Ya thigwa pomutenya komulilo

0
374

KuMaria Namupala

UUKETE – Aakalimo yomomukunda Uukete moshikandjohogololo Onayena oyali ya kanitha omaliko oshowo iipumbiwa yawo mbyono ya pile megumbo.

Oshiningwanima shika oshali sha ningwa Olyomakaya gapiti pethimbo lyongula onene. Egumbo lya Andreas Ankonga olyali lya thigwa pomutenya lela. Omukulukadhi gwa Ankonga Helena Iyambo okwa hokolola kutya okwa adhika ta teleke uumboloto we mbono ha telekele mondunda yimwe yili megumbo ngaashi heshi ningi shito.

“Onda adhika ashike ndi ipyakidhila niilonga yimwe megumbo onda li nda mono koshihoko shondunda taku zi olwithi, onda matuka mbala ndi ka tale omeya ngame ndi tileko opo ando omulilo gu dhime ashike ogwa yaka gu uka koondunda dhilwe megumbo,sho nda mono kutya kandinawe shoka ndi ninge onda kugu onkugo opo aashiinda ye ye ya popile ndje,” Iyambo ta ti.

Aashiinda  mo kuuva onkugo oyali ya matuka opo ye ye ya kwathele noku popila mushiinda shawo. Oyali ya kutha omayemele gomeya nonande omulilo gwa adhika gwiihanena noondunda oye shi pondola opo ya gamene oondunda ndhoka dha li inaadhi kwatwa,yo taya dhikula iiti meendelelo.

Iyambo okwati konyala oondunda ndhoka dha pyamo unene odho ndhoka dhali dhina iipungulwa ngaashi iikulya, tati kombinga yiikulya inaya hupithilwapo nande osha niilya oya pilamo,oontanga oshowo iikwatelwa yawo,omwa pya woo ondunda ndjono yali hayi pungulwa iinima yomusamane ta ti ina thigilwapo nande oshikutu shimwe kakele kwaashi a adhika a zala kolutu esiku ndyoka.

“Katushi naanaa kutya omulilo ogwe ya ngiini ashike ote dhiladhila kutya mesiga ndyono ndali tandi teleke uumboloto wandje omo mwazi omulilo nenge ohandje etayi tukile koondunda noondunda go omulilo tag u yaka ihe ngaaka,otwa thigwa pomutenya noonkondo,muumboloto moka omo owala hatu hupu oshoka atuhe nomusamane gwandje ka tuna iilonga ohatu longo ashike tse yene , nena omulilo gwe tu tula pomutenya tse twa adhika nale twa hepa,” Iyambo ta gwedhako ngaaka.

Aanegumbo mbano oya gandja olupandu kaashiinda mboka ya tondoka onkugo no ku ya kwathela pamikalo odhindji, ta pandula woo mboka yeya kwathele iikulya naayehe. Taya indile aasamaria aanamutimahenda yeya kwathele moshinima shika yo ya vule kuya komeho nonkalamwenyo yawo.

 

LEAVE A REPLY

Please enter your comment!
Please enter your name here