Peter ondume yomomufitu

0
314

Ehokololo ota li tsikile

Ondjila okuza kEenghala sigo okOmakondo

Otwa ende kolupadhi okuza mEenghala twa pitile mOndjaba yalala, moka twa pitula John , tatu piti mOhalushu,Okatope, Ohaukelo nEtomba moka twa lala uusiku wumwe omanga inaatu tsikila okuya kEhoma.

Ethimbo twa ende pOndobe otwa li tu uvite omahauto gaakwiita ya South Africa taga ndunduma ga gama lwokuuzilo wetu. Pethimbo ndyoka otwa li tuna uumbanda kutya pamwe mbaka ngele oya mono oompadhi dhetu otashi vulika yetu landule.

Omanga tu li mondjila okuya kEhoma, John okwa li a eta ethaneko kutya oshaanawa tweethe okutsikila ondjila yetu oshoka okwa li a tila kutya  aakolonyeki ya South Africa otashi vulika yetu kwatepo.

Ngele nee itatu ethapo olweendo lwetu ,John okwa thaneke ishewe opo tu itopole  moongundu mbali opo anuwa tu yande okumonikwa kwaamboka ya li haya longele kumwe naakolonyeki unene momikunda moka twali tuna okupitila.

Atuhe otwa li twa ekelehi edhiladhilo ndyoka no twe mu londodha opo kee li ete we monakuyiwa. Molwashoka otwa li tu shishi kutya pethimbo ndyoka aantu poshilongo shetu oya adhika ya tseya kutya otwa taaguluka. Otwa tokola opo kaatu pitike, John a shune kegumbo.

Peha lyo ku mweetha otwe mu kumagidha oshowo otwe mu londodha  kutya ngele okwa kambadhala okufadhuka po noku shuna tse otatu mu kwata etatu mu dhipaga.Kakele ka John na Amukwaya mboka ya li yena oombele ooshona tse yalwe kehe gumwe okwa li ena  omwele gwOshiwambo omule. Oshoka tse atuhe kakele ka John oye awike a li a hala okushuna kegumbo, Sam na  ngame otwa uvathana kutya otatu dhipaga John ndele etatu mu fumvike miihwa moka twali tatu ende. Ngame onda li nda tokola kutya otandi mu tsu nomwele okuza kombunda. Nonando otwa li twe mu londodha, John ina uvako okwa li a kambadhala okufadhukapo okushuna kegumbo. Monkambadhala ndjika opwa ka holoka ehilathano pokati ke na Sam. Olugodhi ndoka olwa ka mwena ashike konima sho ngame nde ya hangukununa na John okwa uvaneke kutya ita ka kambadhala we oku shuna kegumbo ti iyaka.

John okwa li ena omukulukadhi gwomukwawo a hokanwa momukunda Ehoma ha ithanwa meme Selma. John okwa li atsakanene naakondjelimanguluko pomukunda nguka omanga a li metalelopo maandjawo ya meme Selma nomusamane gwe.Konima yoku fatululila Selma kutya tse otatu kongo aakondjelimanguluko opo yetu fale koAngola. Okwe tu lombwele kutya aakwiita yo PLAN oya ningi esiku yeendepo pomukunda mpoka. Ndele okwa li etu kwashilipaleke kutya ita ya kala inaa ya endapo mpoka ethimbo kehe oshoka ngele taya ende ihaya tseyitha kutya opo yuuka mpaka.

Konima omusamane gwa Selma okwe tu hokololele kutya okwa uva omahokololo kutya aakwiita yekondjelomanguluko oya li taya inyenge pEeshoke omukunda guli popepi nEhoma.Okwa li ena einekelo kutya otatu vulu oku ya mona mbala. Ihe nando ongaaka omusamane nguka okwe tu kumagidha opo tu kale twa kotoka oshoka omatanga gaakolonyeki ohaga kala taga inyenge momikunda ndhoka ethimbo olindji. Onkene okwa ti oshaanawa opo tu kale hatu uhala twa holama miihwa opo owala tatu zimo ngele kwa luudha..

Pehoma otwa ningipo konyala oshiwike shimwe omanga inaatu ya kOmakondo omukunda ngoka gwa landulako, hoka oko kwa monikile aakondjelimanguluko. Omanga twa li twa holama miihwa esiku limwe, John okwa kambadhala oku tu iyaka a shune kegumbo. Okwe shi ningi etu fundju a ti, ota ka ya kondje miihwa, noku za mpoka okwa fadhukapo.Otwa mono kutya okwa uka ombinga yokuuninginino, tse otwe mu landula etatu mu adha, sho etu mono okwa li  ahala oku tu holama ndele otwe mu kwata nokumu hilamo mehala moka a li, otwe mu dhenge nawa nawa etatu mu londodha ishewe kutya ngele okwa kambadhala oku fadhukapo ishewe otashi ke mu pula omwenyo gwe Uusiku mboka manga inaatu thigapo Ehoma John okwe tu iyaka manga twa kotha maandja meme Selma no inaatu mu mona we. Okufadhukapo kwe okwe tu etele omaipulo oshoka otwa kala twa tila kutya ote ke tu lopota kaa kwiita yaakolonyeki eta ye tu landula ngiika.Konima sho inaatu vula okumu landula noku mu mona otwa tokola tu tsikile ondjila yetu.

