Katutura keshi owala okino

0
277

KuSelma Neshiko

Ngaashi ashike omuntu kehe, nangame onda li nda nyanyukwa okutala  okino nenge ofilima ya kala ya tegelelwa  yedhina Katutura, na otandi ti ndjika oshili oya pumbwa okupewa epapa lyOscar.

Oscar epapa hali pewa ookino nenge oofilima ndhoka hadhi nyanyudha nawa oshowo aadhani moofilima ndhoka haya hili nawa aatali yadho. Otandi ti ofilima ndjika Katutura oyina ongushu ndjoka tayi kumike omuntu opo wu kale we yi tegelela.

Opena oshindji okutya kombinga yofilima ndjika, no kandina mpoka tandi kala ndi uvite ngele okwa tiwa nandi ke yi tale ishewe pehala mpoka tayi ulikwa. Onkalamwenyo yaantu aalongi yiikulumuna oyo ehuku lyofilima ndjika.

Katutura ofilima ombwaanawa tayi ulike okudhana moofilima kwaana nando okapethili. Otayi yi thigi oonaku yi tala ya kumwa.Katutura ota ulike uuyuni komeho getu mboka inaa wu fa mu mboka tse tuli tuna omwenyo, nofilima ndjika otayi tu inyengitha okulunduluka mokutala onkalo yuuyuni.

Otashi vulika pwa li puna enenepeko negwedhelo melongitho lyoonkondo mofilima ndjika, Ihe ofilima ndjika tayi ulike iinima yaashi yoshili otayi hokitha, nonando omahokololo gamo otaga ulike eluudhiko lyuukwatya womuntu. Ofilima ndjika oya kwatelamo iiluku yomainyengo oshowo mbyoka yina elongitho lyoonkondo, mbika tayi etele omutali euvo tali nyongota oshowo tali hokitha.

Ofilima otayi longo aantu kombinga yonkalamwenyo ondhigu molukanda ngaashi Katutura, na otashi kutha ashike onkambadhala yoshikando shimwe  opo wu adhe esindano.

Aadhani ayehe yomofilima ndjika aape na ishewe oye shiwike nawa mbaka oyo Odile Muller(Esme), Gift Uzera (Kondja), Jacob Shivute (Gary), Obed Emvula (Shivago) na Chops Tshoopara (Dangi) mekwatelokomeho lyofilima ndjika nehala mpoka tapa dhanenwa ofilima ndjika ewanawa kutya ngaaka omuntu oto kala wa hala okukala pehala mpoka pahogololo lyoye mwene.

Ehokololo otali popi kombinga yomaukwatya ga yooloka gaadhani mofilima ndjika; okuza komunandholongo (Dangi) ta kambadhala oku enda nondjila ombwaanawa, omulongi gwiikulumuna (Shivago) ngoka ta kambadhala oku egulula omalanditho omape giingangamithi , oshowo omumatyona eli mokatemba(Kondja) ngoka ha kwatha aanona yomomapandaanda oshowo a gwile mohole lwotango.

Inandi vula oku itaala kutya ondi iyi yadha nda gumwa unene kwaashoka tashi ningwa mofilima ndjika kutya ngaaka poompito mbali onda kambadhala oku dhigilamo omahodhi momeho gandje. Ondi idhidhimike nando oongaaka sigo oosho ofilima ndjika ya thiki pehulilo lyayo..

Inandi lola onkalamwenyo ngaashi ndjoka tayi ulikwa mofilima ya Katutura, ihe osha li oshiwanawa okutala ofilima ndjika. Aantu mboka ye yi etapo oshili oye shi shoka taya ningi, oshoka ndjika ofilima ombwaanawa yo ishewe oya dhanwa kaadhani ye shi okudhana oofilima, yo tayi wilikwa komuwiliki eshi nawa oku wilika aadhani yoofilima.

Eeno otashi vulika ndjika yi kale nuukwatya wu lyaathane popepi naamboka wofilima yedhina “City of Gold” nenge “Tsotsi” ndele omuna oshindji tashi ningwa mofilima ndjika shoka omuntu to vulu okui itula moongaku dhomudhani gwasho.

Ofilima ndjika otayi ka tula Namibia pomuthika gwokuninga oofilima oombwanawa muuyuni.

LEAVE A REPLY

Please enter your comment!
Please enter your name here