Va humbatifa okaana eeboma

0
312

KuHelvy Shaanika

ONGWEDIVA – Ovadali vamwe momukunda uli momudingonoko wa Nayena ova kumwifa opolifi eshi va toola eeboma ndele tave di pe okaana kavo keke di ekeleshi.

Omupopiliko wopolifi moshitukulwa shaShikoto Chief Inspector Nuuyi okwa ti oshiningwanima eshi osha ningwa oshivike eshi momukunda Uukete.

Nuuyi oo a halukifwa neenghono koshiningwanima eshi ota ti, ovadali ava ova fudula eeboma poukamba, mwa kwatelwa oyo ya nyika oshiponga yo 82mm mortar ndele tave di tula monailona, tava i nado keumbo. Konima oveke di pa okaana keke di ekeleshi.

“Ohatu uhala hatu popi, hatu udifa. Ashike ovanhu onghee ngaho tava tutumba oitopifa. Ovadali ava okwali tava dulu oku mangeleka nokudipaa okaana kavo. Dilaadila ashike kutya ngeno okaana oko oka pundukile ile ka denga onailona oyo kosha, nande okoshiti ile kemanya.

“Oshinima shimwe okwa li vena okufya voo vene nokuhanauna po eumbo lavo neeboma odo… Tava lombwele vali okaana ka ka umbile eeboma popepi nomandoloma omeva ovanhu epangelo opo hapa nu ovanhu noimuna.  Twali ku popya oshili kashi li dule,” Nuuyi ta tanguna.

Nuuyi okwa ti kakele, kovadali ava omukulupe wonhumba komukunda Okankolo naye okwa li ashiva Inspector Peter Nepunda oo ekwetele komesho oshikondo shokutelulula eeboma mOshikoto opo a ye keumbo laye.

“Okwa lombwela ashike Inspector Nepunda kutya naye a katambule ounima vaye ovo ehole. Nokuheshii kutya ounima ovo ta ufanenwa oukwashike, Inspector Nepunda okwa ya ko keumbo oko. Ohaluka omukulupe ota di kelimba a humbata eeboma keenyala adishe.

“Konyala imwe okwa humbata ohand grenade ei kwete naanaa mokakongo, nokonyala ikwao okwa humbata oshela ei kwete momalwenya omutwe wa yuka pedu. Nonande okwa haluka, Nepunda ina ngwangwana nande, okwa lombwela ashike omukulupe a twale ‘ounima vavo’ (eeboma) mepya. Ngeno okwa ulikile kutya okwa haluka ota shi tulika ngeno omukulupe eeboma edi efa ndele ta di li denge pedu. Aveshe va lipo ngeno ina va dja po opo,” Nuuyi ta ti.

Nuuyi okwa kumaida ovakwashiwana va ha hetekele nande nande vali oku kuma eeboma, ta ti nopolifi iha i di humbata. Apa ta i di hange opo ashike haii topifile.

Ta kumaida vali ova tungi kutya ngee va mono eetendela va tunge eepate, oipangelo ile eefikola peenhele opo pali hapa ningilwa omalwoodi pefimbo loita, nava dengele tete opolifi opo i hade po eeboma.

“Eshi kashifi ashike omhango yaNamibia ashike oyounyuni aushe. Omu mOshikoto, nava dengele Inspector Nepunda kongodi 0812704970,” Nuuyi ta yelifa.

 

LEAVE A REPLY

Please enter your comment!
Please enter your name here