Kambwa okwa ti ye ina etitha eyelu mOkahao

0
291

KuNuusita Ashipala

OKAHAO – Omunangeshefa  David Kambwa Sheehama okwa ekelehi omipopyo ndhoka dha ti okuyelulwa kwomahala gamwe momudhingoloko gwOkahao olya etwa kondjila yongalama ndjoka a tungitha yemwene momukunda ngoka.

Omahala ngoka ga udha omeya gefundja oga lundile Kambwa nongalama ye kutya  oyo ya eta omeya ngoka ga gongale noku ninga ogendji, ondjila ndjoka a tungu oya ngambeke okutondoka kwomeya anuwa. Shika okwa hokololwa sha etitha opo omudhingoloko ngoka gu yelulwe.Onkene aanamukunda otaya ti omikunda ngaashi Okanya, Uukwananghanda nUutota odhili momeya ngoka ga thikama owala itaaga tondoka nando ngaashi andola haga ningi shito oku kunguluka guuka miishana.

Kambwa okwa ekelehi edhiladhilo nelundilo ndyoka a ti edhiladhilo ka lya li okuthitika omeya ngaashi tashi ipulwa nasho  kaanamukunda ihe olya li oku keelela opo omeya gaa tondoke kombanda yopate ndjoka nokuyi teyagulapo ngaaka. Okwa gwedhapo a ti edhiladhilo okutulapo uuntopa wu gwedhe utatu mboka wa tungwapo nale. “Shoka kashishi oshili, onda tungupo ondjila ndjoka noontompa dhili ndatu niimaliwa yandje mwene ndeshi ningile oshigwana. Onda li ashike tandi kambadhala okugamena ondjila opo yaa tekepo,’ Kambwa a fatulula.

Kambwa oye mwene gwoongeshefa dha Kwamba Trading dhina iilonga moku tunga oondjila, mokulanditha iiungithi. Okwa ti oshina ombiliha okugamena ondjila ndjoka opo yaa tekepo okuyeleka noku tungapo ondjila ompe konima.

Kambwa okwa li wo a geela kansela gwoshikandjohogololo Okahao, Isai Kapenambili ngoka a lundile kutya okuna omutse omukukutu no kena elongelokumwe , molwashoka okwa ndopa oku palamena uupyakadhi woshigwana shoka sha li ihaashi vulu okuthika kondoolopa uuna mvula ya loka.

Okwa  ti anuwa Kapenambili naakwashigwana yamwe oya teya ondjila uusiku woSoondaha . “Onda li nda kambadhala okumu dhengela ongodhi ihe okwa kala noku yi tetako, otandi dhiladhila kutya okunine ndje.Ngashingeyi otaya lundile ndje kutya  otandi kondeke omeya molwashoka ondina ongeshefa pehala ndyoka lya yelekwa. Evi okuza mongeshefa yandje ohali kwatha aaNamibia nenge  oondjila dha Namibia oshowo oshigwana ndele ka li shi lya Kambwa awike.

Kapenambili okwa ekelehi omapopyo gaKambwa kutya ye okwa li oshitopolwa shaantu mboka ya teya ondjila opo omeya ga pitepo.Okwa ti woo kutya Sheehama kali nedhiladhilo okutulapo uuntompa naashoka ta popi osho iifundja iitokele

“Uunake a ali taka tunga uuntompa mboka oshoka okwa lokelwe momasiku 23 ga Januali, okwa li ta ningi shike ethimbo alihe ndyono, “ osho Kapenambili a pula..

Kambwa kombinga ye okwa lundile Kapenambili kutya oha eta po omaupyakadhi ogendji pehala lyoku etapo ondunge yoku kuthapo omaupyakadhi ngoka haga holokapo.. “Ngashingeyi sho ya mono ehala lyuupitilo aantu natango oyena uudhigu okupita na otaya longitha iiti opo ya vule oku taaguluka omeya, omukalo ngono ogwo nee epotokonono lyuupyakadhi mboka? osho Kambwa a pula.

Kapenambili  okwa ti ethimbo lya  Januali kali shi ewanawa okulonga okutunga ontompa, mbyoka iilonga hayi longwa mu Juni na Juli.’

Kapenambili ina vula okupopya kutya omagumbo ga ngapi ga gumwa komeya ngoka gefundja ihe okwa pula omutoolinkundana ngele ina talelepo ehala ndyoka oku italelako yemwene.

Okwa li woo iilongekidha okupopya kutya omalongekidho geni ga ningwapo okukwatha mboka omashisha gawo ga tewapo komeya nenge mboka ya tembukila komagumbo giipeleki..

“Uule womeya otawu shuna pevi, onkene kapena naanaa uupyakadhi washa. Ishewe onkalo ndjika kayi shi ompe moshitopolwa shika. Otwa kala noku taaguluka omeya mehala ndika okuza kuushona wetu sigo onena.” Kapenambili a ti.

LEAVE A REPLY

Please enter your comment!
Please enter your name here