Obasketball otayi longitwa mokukondjitha oHIV/AIDS mEenhana

0
297

KuClemence Tashaya

EENHANA – Aaholi youudhano yaza moosikola momudhingoloko gwEenhana oya li ya longwa oshindji kombinga yoku kondjitha HIV/AIDS okupitila muudhano wetanga lyobasketball.

Ontseyo nuunongo owundji kombinga yo HIV/AIDS oya li ya pewa aanasikola momanongelo gomEenhana kosikola yuudhano wobasketball yokoVenduka ha yi ithanwa  Basketball Artists School.

Omadhewo ngaka oga li ga gandjelwa pehala lyomaudhano opo lya tungwa moshilando shaziza Olyomakaya ga yi. Ehala ndika lyomaudhano olya tungwapo kUuministeli wIipindi Noofabulika.

Ootundi ndhoka dha ningilwa aanasikola odha li nelalakano okulonga aalongwa aagundjuka okutseya oshindji kombinga yomukithi gwo HIV/AIDS.

Osikola yo Basketball Arts School oyi na elalakano okunkondopeka aagundjuka yomOhangwena opo ya ninge aawiliki muudhano wobasketball mokati koshigwana shawo, oshowo oku humitha komeho oohedhi nkalathano ndhoka dha pumbiwa oku ya longekidhila iinakugwanithwa  yawo monakuyiwa.

Elandulathano lyopaudhano ndika otali longitha uudhano wobasketball ongo omukanka hoka taya tungile ontseyo yaagundjuka oku ilonga noku tseya oshindji koHIV/AIDS. Omukwatakanithi gwelandulathano lyoshinyangadhalwa shika mOhangwena okwa ti elongitho lyuudhano wobasketball oha li hili aakuthimbinga noshowo oha li tungu einekelo mwne lyawo , oshowo ontseyo yuuwiliki, noku indjipaleka einyengo lyopalutu osho wo uukolele wokolutu kakele ko ku longa aagundjuka oshindji kombinga yoHIV/AIDS.

Kally Mulokoshi okwa ti “Otwa pumbwa omalongekidho gatya ngeyi taga ningilwa aagundjuka moshitopolwa, na onga aagundjuka tse otatu ka pewa oonkondo momaudhano pehala lyoku tala aagundjuka yetu taya kuthombinga melongitho lyiingangamithi, okukala poondingosho oshowo okutalelapo omahala gokongulohi. Ongo aadhani yobasketball otwa pumbwa omakwatho ogendji moshitopolwa shetu.Otwa pumbwa wo oompito odhindji dhoku dhana oshowo dhomathigathano moosikola. Sigo oompaka uudhano wobasketball otawu nkondopeke aagundjuka yomEenhana netegameno okutunga onakuyiwa yaadhani yuudhano mbuka unene tuu mboka ya za moshigwana sha dhinika mOhangwena.,”

Ramah Mumba ngoka wo a kuthombinga mootundi dhokudheulwa ndhika okwa koleke shoka sha popiwa ku Mulokoshi noku kumika oosikola dhomEenhana opo dhi kuthe ombinga neitulemo enene muudhano wobasketball.

“Tse otwe ya tu tale kutya oshike tashi ningwapo kombinga yuudhano wobasketbal mEenhana. Otwa ndhindhilike kutya omahala nuupale woku dhanena owa pumba  muka. Ehala ndyoka lili mpaka oondyoka ashike lyUuministeli Wiipindi nOofabulika, na tse otwe ya mpaka opo tu mu etele uunongo kombinga ya nkene uudhano mbuka hawu dhanwa oshowo oku tseyithila oondoolopa moshitopolwa shika uudhano mbuka. Itatu hulile mpaka otuna omalandulathano ogendji ga nuninwa oondoolopa dhimwe moshitopolwa shika,” osho a tseyitha.

Aalumentu naakiintu oya li ya kuthombinga muudhano wobasketball Olyomakya ga yi omanga ya li taya ilongekidha opo ya ka konakonwe mpoka ya thikama ngele tashiya ko HIV/AIDS, mu Febuluali nuumvo.

Omunambelewa gwomaudhano mEenhanar, Paulina Kasheta okwa fatulula kutya elandulathano lyuudhano  wobasketball olya nuninwa aagundjuka oku ya hilamo melongitho lyiingangamithi oshowo ndyoka lyiikolitha. Ongo uuministel tse otatu longitha ekwatho ndika twapewa kaanamutimahenda mbaka yaza koVenduka oku tu etela euveko kombinga yiipambele yuukalinawa unene tuu oshinima sho HIV/AIDS.

Palandulathano ndika aanasikola ayehe mboka taya kuthombinga muudhano mbuka otaya ka konakonwa kombinga yaampoka ya thikama ngele tashiya komukithi gwo HIV/AIDS, naashika otashi ulike nkene tse twi itulamo mokulonga oshinyangadhalwa shika.,” osho a ti.

Abiud Ashipala, omulongi mokutunga nokukolonga omatungo mendiki lyuungomba mEenhana  okwa kumike aagundjuka opo ya kutheko uudhano mbuka neitulemo enene opo ya kale ya kola palutu unene ngele tashiya moshinima shuundjolowele muudhano.

Omukwatakanithi guudhano mbuka mEenhana, Kally Mulokoshi okwa indile oshigwana oshowo, shoka shaanangeshefa opo shi ya kwathele  niipumbiwa yuudhano mbuka oshoka moku ninga ngaaka , otaya ka lundulula onkalamwenyo yaanasikola mbaka mOhangwena.

Omanongelo gayooloka momudhingoloko gwEenhana oga li ga kuthombinga muudhano wobasketball Olyomakaya ga yi.

LEAVE A REPLY

Please enter your comment!
Please enter your name here