Omukiintu a tetagula oongombe dhamushiinda she nomakatana

0
248

KuLoide Jason

ONGWEDIVA-Omulumentu gwomimvo 59 a za komukunda Ehafo mOnankali mOndonga okwa thigwa pomutenya sho oongombe dhe dhili hetatu dha tetegulwa aniwa komushiinda she gwoomukiintu gwepipi lyopokati.

Oshiningwanima shika aniwa oshaningwa mOlyomakaya ga piti pethimbo lyomutenya.

Josef  David okwati oongombe dhe aniwa odha tetagulwa kumushiinda she sho dhayi menkolo lye nonando inadhi thika mepya okulya iilya.

“Oongombe aniwa odhali menkolo dha pitila posheelo shoka hashi edhilwa nomano ashike mepya inadhi yamo. Oongombe odhili hetatu, ashike oonkiitu odho odhindji dhivule oondume,” David a hokolola ngaaka.

David ngoka a kanitha oshindji okupitila moongombe dhe okwati kutya oongombe odha tetwa ashike omishila, momagulu nomithipa ngashingeyi odhili tadhi tina ngele ta dhi ende.

Nuugwanga Iikodhi omukiintu ngoka ta fekelwa meteto lyiimuna mbika okwa lombwele Kundana nongeyo kutya ye ina teta oongombe oshoka ethimbo oshiningwanima shaningwa okwali kuundingosho hoka ena okandingosho ke ha landitha.

Iikodhi ngoka ali ta yamukula Kundana nongeyo okwati ye megumbo okwa thiga mo ashike yinakulu ngoka ita vulu okuhinga oongombe nokamonakadhona hoka kena oomvula omulongo.

“Ngele otaku hokololwa kutya oongombe ndhoka odha tetwa nekatana, maandjetu omakatana agehe onde ga patela mondunda noshapi ondali nayo kuundingosho, oongombe ndhoka odha tetwa nashike? Oongombe ndhoka inadhi tetelwa maayetu nande nande,” Iikodhi iikanyuna ngaaka.

Okwati woo kutya oongombe ndhoka ohadhi ende momankolo ogendji ga yooloka na opuna uupu oku kala dha tetelwa pamwe pu ile kapushi menkolo lye.

Ashike David okwati ye okuna uuyelele kutya oongombe dhe odha tetelwa menkolo lyIikodhi oshoka omo dhaza tadhi shongola.

“Nanando ngoka a tetagula oongombe dha ndje okuli ta ikale onkee nga ndili tandi konaakona nawa oshinima shika oshoka oongombe dhandje itadhi kana odhindji uunene,” David a hugunine mo ngaaka.

LEAVE A REPLY

Please enter your comment!
Please enter your name here