Namibia  a indilwa iilongekidhile oluteni

0
219

KuHelvy Shaanika

ONGWEDIVA –Aawiliki yiikandjohogololo miitopolwa moshilongo oya indilwa opo ya ninge omalongekidho okugandja omayakulo omolwa oshikukuta.

Omayele ngaka oga gandjwa komunawino miinima ya pamba omeya mUuministeli Wuunamapya nIimuna, Omeya niihwa ngoka a londodha kutya otashi vulika Namibia a kale inaa mona omvula ya gwana nuumvo.

Pahapu dhaLeonard Hango, Namibia okwa fa itaa mono omvula ya gwana ngaashi kwa li kwa tengenekelwa oshitopolwa ashihe sha SADC kutya otashi ka lokwa nawa. Omuloka gwonuumvo moNamibia ngoka hagu tameke mu Desemba inagu loka ngaashi gwa li guna okuloka. Ishewe mu Januali namo omwali onkalo yuukukutu. Hango okwa ti osha fa etengeneko lyomuloka guli nawa lya longa ashike miilyolongo yilwe ya SADC ngaashi Mozambique, Zimbabwe, Zambia, Malawi naAngola.

Pethimbo ndika oonkundana dhefundja edhigu otadhi kundanwa okuza mo Mozambique, Zimbabwe, Zambia na Malawi. Omanga nando omvula ombwaanawa otayi tsikile okuloka moAngola, moshilongo shoka inamu lopotwa nande efundja natango.

“Itatu ka tegelelwa efundja tali ya mbala moNamibia shila ongele twa mono omvula ombwaanawa kaakunawe momwedhi nguka, unene tuu sho aatengeneki yomvula ya ulike kutya omwedhi nguka oshilongo otashi ka mona omvula yili nawa nenge yi li pevi. Shika otashi ulike nale kutya ngele inaku lokwa nawa muFebuluali  nena oluteni otalu tsikile muMaalitsa gwo omuloka ohagu hulile mu Apilili moka omata owala omashona haga monika,” osho Hango a popi . Okuuka pehulilo lya Januali oshilongo osha li sha lokwa nawa nomiitopolwa yimwe ngaashi mOmusati.

Hango okwa ti omalutu genasha netengeneko lyombepo nonkalo yuupyu moshitopolwa ngaashi  Southern African Regional Climate Outlook Forum (SARCOF) oshowo Sea-Surface Temperature (SST) ngaka oga ulike kutya Febuluali itaka lokwa nawa, shoka tashi ti etegameno lyomvula ombwaanawa mu Namibia omwedhi nguka olya nkundipala.

“Onkene otandi kumagidha omalelo giitopolwa opo ga kale giilongekidhila oshikukuta. Naga ninge omalongekidho gokumonena oshigwana iikulya manga kuyele,” osho a fatulula.

Omathimbo ngaka Namibia okwa kala ta dhengwa koluteni naandoka lwali lwa lula oondoka lwomumvo 2013. Oshilongo osha li wo sha gumwa nayi kefundja ndyoka lya li lya holoka pomithika dha yoolokathana pokati komimvo 2008-2010.

LEAVE A REPLY

Please enter your comment!
Please enter your name here