Harry Simon melongitho lyomiti dhiindikwa

0
410

Komutoolinkundana

WINDHOEK-Gumwe gwomaadhengingonyo paithano ya simana moshilongo okuli muudhigu  konima sho omakanokono ga ulike kutya  okwa longitha omiti hadhi ithanwa steroids ndhoka dha indikwa okulongithwa kaadhani momaudhano ga yooloka.

Omakonokono oga ulike kutya Harry Simon okwa longithile osteroids muSeptemba 2013 pethimbo lyolugodhi lwe lwopaigwana. Oshifo shika osha kundanekwa nawa kutya omumbokisi omukulu, Harry Simon ngoka ena ondjokonona ombwaanawa ngele tashiya moku kondja omalugodhi ongo omuneithano mombokisa okwa monika a longitha osteroids. Oshinima shiizemo tayi ulike kutya nguka okwa longitha iinima mbyoka opena ompito opo shi mu kanithile epaya ndyoka a li a sindana pethimbo lyolugodhi lwomu Septemba 2013 moVenduka.

Enyakwa lya Namibia ndyoka sigo onena inaali dhengwa nando, olya li lya dhenge omukondjithi gwalyo Geard Ajetovic niitsa pethimbo lyolugodhi lwawo lwa ningililwe moshinyanga sha Ramatex moVenduka.

Omupeviperesidende gwoKommissi yopashigwana yoOlimpika ya Namibia, noha kwatele komeho olutu lu na sha noku kondjitha elongitho lyiikwamiti yiindikwa muudhano, Abner Xoagub okwa koleke kutya onkundana ndjoka oyo shili na otashi vulika yi ete pehulilo ondjila yeithano lya Simon ongo omudhengingonyo.

“Molwashoka katuna iilongitho ya huma komeho okukonakona elongitho lyiingangamithi momalutu gaadhani otwa li twa ningi ekonakono ndika omanga aadhani mbaka inaa ya kondja. Otwa li twa tumine iikonakonwa ko South Africa kolabora yopashigwana koUnivesiti ya Free State opo mbika yi ka talike ishewe. Nomayamukulo ngoka sho ga galuka omupya omunene oga ulike kutya  omudhengingonyo nguka okwa longitha iikwamiti yiindikwa okulongithwa kaadhani uuna taya kutha ombinga momaudhano.

Iizemo mbika oya li ya gandjwa kolutu ndoka lu na sha nuudhano wombokisa opo nduka lu katuke onkatu ya landulako,” osho Xoagub a ulike.

Simon sho a pulwa atye sha kwaashika okwa ulike keena sho eshi kakele okwa gwedha ko a ti oshinima shoka otashi ningwa kaanankondo okuza pondje, mboka anuwa ye na elalakano okuluudhika edhina lye oshowo ondhilo ye.

“Kandishishi shoka to popi oshoka sigo oompaka kapena shoka ngame nda tseyithilwa, kutya nee okupitila mehangano lyOmbokisa nenge mOkommissi yOlympika. Oto vulu okudhengela olutu oluwiliki lwoongonyo eto ya pula. Omolwashike oshinima shika shina okuholoka ngashingeyi konima sho olugodhi lwa li lwa pu konyala ngashingeyi uule womvula yimwe,” Simon osho a pula.

AmushangaNdjayi gwoNamibia Boxing Federation, Joe Kaperu okwa li a kambadhala oshinima shika eshi tale shafa shaana oshilonga, ndele konima sho a tseyithilwa kutya shika oshinima oshiwinayi na otashi vulika shikale noshilanduli oshidhigu, okwa lundulula ehokololo lye noku zimina kutya olutu ndoka olwa taamba ombapila okuza koKommissi yOlympika ndjoka kombinga yoshinima shoka.

“Eeno pethimbo ndika otwi ipyakidhila noku longa oshinima shika kashona, unene tuu sho oshinakugwanithwa shetu osho ashike oku ithana omutamanekwa opo tu pulakene ehokololo lye. Uuna twa mana shika nena shika otashi tuminwa ko NNOC opo ndjika yi katuke onkatu ya pumbiwa.,’

Oonzo ndhoka dhi li popepi noNBF  odha ti omutamanekwa okwa li a holoka komeho golutu ndoka nokwa zimina kutya okwa longitha iingangamithi mbika yoku mu kaleka ena oonkondo pethimbo lyolugodhi.

Osha ninga omukalondjigilile mokati kaadhani okulongitha iingangamithi, mbika ndele poompito odhindji ohaya ikala kutya oya longitha mbyoka. Oshiholelwa ongaashi  shoka shomu kayili gwombasikela omukwashigwana gwa America, Lance Armstrong ngoka a li iikala kutya ina longitha nando iingangamithi pethimbo a kala noku sindana uudhano woombasikela na okwa li woo a tilitha kutya ota ka fala mboka taye mu lundile oshinima shoka kohofa opo eya futithe, omanga inaa ka zimina kutya osho shili okwa longitha iingangamithi. Armstrong okwa kuthwa omasindano ngoka noku pulwa ega shunitheko. Aadhani mboka ya monika ondjo moku longitha iingangamithi otashi vulika ya taalela sigo omimvo ne itaaya dhana paampango oompe ndhoka dha yi miilonga omwedhi nguka. Omalunduluko ngaka moompango dhinasha nelongitho lyiingangamithi  otadhi fala sigo oompoka kutya mboka ya monika ondjo otaya ka tulwa mondholongo. Oompango ndhika oompe otadhi lalakanene okugamena aadhani mboka taya longo  pauyuki mokuthigathanapo.

 

LEAVE A REPLY

Please enter your comment!
Please enter your name here