Eshongo limwe ndyoka twa li tuna onkene twa li tuna okweenda oku ipopya kaakalimo yomomikunda ndhoka , mboka oyo ya li ye na oku tu palutha noku tu pa iikulya oshowo oku tu kwatha opo tu ye mekwatathano naakondjelimanguluko.Omolwa eshongo ndika Amukwaya nenge ngaashi a tseyika miita Shikwetepo okwa thaneke kutya natu pule omayele komusamane gwa meme Selma, nkene tuna okulonga omanga tuli molweendo lwetu nduka.

Omusamane okwe tu kwatha unene tuu sho a zimine oku tu thindikila kOmakondo hoka a li te ke tu tseyithila mwene gwomukunda. Mondjila yetu okuya kOmakondo omusamane nguka okwa kala te tu hokololele nkene a li a fuulwa komaihumbato gaakwiita yo SWAPO nkene mbaka haya kala mekwatathano  naakwashigwana momikunda, a fuuka koondjembo dhawo oshowo keholokepo lyawo.

Okwe tu hokololele wo omaumbathano ngoka ga ningililwe pomikunda dhawo sho aakwiita yo PLAN ya kondjo naamboka ya South Africa.Okwa ti olugodhi olwali lwa pupyala ngaaka kutya aakwashigwana oyendji oya li ya thigipo manga omagumbo  gawo ya ka holame.Shika oye ndji okwa li ye shi ningi omolwashoka omakakunya oga li taga tilitha aanamukunda.

Oshinano pokati kEhoma nOmakondo nando osha li oshile shika inatu shi uva oshoka omahokololo ngoka oga li taga hili omuntu oku ga pulakena.Otwa thiki mOmakondo omanga etango inaali yamo.

Omuthindikili gwetu okwe tu tseyithile omukulukadhi gwa mwene gomukunda.Okwe mu lombwele kutya otse oolye na omolwashike  tweya uuyenda. Nonando omukulukadhi okwa li a gama komadhiladhilo getu okwe tu lombwele tu tegelele omusamane gwe, ngoka tashi vulika ta  kala ena ontseyo kutya aakondjelimanguluko otashi vulika ya kale ya gama peni nenge otaya endepo uunake pomukunda mpoka.Manga etango inaali ningina ye mwene gwomukunda okwe ya ta hingi oongombe dhe. Okwa li omulumentu gwoshipapa sholutu ye ota monika a fa omugeentu ngele opo to mu tsakaneke lwotango.

Okwe tu popitha noku tu pula kutya otse oolye na otatu kongo shike megumbo.Kuume ke omusamane ngoka etu thindikile maandjawo okwe mu tokelitha noku mu fatululila kutya otse oolye na otatu kongo shike.konima yaashika okwe tu kwashilipaleke kutya natse ote tu kwatha nawa ngaashi ashike   a kala noku kwatha aakwiita yekondjelomanguluko mboka ya kala noku pita pegumbo lye.

Mwene gwomukunda okwe tu lombwele tu kale twa kotoka omolwa onkalo yopomukunda ngoka .Okwa ti omainyengo getu naga kale omashona. Oshikwawo” Ngele opena aantu ta ye mu pula kutya  otamu kongo shike muka , ya lombweleni kutya ne otamu kongo iimuna yeni.Ndele ina mu tya otamu kongo SWAPO.”

“Owu na okuthiga aamati  mbaka mpaka oshoka onda tegelela aakwiita yo PLAN opo ya endepo ongula nenge esiku lya landula.Ohaya ende mpaka aluhe onkene aamati ina ya pumbwa oku kala yena uumbanda washa.’Konima mwene gwomukunda okwa indile omusamane gwa meme Selma opo na ye a lale maandjawo unene tuu sho kwa li kuna omilema. Omuthindikili gwetu okwa zimine opo a lale maandja  mwene gwomukunda ihe okwa ti ota ka meneka ongula onene opo a ka piithe iimuna ye. Ongulohi ndjoka omukulukadhi gwa mwene gwomukunda okwa teleke oshithima oshinene tashi liwa nomahini.

Konima yokulya otwa pandula omukulukadhi gwa mwene gwomukunda omolwa uulalelo, na otwe mu indile e tu pe eyemele opo tu ka teke omeya oshoka otwa ningi omasiku ogendji inaatu iyoga.

LEAVE A REPLY

Please enter your comment!
Please enter your name here