Nekongo okuna omadhiladhilo omanene mokuyambula po Onayena

0
316

KuMaria Namupala

ONAYENA – Oshikandjohogololo Onayena esiku nesiku otashi ende tashi humu komeho moonkatu nomiinyangadhalwa oyindji.

Kansela Max Nekongo gwoshikandjohogololo shika okwali eshi holola kutya oya kala nompumbwe yoopate ashike konima yoomvula mbali okwali kwa thanekwa opo ku tungwe oopate. “Omwali muna oopate dhili ndatu tadhi longwa omumvo gwapiti ngaashi ndjoka yOnalulago –Epembe,Onayena-Omahenge oshowo ndjoka ya kala nale tayi lilwa kaakwashigwana opo yi tulwe oteya yOnayena-Okankolo,” Nekongo ta ti.

Kansela Nekongo okwa ti wo kutya oopate ndhono dhongalama odhapwa nale oku longwa naakwashigwana oya pewa nale uuthemba ye dhi longithe. Oshinano ashike oshihupi shopate ndjoka ya za kOnalulago okupitila mElombe sigo okuya mEpembe osho shina okumanithwa nuumvo, omanga ndjoka yu uka kOkankolo tayi tulwa oteya natango oyi ipyakidhilwa nayo.

Omunambelewa omukuluntu mombelewa ya kansela gwaNayena Petrus Nashongo okwa li na ye eshi yelitha kutya mOnayena oya adha omasindano ogendji, ta ti konyala oya andjaneka omeya momikunda adhihe moshikandjohogololo, no yena edhiladhilo ya adhe okakololo kehe, hono taka pumbwa ekwatho.

Nashongo ta yelitha kutya yamwe mboka yaana omeya ga yela mOnayena oha ye ya ningile onkambadhala opo ye ya kongele omiti ndhoka  hadhi tulwa momeya  opo dhi dhipage mo oombuto dhomavu ndhoka tashi vulika hadhi kala momeya ngoka. Omiti ndhika ohadhi topolelwa aakwashigwana nolundji ohadhi falwa puupangelo, opo omukwashigwana ngoka edhi pumbwa a vule okukuthapo  a ka tule momeya ge gokunwa nokutelekitha iikulya.

“Konyala omahala nomahala moshikandjohogololo shetu ogena olusheno noosikola adhihe otwedhi andjakanekela olusheno kakele owala kosikola yimwe ndjoka yili koongamba dhoshikandjohogololo shetu oyo kaa yi na manga olusheno ashike otwa tulamo nale eindilo nondiwete kutya ota lu kala lwa tulwamo mbala,” Nashongo ta ti.

Kansela Nekongo okwali  a popi kombinga yendiki lyoongeshefa  ndyoka tali tungwa moshikandjohogololo ta ti olina omahala ogendji gomangeshefelo, mono mwa kwatelwa oombaanga, opoosa, noombelewa odhindji, omuna woo oondunda dhokuhehelwa , na okwa ti ehala ndika olya thanekwa li kale lya pwa kuyele mu Apilili na Mai nuumvo, ta uvaneke kutya otali ka gandja no ku egululila aagundjuka oompito dhiilonga.

Nashongo okwa ti nonande ehumokomeho tali ende lyu uka komeho ngeyi, oya taalelwa woo komashongo ogendji mono ta ti oyena aagundjuka oyendji unene moshikandjohogololo kaayena iilonga yo oyena omagumbo nuunona mbono wa pumbwa oku futilwa oosikola.  Aagundjuka mboka taya kongo iilonga natango oye li mepipi lya tameka poomvula 35-59. Ta ti otaya kambadhala ngaashi taya vulu yo ya kale ya ningapo elunduluko, no ya tale nkene taya hupitha aantu yawo mbaka.

LEAVE A REPLY

Please enter your comment!
Please enter your name here