Simey naye a thiki mehangano lyaahikingalo

2
208

KuMaria Namupala

ONDANGWA –  Simon Shikongo ngoka a tseyika nawa koyendji Simey, naye osho a thiki mongundu yaahikingalo aaNamibia. Simey ngoka eli omvalele yomomukunda Uuyoka mo omo a putukile, okuli ngaashingeyi mondondo onti-12 poskola Olukonda popepi nOndangwa.

“Onda kala ndina ehalo nohokwe yokuhika oongalo manga ndali omushona lela ashike onda kala ndina ompumbwe yoshimaliwa. Oshikwawo onda li nda kanitha aakuluntu yandje ayehe nonande nda li nda nika uuthigwa nuupongo  onda tokola opo ndi ulike oshipewa shandje shono nda pewa shokuhika oongalo, ngame ndi fe aayimbi aakwetu,” Simey ta ti.

Simey okuli omwiimbi gwongundu yo 095 mOndangwa  ndjoka hayi hiki oongalo dha dhenga mbanda. Oha imbi oongalo dhoAfro pop oshowo okwaito, ta holola kutya olundji ohi imbi oye awike.

Okwa pititha okangalo ke kotango ,hono taka ithanwa Mokasi ta ti mokangalo muno okwa kwathelwa kuRicco. Simey okuli woo momalongekidho goalbuma ye ndjoka a holola tayi ka kala ya pita mbala.

Oalbum ndjoka ya tegelelwa okwati okwa thaneka mu ka kale muna uungalo wuli utano. “Omuntu owu hole ngaa ho ende onkatu nonkatu,onkee onda tokola opo ndi pitithe owala mboka manga ngame ndi mone woo ompito yokukala tandi ilongo oshoka onda tegelela ekonakono lyandje lyahugunina lyokomumvo,”Simey ta gwedhapo.

Simey tati oalbuma ye ndjono yo Demo otayi ithanwa nedhina Soldier of kwaito (omukwaita gwokwaito), mono a kwathelwa kaahikingalo ngaashi Ama Daz Floor,Ricco,Chiza NBK nayalwe woo. Tati ota longo nuudhiginini ye a yambulepo oshitalenti she, nokuna ehalo a kale omuhikingalodhingi moshilongo moomvula ta dhi ke ya. Ta indile aahikingalo aaNamibia ayehe ya longele kumwe , yo ya taandelithe etumwalaka ewanawa nolyombili tali pitile miiyimbo yomaludhi.

 

2 COMMENTS

LEAVE A REPLY

Please enter your comment!
Please enter your name here