetu okunyanyukilwa pamwe, noku keelela elongitho nayi lyiikolitha pethimbo lyomatango omanene”.

Konyala aatali yeli po 300 oyali yakala puudhano mboka wali wadhanwa  uule womasiku gatano.

Olupandu lwowina otalu pewa Ongeshefa yoKambwa Trading CC ndjoka yatokola okuyambidhidha uudhano moshitunda Namibia, Kambwa Trading CC oye omukwashilipaleki guudhano mbuka, ye ta gwedhwa nduno ku Kapex Trading ngoka naye ta tsikile nokukwashiipaleka uudhano mbuka.

Iipinge okwati ethigathano ndika ota li kagalukila natango mondambo muDesemba nuumvo, na otaya kagaluka yamanga sha kola.

LEAVE A REPLY

Please enter your comment!
Please enter your name here