Aadhanitanga moNamibia otaya si ondjala

0
215

KuCarlos Kambaekwa

WINDHOEK-  Omapekaapeko ngoka ga ningwa ku Kundana  kombinga yoondjambi dhaa dhanitanga oshowo aadhani yalwe olya ulike kutya oyendji yomwaambaka ohaya futwa oondjambi tadhi ya sitha  ondjala.

Omapekaapeko ngaka oga ulike kutya konyala aadhani yetanga mbaka oha ya pewa oondjambi konyala dhi thike pamwe no dhaaniilonga yomomagumbo. Aadhanitanga yaNamibia omapekaapeko oga ulike kutya oyo yamwe haya futwa oondjambi dha nanga noonkondo menenevi Africa.

Uudhano mboka wu holike moshilongo okwa monika kutya aadhani yamo ohaya futwa oondjambi dholuhepo okuyeleka naadhani ooyakwawo muudhano mbuka miishiindalongo ngaashi South Africa, Zambia, Angola, Zimbabwe, Malawi, Mozambique, Swaziland na Botswana.

Namibia oku li pevi unene ngele tashiya melandulathano lyoku kwashilipaleka omaudhano getanga lyokoompadhi. Oshilongo shomapendafule oshili kondje yehala etimulongo netitano ngele tashiya mekwashilipaleko lyetanga lyokoompadhi.

Namibia okuli kondje yomwaalu gwiilongo 15 mbyoka yi na ekwashilipaleko lyiimaliwa oyindji ngele tashiya kuudhano wetanga lyokoompadhi. South Africa ngoka oye gwotango moku kwashilipaleka uudhano wetanga lyokoompadhi oye a kwatela komeho ongundu ndjika yiilongo 15. Okwa landulwa  ku Botswana, Zimbabwe, Malawi, Swaziland, na Zambia moshitopolwa shaSADC.

Aadhanitanga yomoshilongo otaya nyengwa oku dhenga ondjala molwashoka oondjambi ndhoka haya mono komwedhi ethimbo limwe odhi vulike nenge odhi  thike pamwe noo dhaaniilonga yomomagumbo. Yamwe oha ya pewa ondjambi yi li pokati koodola 1 000 noodola 2 000 oshowo mboka haya futwa pombanda oomboka haya mono oodola 10 000 komwedhi.

Konima yokathimbo okafupi sho Namibia a manguluka omumvo 1990 oshitopolwa shuudhano  wetanga lyokoompadhi osha li hashi mono aadhani aawanawa okuza mokati koontauki dha za ko Angola, DRC, Zimbabwe na Zambia. Mbaka okwa li haya monika kombiliha lela , pwaana oshimaliwa shoku inyengitha omudhani okumu kutha kospana yimwe  oku mu tumina konkawo.

Nonando uudhano wetanga lyokoompadhi moNamibia owo uushona natango na kauna aadhani paithano. Oyendji yomaadhani mbaka ohaya dhana etanga pamuthika gwopaithano. Naambaka oya ninga etanga olyo onzo yawo onene  yiiyemo.Mbaka ohaya dhana    konyala ethimbo alihe moliha ya MTC.

Mboka haya mono iimaliwa oyindji muudhano wetanga lyokoompadhi moLiha ya South Africa ndjoka oyo hayi futu nawa moAfrika  alihe oha ya kwata okuza poodola omayovi omathele 450 nomayovi omathele 300 komwedhi inaamu kwatelwa oobonasa, omanga aadhani mboka haya futwa pevi moliha ndjoka oomboka haya mono oodola okuza pomayovi 15 sigo omayovi 30 komwedhi..

Ngele owa tala kaadhani yetanga mboka haya dhanene oliha moAngola yedhinaGirabola[Angola] mbaka ohaya kwatele miiyaha, oshoka moshilongo shoka uudhano mbuka noospana ndhoka ohadhi kwashilipalekwa komahangano gomahooli, ketanga lyopolisi, lyaakwiita, lyomalweendo gomombepo, oshowo kaayamba yaanangeshefa moshilongo shoka. Onkene Oliha ndjika oyo yimwe tayi hili aadhani mboka ya hala okudhanena moshilongo shoka okuza kiilongo yilwe.

Aadhanitanga  paithano moAngola ohaya kwata okuza poodola dhAmerica omayovi 3 000 nenge oodola dhi vule N$33 000 lwaampoka sigo opoodola dhAmerica omayovi omulongo 15 000 nenge oodola dha N$ 165 000 komwedhi.

Botswana naye okwa gwedhela iimaliwa yaadhani moliha ye kutya ngaaka mboka haya kwata oshindji oye li poodola omayovi 40 omanga mboka haya kwata oshishona oye li poodola omayovi 15  komwedhi..

Osha monika mo kutya oospana ndhoka hadhi futu aadhani yadho nawa moNamibia odho enyakwa lyiikando ine lya Namibia Black Africa nomukondjithi gwalyo African Stars mbaka oyo ye li pombanda momusholondondo yena aadhani haya futwa nawa pomuthika gwaNamibia. Aadhani yoospina ndhika ohaya futwa paangundu dhili ndatu.[A]N$ 8000 –N$10000, [B]N$5000- N$ 8 000, NA [C].N$2 000- N$5 000 komwedhi.

Poompito dha pumba oospana ndhika ohadhi futu oodola omayovi 25 uuna tadhi landa omudhani, nelalakano oku nana adhani aawanawa okuya ya dhanene oospana dhawo. Omwaalu nguka ohagu futwa miitopolwa itatu.

Shoka tashi kumitha ooshika kutya ewiliko lyuudhano mbuka ina li tokola natango okutulapo ondjambi yopetameko yomudhanitanga, naashika osha thigi aadhani yuudhano mbuka miikaha yelelo lyuudhano mbuka oyo ya tokole kutya oondjambi yomudhani otayi kala ingapi. Oshikwawo aadhanitanga mbaka oye li muupyakadhi oshoka yo kayena oassuransi uuna, okuli nando okwa mona oshiponga itaa vulu we okutsikila nuudhano, ishewe nopenzela oyo tuu yaapo muudhano mbuka unene tuu uuna ndoka eithano lyuudhano lya hulu.

 

LEAVE A REPLY

Please enter your comment!
Please enter your name here