Yimwe yomiilyo yoNapwu otayi  hulitha po uukwashilyo

0
275

KuMaria Namupala

ONDANGWA – Iilyo yimwe yehangano lyoNamibia Public Workers Union (Napwu), monooli oya ti otayi ka hulitha po uukwashilyo wayo nehangano ndika mbala.

Shino oya li yeshi holola Olyomakaya ya piti, sho ongundu yiilyo yehangano ndika yaza kiitopolwa Oshikoto, Oshana, Omusati oshowo Ohangwena yali ya gongala noku kundathana naashino osha ningilwa poskola yaHeroes mOndangwa.

Oshigongi shino shali sha landula shimwe shono sha ningilwe petameko lyomwedhi nguka, sho iilyo yali tayi nyenyeta oondjambi oonshona noyali taya pula dhi gwedhelwe kaagandji yiilonga yawo.  Oyali ya tsu kumwe opo ya kale ya hulitha po uukwashilyo wawo, yo ya konge ehangano limwe ndyoka tali ya popile oshoka oye wetu kutya Napwu kali eya kwathela moshinima shoondjambi.

Iilyo mbika ya thikama po moohamushanga miikondo yepangelo,aayopaleki oshowo aaniilonga yokomake.  “Elalakano lyetu otwa dhiladhila owala tu hulithepo uukwashilyo wetu no Napwu oshoka ehangano ndino itali longo muuwanawa wetu nande hali tu nana oshimaliwa kehe komwedhi,tse sho tuna ehangano ndino ando oli tu popileko lyo tali yamukula uupyakadhi wetu ashike nani otatu hepeke owala iimaliwa yetu tatu futu ehangano lyo kali tu lilepo,” Ta ya popi ngaa.

Taya holola kutya oya kala ethimbo nuule taya kugu ashike onkugo yawo itayi uvika. Ta ya ti etokolo lyokuhulithapo uukwashilyo wawo olyo owala yenapo manga opo ehangano li tale kutya otali ka kala niilyo yilwe tayizi peni. Naashino oyeshi holola kutya oyeshi ningi molwaashoka ehangano lya ndopa okuya popila nande osho lililepo. Iilyo oya ti oya vulwa loloka noya hala iimaliwa yawo yi galuke.

“Tse otatu longo nondjala, uunona wetu itatu vulu oku wu futila oosikola, tse itatu vulu okulanda omagumbo dho noondjambi odhili pevi unene,nena ngele ehangano ndyono twa hogolola li tu popileko itali shi ningi otatu hulithapo uukwashilyo wetu tse tatu kongo limwe ndyo tali longo muuwanawa wetu lyo li gandje omakemo getu kEpangelo,Napwu otatu mu longo oshilongwa ye a mone kutya sho ta longo oshapuka nokwa pumbwa okulundulula manga kuyele,” Omuniilonga gumwe gwokomake tati ngaaka nongeyo.

Aaniilonga mbaka taya popi kutya oya ninga omatokolo gawo gahugunina no itaya ka shunawe monima. Taya pe ehangano lyoNapwu uusama sho inaali gandja omakemo gawo kEpangelo okuza omvula yo2012, sigo onena inaya mona eyamukolo lye ya mbilipalela dho noondjambi dhawo inadhi talululwa.

Kuyele omwedhi nguka Amushangandja gwakwaalukehe gwehangano lya Napwu, Peter Nevonga okwa li a ti oyi ipyakidhila netalululo lyoondjambi dhaaniilonga mbaka, no taya ka gandja eyamukulo mbala.  Na okwa li a indile aaniilonga mbaka ya idhidhimike noku kala metegameno sigo ehangano kumwe nepangelo ya gandja eyamukulo lyiihwapo

LEAVE A REPLY

Please enter your comment!
Please enter your name here