Peter ondume yomomufitu (Ehokololo otali tsikile)

0
375

Hailwa  Shoombe omulongi ngoka a li konyala oye awike ena euveko lyonkalo nuululu wuukoloni pethimbo a li ta longo posikola yetu pOmusheshe okwa li a indile ndje opo ndi tsikile niilonga yehwahwameko lyopapolotika mokati kaagundjuka yepipi lyandje. Okwa li a kumagidha ndje opo ndaa lombwele nando olye kutya ondina okakalata kuukwashilyo woSwapo. Otandi dhimbulukwa nawa kutya konima yoku pewa okakalata haka onde ka holeke moshigunda sigo ethimbo ndyoka nda thigi po oshilongo oku ka joina ehangano ekondjelimanguluko moAngola omumvo 1977.

Eitaalo lyandje lyopapolitika olya ningi oshitopolwa sheilongo lyandje posikola. Oshali pethimbo ndika ngame sho nda koneke kutya shoka ndali tandi ilongo kashali, sha shaashi ashike elongo lya tulilwa po oshigwana shadhinika kaakolonyeki yasho.Moku koneka ngaaka onda hogololola okukondjitha omulandu gwelongo ndyoka naashika osha holola ndje ongo omugundjuka nda yelelwa momadhiladhilo. Ndele shika kashali tashi vulika andola ka kwali ketsomukumo oshowo uuyelele mboka ndamono okuza ku Hailwa Shoombe ngoka a temene ndje onyeka yuuyelele wombepo yelunduluko.Ye ngaashi tandi dhimbulukwa okwa li awike omulongi ngoka a ulike puuyelele ombinga yeitaalo lye lyopolitika tayi kondjitha onkalo yuukoloni moshilongo.Ombepo ye nayi  vululukwe mombili yaaluhe.

Onkalo oya ka tanauka mbala sho ngame nda hogolola okukala itaandi uvu shoka aalongi yandje taya ti unene tuu ngame sho ndali ndeya talela moshitalelo shokugamena omulandu gwopolitika gwethimbo ndiyaka. Omolwashika ngame onda ningi omukwatelikomeho gwongundu yaanasikola mboka ya li itaaya vulika  posikola.Omaihumbato gandje noshowo gaalongwa ooyakwetu mboka twali tu uviteko onkalo yopolitika oga thiminike omukuluntusikola opo a nyolele ndje ombapila yelondodho lya hugunina kokutya ngele inandi lundulula otandi ka tidhwamo mosikola. Shono nda mono kutya ondili pokutidhwa posikola ya Omusheshe Combined School, onda tokoIa oku yi thigapo ngame mwene.

Onda tokola oku kiishangitha kosikola Okatana Catholic School omumvo 1975. Ihe okukala kwandje pOkatana okwa li okuhupi osikola ndjoka onde yi thigipo meni lyoomwedhi ne konima sho nda li nda kondjo nomulongi gumwe ngoka a li ta ningi ndje okatongo keena nando etompelo lyasha. Konima yokuthigapo Okatana tate okwa tumu ndje kohambo ndika lithe oongombe kOnheleiwa momudhingoloko gwaKambebe popepi noongamba dhAngola naNamibia.

Kuusita onda kalako sigo omu Apilili 1975 omanga inaandi galukila kegumbo konima sho uulithilo pomukunda gwetu wa hwepopala.Pethimbo nda li tandi litha oongombe okuya moAngola onda li nda tsakanene naasitangombe aAngola. Mbaka oya li haya hokolele ndje omahokololo giita yekondjelomanguluko yali tayi kondjwa kehangano People’s Movement for the Liberation of Angola (MPLA) na National Union for the Total Liberation of Angola (UNITA) ya li taya kondjitha omuPutu. Aasitangombe mbaka  oya li ya fatululile ndje onkalo  yopolitika moAngola. Naashika osha li shotango kungame oku uva onkalo yopolitika moka aanntu taya kondjo okukondjitha uukoloni womukolonyeki Omuputu. Oonkundathana dhetu dhopapolitika  pamwe naasitangombe ooyakwetu odha mbwalangandjeke ontseyo yandje yopapolitika unene tuu ndjoka yopolitika yekondjelomanguluko.

