Omolwashike oosikola dhimwe tadhi ndopitha omanga oonkwawo tadhi pititha nawa?

0
230

Osikola ndhoka dha ndopitha na dhi ilonge oshiholekwa shelongo okuza kwaandhoka dha longa no dha pititha aalongwa yadho nawa. Onkundana ombwaanawa  shili kutya oshitopolwa shaHangwena osha yi pombanda mepito sho sha inyenge okuza pehala etine mpoka sha li omumvo 2013 nokuya pehala etitatu momusholondondo gwiitopolwa nkene ya longo nawa mokulonga aanona yomondondo 12 omumvo 2014. Oshitopolwa sha Shikoto natango oshi li pehala etiyali mokupititha aanona sha landula oshitopolwa shErongo shoka sha kala pehala ndyoka omimvo mbali dha piti. Oshitopolwa sha Shana osha shuna pevi sigo opehala etimugoyi, omanga shoka shaMusati sha thikama ngashingeyi pehala etihamano.Iitopolwa sha Zambezi, Kavango Uninginino nOmaheke mbika oyo ya longa nayi mokulonga aanona ngaashi ya kala noku shi ninga omimvo dhapiti. Omolwashike natango mbika yi li konima miizemo yelongo?. Oosikola miitopolwa mbika otadhi longo shike shapuka noosikola dhomiitopolwa mbyoka yeenditha nawa elongo oshike tadhi ningi shomondjila ?.

Osha simana okudhimbulukwa kutya etulo pomahala ndika otali ulike epito lyaalongwa ayehe moshitopolwa nenge miitopolwa. Oshiwanawa okutseya kutya epito lyomwaalu omunene gwaalongwa otali monika moshitopolwa Erongo , sha landulwa kwaashoka shaShikoto nOhangwena.Ihe ngele owa tala komwaalu gwaalongwa ayehe omayovi 19,392 mboka ya li miipundi naamboka ya shanga ondondo 12 moshilongo, aalongwa ashike omayovi 8,300 mboka ya mono iitsa 25 okuuka pombanda. Yo mbaka oyo wo yena ompito okutaambwa moounivesiti oshowo miiputudhilo yilwe yopombanda. Aalongwa omayovi 3 000 oya mono iitsa yili pokati komilongo 20 noshowo 24. Omanga omwaalu gwaalongwa omayovi 8,092 mboka ya mono iitsa yili pevi lyiitsa 19, epulo oondika kutya mbaka  otaya ningwa ngiini? Otaya shuna kosikola ya ka opaleka iitsa yawo? Otaya ka ninga aakwashike? Otaya ka joina ashike ooyakwawo mboka yaana iilonga?.

Omikalo dhini tunapo ongo oshilongo , ongo oshigwana okuya longekidhila onakuyiwa yili nawa?Oshikwawo onakuyiwa yatya ngiini mbaka taya ilongekidhile, pomimvo dhini nopashimaliwa shi thike peni shoka omahupilo goshilongo taga kanitha unene tuu sho ngaka taga yugwa nenge taga lumbulwa aagundjuka , molwashoka mbaka opo natango taya kondjo okuuvako nenge okuya melongo molwashoka yo otaya kondjo natango nelongo lyopomuthika gwopasekondele?Ngaka ogo omapulo agehe ngoka tuna okwiipuleni.

Nonando oshikondo shElongo osho hashi mono iimaliwa oyindji okuza momutengenekothaneko gwiimaliwa yoshigwana, otuneni natango iilonga oyindji okulonga.

Omumvo gwiimaliwa 2013/14 omutengenekothaneko gwopashigwana ngoka gwa pewa Uuministeli wElongo ogwa li gwa thikama poobiliona dhoo N$10.7 ,sheeta mpoka kutya oshikondo shika osho shimwe sha pewa oshipambu oshinene shiimaliwa sha landulwa kwaashoka shUukalinawa  Nonkalonawa, shoka sha pelwe oodola oobiliona dhi vule N$5.

Omumvo nomumvo shampa iizemo yomakonakono goondondo 10 no 12 ya tseyithwa, oshikondo shElongo aluhe ohashi indile ayehe mboka yena sha melongo opo ya kuutumbe nokutalulula iilonga yawo opo ya hwepopeke iizemo omumvo tagu landula.

Ethimbo lyokupopya olye ya no lya pitapo. Ngashingeyi kehe gumwe okwa pumbwa okutsikila nokutala ngele iilalakanenwa niishonekwa mbyoka ya li ya thanekwa otayi landulwa oku talika ngele natango oyo ngaaka ya landulwa. Oku tala ngele omulandu aguhe, aakuluntu, aalongi, aaputudhi, aalongwa noshigwana ashihe osha hunyama kutya ngaaka iizemo otayi ulike eshunomonima momahala gamwe okuza omumvo 2014.

Ethimbo ongashingeyi okutala koosikola ndhoka dha longa nawa moshilongo, oku ilonga kudho kutya ohadhi longo ngiini opo dhi kale tadhi pititha omumvo kehe.Oosikola ndhoka dha ndopitha nadhi tale kutya iikwashike mbyoka yeeta eshunopevi momwaalu gwaapiti,okuyeleka naasho dha li dha longa nawa omimvo dha piti, dho tadhi tokola okushuna komukanka ngoka dha li hadhi longitha .

Kundana ota halele omayambeko,elago netumba oosikola omulongo ndhoka dha longa nawa okutameka na St.Boniface College, St. Paul College, Gobabis Gymnasium, Canisianum Roman School, Windhoek Gymansium Private, Negumbo Secondary School, Oshigambo Secondary School, Rukonga Vision School, Delta Secondary School, ELCIN Nkurenkuru High School. Omake nomapandulo otaga pewa wo aalongisikola naalongwa yawo moshitopolwa Ohangwena molwiilonga yawo yeitulemo sho ye shi pondola okulonga nuudhiginini okuya pehala etitatu mokupita ekonakono lyondondo 12 lyomumvo 2014. Oshikoto nasho nashi thethengwe kombunda sho, osho oshitopolwa shi li pehala etiyali mepito lyaalongwa yondondo 12 mekonakono lyomumvo 2014.Nokoshitopolwa shErongo aalongwa naalongi inamu sheetha okulonga neitulemo ndyoka lyemukaleke pehala lyotango omimvo adhihe ndhika.Longeni na ilongeni mwamanamo tamu tameke nena.

 

LEAVE A REPLY

Please enter your comment!
Please enter your name here