Magdalena ‘Female Donkey’ omuhiki gwoongalo dhoMa/gaisa

0
359

 KuSelma Neshiko

 Otashi vulika inoo tseya Female Donkey kedhina, ihe opena ompito kutya owe mu uva ta imbi nenge owe mu mona ta hiki oongalo komeho gaantu moshinyanga shontumba.

Kwaamboka inaa mu uva Female Donkey natango, tsakanekeni , Magdalena !Gontes ngoka a tseyika wo ongo Female Donkey or Female D,  omuhiki gwomusiki yoludhi lwoMa/gaisa.

Omunamimvo omilongo ndatu nguka okwa ulike kutya ye omukiintu ena oonkondo oshowo kutya okushi nawa oondjimbo dhe uuna ndoka a thikama komeho gaantu no ku ya imbilako. Oshikwawo nguka omukiintu uudha einekelomwene. Female Donkey okuudha einekelo mwene kutya ngaaka kapena egandjo lyuusama kutya nee otali zi peni tali vulu oku mu ehameka nenge oku mu shunitha monima andola.

Okwa ti oha pewa oombedhi olundji molwashoka ashike iiluka Female Donkey ihe okwa ti okasino oko oshinamwenyo oshiyapuki. “Oondoongi iinamwenyo iiyapuki yo ishewe iinamwenyo yina oonkondo, onkene kandi wete pena epuko lyasha oku ilukila oshinamwenyo shoka na kandina mpoka nduuvite,” osho a ti uudha omukumo.

Female Donkey okwa tseyika nawa pethimbo yali haya imbi pamwe nomuputudhi gwe moondjimbo oshowo  kuume ke !Oubasen ngoka wo a tseyika oye Donkey ihe konima yomahilathano moshinima shoku longitha edhina Donkey koSteiga mbaka yaali oya li ya topoka.

Pehulilo lyomumvo gwayi, okwa li a pititha oalbuma ye ontiyali yina oshipalanyolo tashi ti ‘Raak My Aan’ ndjoka ya shewelwa aaholi yoongalo dhe. “Uuna edhina lyandje lya ithanwa kosteiga, opo ndika imbe aantu olundji oyena egamo okuyola ndje, ihe konima shampa ndamana okwiimba  kehe gumwe gwomaapulakeni yandje okwa hala okuguma ndje, naashika osho sha pendutha ndje  opo ndi luke oalbuma yandje ‘Raak My Aan’,”osho a ti.

Oalbuma ndjika oyina oongalo omulongo 13  moka mwa kwatelwa ngashi ‘Ama tsū ni’, ‘Damara chesta girl’na ‘Hage Geingob’.

Kakele koku hika oongalo nomusika, Female Donkey omulongisikola paithano ha longo osikola ethimbo lyosikola , oshowo ye okuli yina yaanona yatatu.Okwa longa osikola uule womimvo 15, na okwa ti “ndika olyo eithano limwe lyomwaangoka omawanawa muuyuni unene tuu sho ye ehole okulonga nuunona,’“Oshaanawa unene okulonga naanona na onda hala oku ya kumika tashi pitile meithano lyandje. Ohandi longo ootundi dho arts na ondi itaala kutya omugundjuka kehe okwa pumbwa okulongwa nawa,’ osho Female Donkey a gwedhapo.

Omumvogu , Female Donkey okwa li a pititha ongalo ye yimwe yedhina ‘Bling Thing’ eimbilo lyokukumika, ndyoka tali kumike aakiintu opo ya ethe aalumentu ,mboka inaa ye ya talako ongo aantu yena oshilonga. Kepulo kombinga yoshinima shelongitho lyoonkondo shiikwatelela koludhi lwomuntu moNamibia, ye okwa zimine kutya okwa li mekwatathano lyopaukuume lyuule womimvo 15 moka mwa li omahepeko onkene oku shishi nkene sha tya uuna omuntu eli monkalo yomahepeko. Okwa pe aakiintu omayele opo ya kale nomakankameno moka yo ya itaala yo yaa pitike ookuume kawo ye ya longithe iilonga inaa yi opala.

Okwa ti ngashingeyi okwa mona kuume omwaanawa ngoka he mu yambidhidha  unene mokuhumitha komeho eithano lye okuyeleka na kuume ke gwotango ngoka a li omuhepeki ye keena esimaneko.

Okwa ti okuna edhiladhilo okulongela kumwe naahikingalo ooyakwawo pethimbo taya kambadhala omaludhi galwe goku imba ngaashi Hip/hop no Rnb ihe pethimbo ndika ye okwiipyakidhila noku itungapo nawa noku kokeka omutalelo gwe ongo omuhikingalo. Female Donkey oha tala kaahikingalo aakiintu ngaashi Brenda Fassie, Nicki Minaj na  Beyoncé  oku konga omukumo  “Aakiintu mbaka otaya koko moshikondo shomusiki na ondi itaala mokukoka, naashoka tandi ningi ngashingeyi otandi koko,’ osho a ti.

Okwa kumike aahikingalo aape opo ya kale neitaalo oshowo ya kale nuunkulungu uupe. Oshikwawo, “Tuleni einekelo lyeni mu Kalunga ne tamu kala mu na evuliko. Kaleni muna oondjodhi dhaashoka mwa hala oku adha,” osho eya kumike.

Female donkey okwa li iimbi pomahala ga yooloka mpoka a li a ithanwa a ka nyanyudhe aantu ngaashi poshituthi shokawe mOranje­mund  poshituthi pOkahandja noshowo pOmauliko giipindi gomOngwediva.

Nando edhina lye Female donkey halyo naanaa tali hokitha, shoka tandi vulu okukoleka ooshika kutya uukwatya we oshowo ohokwe ye yomusika oha yi lundulula omadhiladhilo ngoka omuntu hakala ena kombinga yedhina lyomwiimbi nguka.

LEAVE A REPLY

Please enter your comment!
Please enter your name here