Ta li ta pi komukadhi noyana

0
731

KuMaria Namupala

ONANKALI – Omulumentu gwomimvo 70 nokuli omukalimo gwomomukunda Ompinge guli moshikandjohogololo Onyaanya anuwa oku li monkugo yina onkambe komukadhi noyana.

Omukulupe Thomas Mateus anuwa ota mono iihuna kayi shi okupopiwa oshoka mpoka ha lala ota pu kumitha, esilo shimpwiyu lyiikulya kali po nawa, ye ishewe ke na ngoka ha pukulula iikutu niinguma ye.

Omukulukadhi gwa Mateus mokupulwa ndhika okwa ti, ye ohayi kuundingosho mwene a ka konge omalovu ge, no kena ethimbo lyokusila omuntu oshimpwiyu. Ta ti ye kena uupyakadhi oshoka ye okuna ondunda ye mwene moka ha lala.

Nande omukulupe ha mono oshimaliwa shopenzela iimaliwa ye anuwa ihe yi mono.

Omukulupe nguka oha lala mokandunda koshinyakwi, hoka ke na ekuma lya teka kombinga yimwe, nombinga onkwao oya dhikwa niihenguti kayili melandulathano.

Ehala mpoka hapu lala Mateus ngoka a tseyika nawa nedhina Shikongoshinene kali li mesiloshimpwiyu, uukumbatha we ito u tala anuwa kape na ngu te u opaleke. Ekuma lyevi ndjoka lya tunga ondunda kombinga yimwe ota li vulu oku mu gwililapo nokumu monitha oshiponga ethimbo kehe, unene tuu pethimbo ndika lyomvula.

Mondunda mono hamu lala omukulupe ngoka omo wo hamu gondjo nokulala oondjuhwa no kapuna ngoka ta kombomo, iiyagaya oyili ashike mondunda nolundji ngele ta lala oha lala owala momapumba goondjuhwa moka. Shikongoshinene ta ti ngaashingeyi oha lala pevi oshoka ita vulu okulonda kombete hoka andola ena okulala.

Omukulupe nguka iha vulu we kwiinyenga kuye mwene, ota hokolola kutya okwali a teka okugulu omumvo gwapiti no ngashingeyi iha vulu we okwiikwatha ye mwene, shila ongele owala ta yambidhidhwa.

Okwa hokolola kutya openzela oheyi kwata ye mwene, ha falwa koyana kekwato, niimaliwa ohe yi pe oyana oyo ye mu pungulile ashike keshi kutya ohayi uka peni oshoka ngele ya landa iipumbiwa yimwe yomegumbo ohapu hupu ngaa.

Omwana gwonkelo ngono ali ta vulu okuyamukula komapopyo ga he okwa tindi oku yamukula Kundana, ta fadhuka po nokuli.

Gumwe gomuutekulu ngoka ali woo a pulwa okwali a popi kutya iimaliwa yomukulupe oya pupo kokulanda okandini kotombo hono ha tumu kehe esiku.

Ombelewa yoshikandjohogololo Onyaanya moku lopotelwa oshinima shika oyali ya thiki ko mbala kegumbo hoka nokutala onkalo ndjoka nkene yili.

Kansela gwoshikandjohogololo Henock Kankoshi okwa uvaneke taya kwatha mbala omukulupe nguka yo ye mu ete ponkalo ndjoka yopauntu ye a kale mesiloshimpwiyu ewanawa. Kankoshi okwa ti woo otaka monathana naakwanezimo yomukulupe nguka yo ya vule okumu ningila ondunda ya kola mono ta kala ta lala.

“Shino otashi yemateke unene oku tala onkalo moka omukulupe ngoka eli, nonande ena omukulukadhi ha lala mondunda yili nawa, yina ekuma nohayi edhilwa. Shino otashi ulike kutya aasamene momagumbo nayo nani otaya li taya pi nonande ihaya hala okushi holola,” Kankoshi tati ngaa.

LEAVE A REPLY

Please enter your comment!
Please enter your name here