Ounyasha ihau xulile medopo loGrade 10 ile oGrade 12

0
276

KuLasarus Nhgifindwako Hakwaake

Moshiwana shetu omuna onghalo ile nditye omukalo djikilile woku yandja alushe oushima, ngeenge pena umwe a dopa oku wanifa po osho sha pulwa. Nonande omunhu ena omhito onhivali oshoyo oninhatu monghalamwenyo. Omafimbo, nomafimbo ohatu li hange yoo twa dopa oku yandja omhito onhivali komunyasha ngeenge ina ninga nawa momhito yotete. Nande vamwe hatu yandje omhito ei, efimbo limwe ohatu i yandje ili koshi yomafininiko oshoyo omatilifo ku nakwipewa.

Ohandi shange oshinyolwa eshi nda tala konghalo nghee ovakulunhu vamwe hatu dulu oku kala oimbide ya wedwapo konima ngeenge ounona vetu ova kala inava pita ondodo onhi 10 oshoyo 12. Shimwe nda didilika shi heli nawa osheshi kutya, ngeenge meumbo ohamu di ounona ve dulife puvatatu ile vanhe, ndele vavali vomuvo tava wanifapo oitwa yoku va twala kondodo 11 ile yoku va twala koiputudilo yelongo lopombada, nena ava inava wanifapo oitwa ohava talwa onga ovadopi. Apa nandi u diweko nawa, “inandi hala kutya ounona ava ovadopi lela, ashike otava dulu oku pita natango ngeenge va pewa omhito onhivali ile oninhatu.

Kalupu, oto hange nee ponhele yomudali a twe okaana omukumo, noku konga osho sha yambidida edopo lokaana, nena oto hange nee omudali ta ulike pauyelele kutya edopo ola topola ohole yavo pokati. Pamalufo amwe oto hange nee omudali tati ko kaana; “ove oto kala ashike meumbo omu to telekele vakweni, shaashi mofikola kuna eshi to li kola mosha vali.” Vamwe tava ulwa, “ove otoyi ashike kohambo shaashi kuna eshi wa etapo apa, noimaliwa, noikulya yange wa hepeka.”

Ovadali ovafimanekwa oshoyo ovatekuli ovaholike, ounona vetu otava dulu oku dopa, ashike otava dulu yoo oku pita ngeenge otwe vape eemhito noku vatwa omukumo. Shimwe ashike okaana haka kala ka djuulukwa noke shi pumbwa unene, osho oku tuwa omukumo ngeenge omadiladilo ako a tyololoka.

Okaana pefimbo ledopo, okena oudjuu ile nditye okena oipute yedopo, ya pumbwa oku mangwa, ngeenge owe ka ula omalaka ongaho, owafa ashike omunhu ta tu poshipute shitalala. Oshiluluma ngahelipi ngeenge omunhu owa tolokana oshipute shamukweni shitalala? Oto hange nee omudali umwe oku udite ko ngoo nee ngeno, ta futile okaana ka ka nawapeke oidjemo yako, ashike keshe efiku okaana otaka u lwa omalaka “ou shi shii tuu kutya onda futa oimaliwa yange uye moNAMCOL, ile ove efimbo ashike to manapo, shi xwepo ashike u dale ounona voye  (ngeenge naku dopa okakadona).

Omapopyo nomisheko, nokunyana oshoyo okupopya eshi wa yandja itashi tu okaana omukumo, shapo oto teyapo ashike onghalamwenyo yako, noku lundulula omadiladilo ako fiyo taka kufa omatokolo mai.

Onghalamwenyo yokaana inai xulila medopo, omhito keshe okaana taka mono pa yambidido lomudali ile omutekuli nena okaana keshe kawila po otaka dulu oku yambukapo. Ashike ngeenge ounona eshi va wilapo ohatu va lyatele po vali, nena katuna efiku limwe to ka yambidida oshoyo okufya oshisho onga oshinakuwanifwa shetu moshiwana, apa oto dulu okutya okaana okadopa ndele nafye ohatu dopa ngoo moinakuwanifwa yetu.

