Esiloshimpwiyu

0
261

Odula ya djako Kundana okwa nyanyangida ehokololo kombinga younona tava hepekwa, hava pandekwa nomalyenge kuinagona, vafa oinamwenyo. Oshivike sha djako oshifo eshi osha shangele vali ehokololo lina sha nomukulupe ta monifwa oixuna komukadi novana. Nena vali otuna mo ehokololo likwao lomukainhu ta hepeke oludalo laye.

Omahokololo aa okuli amwe omomahokololo mahapu taa kumwifa, amwe okwa shangwa amwe inaa shangwa ena sha noiningwaninwa yomahepeko taa ningilwa ovadinwa ile ovanhu ovo va pumbwa efiloshisho netonatelo moshiwana shetu.

Nonande omahepeko ounona, ovakulupe novanhu ovo tava lumbu noulema ohaa ningwa nomeedoolopa, osha fa sha hanya unene momikunda omo omunhu a teelela mukale mwafimanekwa ongushu yomifyuululwakalo. Pamufyuululwakalo ovanhu ovo paife tu wete iha va dulu oku eta po sha ova li yoo va talika ko onga oilyo ya fimana moshiwana nomolwaashi kwa kala nokuli nomayeletumbulo taa holola ongushu yavo.

Ngaashi, “uhe na omutanda kuna ngobe, uhe na omaona kuna oilya, uhe na ovanyasha/ile ounona kuna oshiwana,”. Ngeenge osheya kwaavo tava lumbu noulema, ohaku tiwa, “dipaya po oshilema shoye manga vakweni tava tumu yavo”, nokovakulupe, “omukulunhu embale la kelela omhepo,” ile “kaxuxwena hadela nyoko, nyoko onale eku hadele,”. Omayeletumbulo aa oku na elalakano oku dimbulukifa oshiwana kutya, ovanhu aveshe mounyuni ove na oshilonga, nonande ova kale ve fike peni meedula ile moukolele.

Nonande pena omalityo aa, tae tu dimbulukifa oinakuwanifwa yetu, nefimano lomunamwenyo keshe, natango otuna ashike ovanhu tava li tava pi momaumbo. Oonaku hepeka ovanhu ngee nee kavena eshiivo lomifyuululwakalo, eitavelo omo mwa kwatelwa Oukriste oo hatu linomene efiku nefiku ove li enda peni?

Kakele komufyuululwa kalo neitavelo, ekotamhango laNamibia, olo lili dingi nota li dana onghandangala monghalo yakeshe omukali mo moshilongo, ita li popile nola indika omahepeko ovanhu. Hano pakuhepeka ovanhu, unene tuu ounona oto dulu okuli hanga konima yekumba, koo okaana oko ouka kufwe ngaho koveta.

Oshiwana nashi didilike kutya, oshili oufemba wookaana okukala ka amenwa, ngee opalutu, opanghalafano nokomwenyo. Oufemba wokaana okuka palula, oku ya kofikola, okuka kongela eumbo omo taka kala mo ka amenwa, nokuka kaleka moundjolowele.

Hano ngee oto hepeke okaana, itoka pe oikulya, toka denge, toka pandeke momalyenge, toka kwata keenghono, toka longifa oilonga idjuu ile weka kuta onga omunailonga woye, ove owa talika ko onga omunyonauni weeveta domoshilongo, na ouna onhele yoye yeku yukilila meedolongo domoNamibia.

Oomeme, okaana ngee inoka hala, ino ka eta ko kombada yedu, nongee nee we lihanga ukana pamupya, ka fila oshisho Popya novakwapata voye ile ovanambelewa voukashike kookanhu u tale kutya onomukalo ulipi to dulu oku kwafa nokutekula okaana koye.

Ava nee hamu hepeke ovadali veni -ota mu kumwifa! Oshili omunhu eku eta kombada yedu, nomeemhito dihapu eku fila oshisho a li ha nangala omutumba medina loye, ndele oye to hepeke.

Taku ti ngaho “kaxuxwena hadela nyoko, nyoko onale eku hadele.” Ehokololo la tatekulu Shikongoshinene ota li tu dimbulukifa omahokololo mahapu ovanyasha vahapu. Veli ngaho meedoolopa tava shingi eetuwa dongushu ei ya shiya ko, tava nangala meehotela va lukwa ootate noomeme Kamaliwa, ashike komaumbo avo iha va ende ko. Ovakulunhu vavo ohava nangala mumwe neexuxwa vamwe ohava nangala tava lokwa kodula.

Vamwe ngee va i komaumbo ovo ohava ka nangala meetuwa.

U tale nee ava vati iha va longo, oto hange nee va lambalala eepenzela dovakulupe, tave di vake po vamwe tava denge nokuli ooxe nooina medina loimaliwa. Omunhu womunyasha oto dulu oku landifa nande okapana.

Ovanaulema ovo nee tava mono oixuna. Vamwe eshi veli momaumbo ove li mo va holekwa. Vamwe ova pandekwa, voo tava lombwelwa keshe efiku kutya voo oilema, kave na oshilonga, ile ota va hepeke ovanhu.

Otwa pumbweni okushiva kutya, oulema kauna mwene. Keshe umwe oto dulu okulemana efiku keshe, ndele to lihange naana monghalo ngaashi naanaa ya mumwanyoko ile omumoye oo to hepeke, ile nokuli idulife po.

Hano vaholike tu fimanekeni ounhu womunhu, natu filafaneni oshisho, natu li ufeni kekotamhango.

LEAVE A REPLY

Please enter your comment!
Please enter your name here