Kaluli ota hepeke omusamane paihulo

1
463

KuLoide Jason

OTAMANZI- Omusamane gwomimvo 61 ota kongo egameno okuza kopolisi noshowo koshikondo shoveta opo a gamenwe komukulukadhi gwe. Otaku hokolwa kutya omusamane nguka aniwa oha hepekwa palutu nopaihulo ku kuume ke nguka.

Omolwa ehepeko ndyoka Paulus Mbwiti ngoka ena uulema okwa hala omukulukadhi  gwe  ngoka a pewe  elombwelo ndyoka ta li mu indike opo kee munithe we iihuna .

Oshiwike shayi Paulus Mbwiti okwa lombwele Kundana kutya omukulukadhi  gwe Linea Kaluli anuwa okwe mu dhenge iikando oyindji oshowo okwe muula omalaka ga honga.

“Omukulukadhi gwandje kena na ngame, oshoka oha penduka ashike ongula onene uuka kuundingosho ye ta galuka ko mokati kuusiku, no inaa longekidhila ndje iikulya. Uuna nde mu lombwele kutya onda sa ondjala  ye ota tuku ndje nameme,” osho Mbwiti a popi  a kengeleka..

Mbwiti okwa hokololele omutoolinkundana kutya ye oha kambadhala oku konga iikulya ndele omukulukadhi gwe iha ipulileko hoka opo andola emu telekele.

“Aantu yandje  otandi mono iihuna ondina omukulukadhi gwandje megumbo ihe ohatu lala moondunda dha topoka. Uuna nda tokola ndi kalale mondunda ye, ondi na okufuta oodola N$200 nenge N$ 100 ngele kandina iimaliwa ya gwana ondina okufuta omwaalu ngoka mesiku ndyoka alike,” osho a fatulula.

Mbwiti okwa lemana sho a li  a puminwa kosheenditho koRehoboth hoka a li ha longo mofaalama.

Okuza mpoka okwa galukile kegumbo na okwa tameke ihe okumonithwa iihuna komukiintu gwe nguka ya kala naye uule womimvo dhi vule 12.

“Shoka tashi ehameke ndje ooshika kutya kehe ethimbo omukulukadhi gwandje a zi kookamba oha pendutha ndje eta tukagula ndje. Kena esimaneko lyandje. Ngele onde mu yamukula ota dhenge ndje eta fadhuka po,” osho Mbwiti a tsikile.

Kundana naanambelewa yokombelewa yoshikandjohogololo Otamanzi oya thiki pegumbo ndyoka potundi 12h00 no ya adha omukulukadhi gwomusamane nguka eli natango kuundingosho. Pethimbo ndyoka Mbwiti okwa li a lala mondunda eta hokolola kutya okwa ningi oshiwike ta sitama ombinzi oshoka okwa li a dhengwa puulumentu we.

“Sho tatu popi ngeyi ngame ohandi sitama ombinzi oshoka onda dhengwa metundji. Kandi shiwo kutya omolwashike kuume kandje ta hepeke ndje ngeyi ka,” osho iipula.

Mbwiti okwe tu hokololele noluhodhi kutya ye na kuume ke nguka oyena aanona yatatu ihe omukulukadhi uunona okwe u tidha mo megumbo.

Okwa galikana kansela gwoshikandjohogololo Otamanzi, Johannes Iyambo opo emu fale koombelewa a ka lopote oshinima shika..

Kaluli omukulukadhi gwa Mbwiti sho a pulwa kombinga yoshinima shika okwa ti ye iha dhenge omulumentu gwe, ihe okwa ti ohe mu dhenge ashike  uuna ndoka nguka oye emu dhenge tango.

“Iha ndi tameke ashike tandi mu dhenge keena shoka a ningi ndje, ohandi mu dhenge uuna oye a tameke okudhenga ndje tango. Omulumentu ngoka kena oombepo oombwanawa. Iha pendje oshimaliwa okulanda iikwathewa yandje, onkene opo ndi mone iimaliwa okuza kuye ondina okumu futitha uuna tatu lala nenge uuna a hala okulala na ngame” osho Kaluli a ulike.

Okwa ti ye oha yi kuundingosho konima yokuteleka oshowo okudhunga ontaku..

“Okukondja kwomasiku ga ziko okwa holoka konima sho oye a dhenge ndje tango . Onde mu dhenge metundji oshoka okwa dhenge ndje nenkawa sho nda li nde mu indile a pendje othewa.” Osho a ti.

Okwa lombwele Kundana neifupipiko  kutya omusamane gwe ihe mu kwatha sha onkene ye ite mu pe oondya dhoshikuluntu inaa futa sha, omanga keena nando oyo othewa yoku iyoga.

Kansela gwaTamanzi, Johannes Iiyambo okwa ti shika osho oshiningwanima shotango ta tsakaneke moshikandjohogololo she noke shi uvitile nando ombili.

Okwa kumagidha noku indila aakuluntu opo ya simanekathane  oku yanda omakondjo nomahilathano ngoka inaaga pumbiwa oshowo ngoka taga yonagula onakuyiwa yaanona.

1 COMMENT

LEAVE A REPLY

Please enter your comment!
Please enter your name here