Okuuka pehulilo lyomumvo 1976 ngame onda kala nda tinda okulongelakumwe nomukuluntusikola molwashoka ye okwa li uuviteko ehwahwameko lyandje lyopapolitika posikola neuveko lya yooloka. Ishewe ye okwa li a tsa ondumbo niiningwanima kehe yopapolitika posikola. Oshikwawo elondodho lyomukuluntusikola olya ningwa pethimbo ndyoka ngame nda li inaandi itulamo we momulandu aguhe guukoloni gwopethimbo ndiyaka. Omathimbo gamwe onda li ndi iyadha tandi hwahwameke aanasikola ooyakwetu opo yaa landule omalombwelo gaalongi. Okuya pomumvo 1977 onda li nda kwatako aamati yamwe naambaka oya joina ndje naashika osha koleke olugodhi lwetu okukondjitha omulandu gwelongo ngoka hagu longwa posikola yetu noshowo palwe moshilongo. Kutse okwiilonga hasho we oshinima sha li shina oshilonga, niilyo yongundu yandje kaya li yina ehalo lyoku ilonga we.Pomathimbo gamwe otwa li hatu longitha ethimbo okumbandameka aalongwa yalwe mosikola, hatu ya tilitha nomikonda nenge noomwele dhOshiwambo.

Uuna omukuluntusikola a mono shoka tatu ningi ohetu ithana kombelewa ye noku tu guna opo tu itule melongo lyetu. Omathimbo ogendji oha uvika ta igidha, “Hekandjo, oshike ano shi li momadhiladhilo goye”.

Kutse atuhe ka twali tatu ipula  naashoka ye a li uuvite.

Molwashoka otwali tu shishi nawa kutya nee otwa tidhwa mo mosikola ka twa li tuna shoka tatu kanitha otwa tsikile okutilitha aalongwa mboka aambanda naamboka ya tindi oku tu pulakena noku tu joina.

Pehala lyokwiilonga otwa kala ethimbo ele  tatu kundathana nokuhwahwameka yalwe opo ya joine ongundu yetu.Dhimbulukwa kutya ndika ethimbo tse twali tatu longekidha okuthigapo oshilongo oku ya koAngola, shoka twa li tatu shi ningi meholamo. Ngele tandi popi tse onda hala okutya ngame noohailwa ngaashi Hashonditila Sam Samuel, Junias Kalundingo, Festus Shiindi, na Amukwaya Shonena Weyulu, mokati ka yalwe.

Otwa kumike aanangundu yetu kokutya  Sam Samuel, Festus Shiindi naamati  yalwe  momudhingoloko opo twa simaneke elongo lyokatongotongo.

Pethimbo ndyoka otwa li nale twa tokola onakuyiwa yetu molwashoka ka twali we tu na ehalo okulongwa elongo lyopaukoloni. Na otwa li twa tokola okuthigapo  oshilongo moka twa valelwa.

Ookuume kandje nongame otwa tokola okuthigapo oshilongo tu ka joine Swapo muundjendi kuyele omumvo 1977. Ngele otandi dhimbulukwa nawa kapena nando ogumwe gwetu a li a kundathana oshinima shika nomuntu gulwe kakele kutya otwe shiikundu mokati ketu. Manga inaa tu kutha ondjila kuume ketu John, ngoka a li eshi mpoka hapu adhika aakwiita yemanguluko nenge oPLAN okwe tu hokololele nawa. John okwa li a tsakanene naakwiita yoPLAN pethimbo a li a talelepo pomukunda Ehomba muuninginino wUukwanyama moshitopolwa Owambo nale. Okwe tu lombwele kutya okwa mona oondjembo ndhoka haya kondjo nadho oshowo omizalo ndhoka yo haya zala oshowo eholokepo lyawo, naashika oshetu fuula unene. Oshetu kutha konyala iiwike iyali okutokola kutya otatu ka thigapo oshilongo uunake okuya kokuma twaa shiko. Ondunge yetu oyali okuhwahwameka omwaalu omunene gwaamati opo yetu joine, nonando shika osha li oshilonga oshidhigu shili unene tuu sho shika twali tatu shi longo meholamo.Kombinga yandje kakele kwashoka, John etu hokololele ondali handi pulakene oradio yo SWAPO hayi ziilile moostudio moAngola konyala esiku kehe. Oradio ndjika oyali hayi gandja uuyelele tawu uvithako naashika osha mbwalangandjeke euveko lyandje kutya omolwashike SWAPO a li ta kondjele onkene itashi dhimbi kutya omolwashike ndali nda kwata komeho moku hwahwameka aagundjuka ooyakwetu oku ya muundjendi.

Otwa li tu uvathana kutya otatu ka kala uusiku wokusha, okuya muundjendi paandja tate Kalundingo omanga inaatu ya mela lyondjila  esiku lya landula. Manga inaatu katuka yina ya  Junias okwe tu telekele onguta yomondjila. Okwa li wo a gama kutse noko shi lalakanenwa shetu oku ka kondjela emanguluko, onkene okwetu telekele oshithima sha tulwa melilo nenge  mongalo ye tatulamo onane. Onane oya tulwamo okuulika kutya nando otu tsakaneke iiponga nomaudhigu otatu ke ga sinda.Neyambeko lya Meme Kalundingo tse otwa yi mela lyondjila potundi ontine yongula.

LEAVE A REPLY

Please enter your comment!
Please enter your name here