Pamwe ondishi nee vali oku lundulukila kovanyasha vakwetu ava inatu wanifa oitwa yoku ya kondodo ya landulako. Eshi handi popi apa inandi hala nee mu djepo nonyalo nye mu haka longe noudinini shashi muna eudeko kutya opena ou temu popileko. Dimbuluka kutya eshi sheku shaalifa konima onghatu imwe osheshi ka kwali we li pakamo nawa.Ondi udite onghalamwenyo yomunyasha nghee ya mena oinima ihapu shili.Opo tuxume komesho otwa pumbwa oku dudamo oinima ei tai shundula onghalamwenyo yetu pefimbo lela lounyasha, oinima ngaashi, oukolwe, oipala, oumbudi, ounwa, oku linenepeka, oingangamwifi,otai tu imbi tu fike kefikilo letu. Komesho yaashi she otwa pumbwa oku tula ko eshi tashi tu xumifa komesho (elongo, eenghediukali, efimaneko neli tungepo). Itashi kwafa sha oku kala oove wotete mokunwa nawa omalodu, ndele oove waxuuninwa mokupita kofikola.

Efimbo onena ovanyasha tu dimbuluke kutya, oinima aishe ohatu dulu oku ininga, ashike otuna oku kala twa kotoka yoo kutya, hainima aishe hatu ningi ina ekwafo monghalamwenyo yetu yokomesho. Imwepo oina ashike ekwafo kolutu pokafimbo ndele monakwiiwa kaina ekwafo lasha.Omunyasha ina dimbuluka onakwiiwa yaye kena ekanghameno,nonghalamwenyo yaye kaina ekwashilipaleko. Oha dame momitutulombo noku kanyatela koinima yo pokafimbo fiyo etango tali mutokele.Nokonima oto hange nee ashike oye omunhu woku yandja omaushima.

Efimbo onena tu longife omhito manga tai monika,tu ulike elitulemo letu opo tu dule okufinda okunyenyeta. Natu dimbulukwe yoo kutya nena ovanhu otava longifa omivalu dovanyasha opo ve li monene oshimaliwa.

Ovanapolitika otava longifa uhapu wovanyasha ve hena oilonga opo va mone eemhito mepangelo ile papolitika ndele shama vedi mono tava dimbwa eshi kwali va popya. Keshe shimwe tashi longwa nena ovanhu otava longifa omashongo oo a taalela ovanyasha opo vadule oku konga omayambidido no mauwanawa avo vene vo ovanyasha tava kala monghalo yoluhepo odula nodula.

Omapekapeko mahapu, kutya nee ouhapu wovanhu, oilonga,eliko, ovapekapeki otava longifa ovanyasha opo ve li monene sha mondjato manga ovanyasha tava mono oixuna.Omwaalu wo vanyasha ve hena oilonga, inava longwa, veli moluhepo, ile va taalelwa komashongo ngaashi HIV noAIDS, Oukolwe, noingangamwifi, omahepekafano, omalidipao osho shimwe shaninga oshitetekelifi shaava ve li hole mwene nota va kongo shavo shomondjato yavo vene, yokaume, oshoyo ova shivikile vavo mounyuni wonena.

Pexulilo apa onda hala ashike ovanyasha veli honge noudinini nelitulemo, opo ashike hatu kala twa manguluka mo momake onaku li hola mwene. Elongo olo ashike tali dulu oku tu mangulula moluhepo, oshoyo momikifi.Elongo otali dulu oku idila omivelo do dolongo kovanyasha vetu. Efimbo le lilongo onena!

*Lasarus Nhgifindwako Hakwaake omunambelewa omukulunhu wovanyasha kOuministeli wOvanyasha, Oikwashiwana, Omaudano nOmifyuululwakalo mendiki lovanyasha mEenhana, mOhangwena. Aa omadilaadilo a ye mwene ndee inaadja koministeli oku halongo.

LEAVE A REPLY

Please enter your comment!
Please enter your name here