A popitha aanamukunda ye

0
178

KuMaria Namupala

OMUTHIYA – Mwene gwomukunda oCham-Cham muuzilo wOmuthiya moshitopolwa shaShikoto okwali a ningile aantu ye oshigongi, no ku ya talela po momvula ompe.

Shino okwali eshi ningi mehuliloshiwike lya piti mono aanamukunda ye yali ya gongala nawa. Tatekulu Enos Nampala okwali a kutha olweendo pamwe na gamwe gomomalenga gelelo lyaNdonga yo ya ka talelepo aakwashigwana ye.

Pethimbo ta popitha oshigongi okwali a indile aanamukunda ye ya longe nuudhiginini manga yeli petameko lyomumvo, yo ya kale taya iyutha koompango dhoshilongo. “ Onda hala mu kale tamu longo omapya geni noonkondo opo mu ka mone eteyo ewanawa kehulilo oshoka aluhe omuntu oho teya shoka wa kunine,” Nampala ta gwedhapo ngaaka.

Okwali woo a indile mboka yena aaniilonga taya takamitha iimuna yawo oshowo oohambo dhawo ya kale no ku simaneka aaniilonga yawo, tati sho iimuna yawo yili mesiloshimpwiyu ewanawa omolwa aanahambo mboka taya takamitha iimuna mbyoka. “Oyendji mboka yena oohambo ohaya longelwa iilonga iiwanawa kaanahambo yawo ashike aantu mbano itaya silwa nande oshimpwiyu , yo yamwe oyo mba ya zile puushiinda shetu po Angola, yo oya pumbwa oku kala yena uuthemba,’ ta ti ngaaka.

Nampala ta indile mboka yena aaniilonga ka yena uuthemba yakale ye ya ningila uuthemba, yo ya kale yena omakwatathano naakuluntu yawo, oshoka thimbolimwe ohapu ka holoka oshinima oshiwinayi ashike kuna mpo to tsu opo andola wu ke shi lopote. Ta indile mboka taya longitha uunona waantu uushona mboka wuli mepipi lyokuya kosikola ya kale ya shuna uunona mboka komagumbo wo wu ka vule wu shune moosikola.

Ta tsikileko ta indile aavali mboka haya gandja uunona wawo uushona opo wu ka longe koohambo no ku takamitha iimuna , ya hulithepo omukalo ngoka yo ya tume uunona mbuka koskola wu ka longwe, wu vule oku ke ya kwatha uuna ya kulupa.

LEAVE A REPLY

Please enter your comment!
Please enter your name here