Iikolokosha yomOnyati B osho ya hulithwa po

0
289

KuMaria Namupala

ONYATI- Elelo lyopamuthigululwakalo lyaNdonga oshiwike sha piti olyali lya tumu gamwe gomomalenga gaNdonga oshowo yamwe yomaaleli yopamuthigululwakalo mboka ya kalela po oshikandjo shUukwanambwa komukunda hagu ithanwa Onyati B.

Mosheendo shomalenga muka omwali mwa kwatelwa tatekulu Tomas Nakanyala omupeha gwoshikandjo shaNdangwa, Fillemon Nambili gwoshikandjo shUudhengelo, nomalenga gamwe woo. Shino elelo olyali lye shi ningi sho konima momukunda ogo tuu nguka, mwa kala iikolokosha pokati kaanamukunda, na mwene gwomukunda. Yamwe yomomukunda nguka oyali inaaya hala okulelwa kumwene gwomukunda ngoka a langekwa momukunda nguka no yali ye wete kutya inashi enda pa uuyuuki.

Aakalimo  yomomukunda nguka  Onyati B oshowo omikunda dhopuushiinda oyali ya gongala , yo ya pulakene ngele omakemo gawo oga yamukulwa. Nonande sha kala ethimbo inaa ya hala okulelwa ku tatekulu Johannes Ekaku, metitano mono oyali ya tsu kumwe opo elenga ndika lyi tsikile owala niilonga yalyo.

Gumwe gwomewiliko lyelelo lyaNdonga, Jeremia Nashandi okwali a kunkilile aanamukunda ya kale yena ombili, yo ya simanekathane. Okwali woo eya indile ya longele kumwe onga omuntu namumwayina, yo taya simaneke oompango dhoshilongo no dho pamuthigululwakalo.

Aanamukunda mboka yali ya gongala oyali ya indile mwene gwomukunda gwawo nguka Ekaku a longele kumwe nayo, ye a longe muuwanawa woshigwana. Oyali ya pula a longekidhe oshigongi mbala opo ya kundathane yo ya kale ye shi shoka tashi inyenge momukunda,. Taye mu indile a kale ta hiya iigongi ngaashi omalenga omakwawo haga ningi.

“Otwa hala pu  hogololwe aawiliki yomukunda aape oshoka ngaashingeyi mboka ya tulwapo ku Ekaku oyaza komikunda dhopuushiinda, otwa hala woo oohamushanga, kapatashu oshowo okomitiye yomukunda ndjoka tayi kala tayi longo pauyuuki, ye a tulepo elongelokumwe momikunda, yo taya dhipagapo ombepo yuukwamuhoko ndjoka oyo tayi pangele omukunda nguka,” Gumwe ta ti ngaaka.

Omupeha gwoshikandjo shaNdangwa tatekulu Tomas Nakanyala okwali a indile mwene gwomukunda nguka a konge omayele,ye ta ningi omakwatathano nomalenga omakwawo. Okwe mu indile woo a konge okomitiye mbala noohamushanga ya kale taye mu kwatha miilonga ye oshoka,oye awike kena sho ta tompolapo. Ta ti yo oya tegelela eyakulo lye ewanawa no tali hokitha. “Aanamukunda oye ku taambako ngaashingeyi nondi wete kutya oto ka longa iilonga ngaashi weyi uthilwa, okomitiye nayi kale yaza momukunda oshoka ka puna ngoka ta ka panga komagumbo omanga ena egumbo lye,” Nakanyala ta gwedhapo.

Oshigongi oshali sha hulu mombepo ombwanawa oshoka inapu uvika omainyengo nenge omanyenyeto pehulilo.

 

LEAVE A REPLY

Please enter your comment!
Please enter your name here