Yamwe yomOnyati B ina ya nyanyukilwa elelo lyawo

0
164

KuMaria Namupala

ONYATI- Aakalimo yamwe yomomukunda Onyati B moshitopolwa Oshikoto kaya uvitile ombili elelo lyawo. Shino oyali yeshi holola momukanda ngoka yali ya shanga omasiku ga piti.

Kuyele oshiwike shika oyali ya gongala no ye wete kutya oya pumbwa ekwatho lyomeendelelo, no ku holola kutya petameko lya Januali omumvo gwayi oyali ya etelwa omuulikwa gwawo ngoka ta kala te ya lele konima sho mwene gwomukunda gwawo kwali Johannes Niiye a hulitha oondjenda dhe mo 1994.

Konima sho mwene gwomukunda gwawo nguka a hulitha oya kala taya lelwa ku mwene gwomukunda Onyati A ndjono tayi lelwa ku Alkleus Fillipus. Yamwe yomaanamukunda mbaka oye wete taya thenyenwa unene kongudhi. Oya holola kutya inaya panda omuulikwa ngoka teya a ninge mwene gwomukunda gwawo oshoka ye okwazi kokule no kwa tindwa anuwa komikunda odhindji.

“Otwa kala no ku gandja omakemo getu ashike ihatu yamukulwa nande, elenga enene moshikandjo shUukwanambwa okwa kala te tu ula omalaka omawinayi, ta ti tse Aakwanyama na tuye koshilongo shetu oko tu ka pangele, mOnyati omuna ombepo yuukwamuhoko ndjono ye tu lulila noonkondo no ka tu nawe mpoka tatu uka,” taya popi ngaaka.

Ihe Elenga enene moshikandjo shUukwanambwa Wilbard Lidker okwati omanyenyeto ngano ogali ge mu thika no kwa tumbula kutya oya adhika yeli metifa lyoonkundathana molwa oshinima shika, tati otaya ka gandja eyamukulo mbala no ku kandulapo omukundu nguka.

Aakalimo mOnyati B oya ti mwene gomukunda ngono a langekwa moka otaku hokololwa ta langeke owala naampa hapu ende aakwashigwana, ye ota teyapo elandulathano ina hala oku landula omilandu ndho a adhapo, nonande ta ku hokololwa kutya momukunda ogo tuu nguka ogwa adhika nale guna okakomitiye komukunda ashike mwene gwomukunda oye tuu nguka ina hala a longithe okakomitiye hoka okakulu okwa totopo owala ke mwene.

Aanamukunda taya holola kutya anuwa ohaya ulwa Aakwanyama yo anuwa ina ya pumbwa yatye mosha moshinima shika, oya kala taya kugu onkugo yawo ashike inayi yamukulwa natango, taya indile ya popilwe yo ya kale  megameno ewanawa. Oya pula woo ya pewe omuleli omwaanawa ngoka ta kala teya popile no ku longela muuwanawa woshigwama ashihe. Taya indile aaleli ya hulithepo ombepo yokatongo no yuukwamuhoko.

 

LEAVE A REPLY

Please enter your comment!
Please enter your name here