Shoka aanawino ye wete naashoka taya hokolola

0
227

Komutoolinkunda

WINDHOEK-Aaholo yuumaudhano omathele oya tala uudhano wetanga lyokoompadhi ongo ondjila yimwe okuhwepopeka oluhepo oshowo okukuthapo onkalo yokwaana iilonga ndjoka tayi kenyeneke moshilongo shika.

Ihe nando oya itaala kutya okudhana etanga lyokoompadhi otaku tidhapo oluhepo, oshili oondjika kutya shoka tashi adhima haaluhe osho oshingoli moshikondo shuudhanitanga.

Onkalo yoondjambi dhaadhani hadhi futwa kwatoka nenge oondjambi ihaadhi futwa nookuli poompito dhimwe oshOwo oobonasa, oya kumitha aantu.

Noshinima shika osha ninga omahokololo noshikundathanwa moondunda dhokunwina omalovu, muushabina, muubashu, moombesa oshowo pomahala gokulila omwiha ngaashi ndyoka lya  lya Café Schneider mokati kehala lyomalandithilo moVenduka.

Osha ninga omukalondjigilile kutya aadhani ohaya idhidhimikile okuningwa nayi kooyene yoospana, mboka ye na egamo lyoku kala inaa ya gwanithapo euvathano unene tuu haye shi ningi uuna pwa holoka enanathano.

Otashi tilitha oshoka uudhano wopombanda wetanga lyokoompadhi owa kuutumba komboma ndjoka tashi vulika yi ndwafuke ethimbo kehe, unene tuu ngele ina pa monika omukwashilipaleki ishewe gulwe ta gwedha ku MTCngoka oye eli omukwashilipaleki omunene nena.

Aadheuli naadhani oya tsikila oku kondjitha eshongo lyokwaafutwa oondjambi dhawo pethimbo, noshowo endopo lyaanambelewa okugwanithapo omauvathano.

Kundana okwa kundathana naanawino yuudhano wetanga lyokoompadhi yonena naamboka yomonakuziwa okutala omaiyuvo gawo kombinga yonkalo muudhano mbuka, omanga ndjika inaa yi thikameka uudhano mbuka.

Omuwiliki gumwe guudhano mbuka okwa ti uudhano mbuka otawu ka  ya, ashike nawa komeho oku uka pomuthika guudhano mboka hawu dhanwa moSouth Africa nenge palwe menenevi ndika uuna oholomende oshowo oshikondo shopaumwene ya longele kumwe moshinima shompumbwe yiimaliwa.

“ Onda gama kaanangeshefa mboka ya fa inaa ya hala okukwathela uudhano wetanga molwaashoka mbuka itawu ulike wu na ongushu,’

“ Osha pumbwa okuuvikako nawa kutya omuntu kehe ena ongeshefa okwa hala oku kwatakanithwa noshilongomwa shongushu. Ihe shoka tashi nikitha oluhodhi ooshika kutya uudhano wetanga lyokoompadhi itawu ulike wu na ongushu opo wu hile aanangeshefa,”

Omapekaapeko otaga ulike kutya oshitopolwa shuudhano wetanga lyokoompadhi muuyuni shoka hashi mono iiyemo nenge iimaliwa oyindji ohashi yi mono okupitila  mokuulika uudhano mbuka pethimbo tawu dhanwa koTiivii.

Onkene Namibia ota kala miihwa nomomilema ngele tashiya puudhano sigo  uuna ndoka a ningi po sha kombinga yokuulika uudhano mbuka kotiivii pethimbo mbuka tawu dhanwa.

Yalwe oya thaneke kutya omadhiladhilo neitaalo ekulu kutya ospana na dhi kale dhili miikaha yoshigwana olya pumbwa okudhipagwa oshoka ndika olya kulupa. Otaya kumike opo uumwene woosipana dhetanga lyokoompadhi wu tulwe miikaha yaanangeshefa aayamba mboka taya vulu no yena iimaliwa oku gandja nokukwashilipaleka uudhano wetanga lyokoompadhi.

Epulo oondika oto vulu okupopya ngiini kutya ongweye mwene gwiilonga ngele iilonga ito yi gwanithapo na ishewe ito vulu oku yi futila.?

LEAVE A REPLY

Please enter your comment!
Please enter your name here