Peter ondume yomomufitu Ehokololo otali tsikile

0
278

 

Etsakaneno lyotango naakwiita yoPLAN

 

Uusiku esiku ndyoka owali wa ende nawa oshoka otwali twa nyanyukwa molwa ondjuulukwe okutsakaneka aakondjelimanguluko mbala ngaashi tashi vulika. Otwa thiki pOmakondo mEtitano. Opo mOsoondaha komatango mwene gwomukunda okwe ya pondunda yetu noku tu tseyithila kutya natu longele iinima yetu oshoka aakwiita yokakulumbwati oye tu tegelela kooha dhokuti. “Yamati landuliindje, aakwiita oye mu tegelela hwiyaka oshoka ngele inamu endelela otashi vulika mu adhe yaya” osho mwene gwomukunda a popi nenyanyu. No inaatu tya nando osha otwa manga mbala iinima yetu nokulandula mwene gwomukunda pondje yegumbo. Sho twa hedha popepi niihwa mpoka pwali aakwiita onda li tandi ipula muule ngele aantu mboka tatu yi kuyo aakwiita shili yekondjelomanguluko nenge pamwe mbaka aakwiita ya South Africa. Omanga tandi dhiladhila ngaaka omukwiita gumwe okwa holoka a zi konima yomuti gumwe omunene guli kooha dhokuti. Okwa li a zala omuzalo gwoshikwiita omuziza gwa luudha, ondjembo ye noongaku dhe odha yooloka kwaandhoka dhaakwiita ya South Africa onkene nguka otashi vulika a kale omukwiita gwoSWAPO ngaashi mwene gwomukunda etu lombwele.” Muuhalapo yamwameme,’ osho omukwiita etu popitha.

 

Shono twe mu landula onda koneke  oongundu dhaakwiita yemanguluko dha kuutumba muungundu uushona miihwa. Aakwiita mbaka oya ulike, na oya li taya holoka yuudha enyanyu ya li taya popi yo taya shendjula ethimbo alihe. Kutse ndika olya li esiku ndyoka twa kala twa tegelela. Aakwiita oye tu fala pomuti gumwe omunene mpoka twa ka joinwa kaakwiita ishewe yeli yatatu. Gumwe gwomwaamboka yatatu oye a li omugandji gwomalombwelo gwongundu ndjoka, ye okwe tu minike omanga ooyakwawo taya ningi omashendjo ta ye tu pula ngele otwi ilongekidha ngaaka oku ya joina, tse notwa yamukula kutya eeno otwi ilongekidha lela oku ya joina.

 

Konima otwa pulwa omapulo okuza kaakwiita. Omugandjimalombwelo okwa li a hala okuuva kutya otatu zi peni, otwa li tatu kongo shike, momudhingoloko ngoka, nkene twa thiki momudhingoloko ngoka nepulo lya simana oondyoka ngele tse ka twali twa tumwa koombulu opo tu ya ndaadhe?Konima sho nda yamukula omapulo agehe pehala lyayakwetu, Komanda okwe tu pandula sho twa kutha etokolo lyomondjila oku ya tu joine oPLAN. Okwe tu lombwele kutya iita yoku kondjitha uukoloni oyuudha omainda ogendji , ihe nando ongaaka ngaka  yo oyi ilongekidha okuga taaguluka.Okwe tu kwashilipaleke kutya oondjembo dhetu odhe tu tegelela moAngola na okwe tu tegelela opo tu galukile koNamibia oku ya tu dhenge Oombulu. Manga Kommanda a li ta popi natse omukwiita gumwe okwe mu yi melaka a ti yamwe yomutse otaya ka pewa oobazooka noorebeka [ondjembo yomashina ya tseyika nawa miita yemanguluko], manga a li ta ulike kungame na Amukwaya.

Konima Kommanda okwe tu indile atuhe opo tu gume kondjembo yo AK-47, etu pula ye ta shendjula ngele otwi ilongekidha tuu oku dhipaga oombulu tse otwa yamukula ishewe kutya eeno tse otwi ilongekidha.Okuguma ondjembo yo AK-47 oshali oshinima tashi hala okulilitha omuntu. Tse otwa li twa nyanyukwa kwaashoka twa gumu nokwaashoka twa mono. Konima yoku tu pula omapulo  Kommanda okwe tu  fala miihwa ya thita moka twaadha aakwashigwana ooyakwetu yeli lwopomathele gaali. Naambaka oya li yiilongekidha oku ka joina aakwiita yoPLAN . Mokumona ongundu onene yaantu yithike mpoka osha pendutha ehalo lyandje oku endelela mbala oku ya moAngola  ndika tale o AK-47 yandje .

 

Shono kwa luudha kashona Kommanda okwa thikama noku tu popitha a ti natu pulakene nawa kwaashoka tati. Kommanda okwa li a thikama mokati ketu nokutu lombwela tu pulakene nawa kwaashoka ena okutya.

Tango okwe tu pandula shono twa ningi etokolo okuya okujoina SWAPO moAngola opo tu ka mangulule oshilongo.Okwa tsikile a ti molwashoka ongundu onene unene, ndjika otayi ka topolwa moongundu ndatu ooshona. Kommanda ngoka edhina lye lyomiita lyali Haidenga okwe tu kumagidha opo tu vulike  komalombwelo ge nokwe tu kwashilipaleke kutya aakwiita ye otaye ke tu thikitha nombili moAngola.

Pethimbo ndyoka kommanda okwa igidha a ti “ Otuna ooholo dhagwana okuhanagulapo Oombulu. Omwa mona oobazooka, noondjembo dhomashina oshowo iikondjitho yilwe mbyoka ya humbatwa ketanga ndika”Ngele oombulu odhe tu hindi tse otatu kedhi fumvika nomwenyo , nadhi tu lole utale. Odhi shishi kutya oondjembo dhetu ohadhi kungu omulilo,’

Konima yokusimaneka nokutula aakwiita ye ketuni Kommanda okwa gandja elombwelo kutya napa ningwe omikweyo dhili ndatu meendelelo. Okwa pula aakwiita ya topole ongundu yaantu moongundu ndatu ooshona dhi thike pamwe momiyalu dhaakadhona aamati aanona noshowo aakuluntu.

Konima sho oongundu ndhika dha topolwa otwa lombwelwa opo tu ninge omikweyo melandulathano twa taalela uuzilombangalantu. Pethimbo ndyoka onda li ndina uumbanda kutya osheendo shandje pamwe otashi ka topagulwa. Ihe otwa li nelago oshoka Junias oye awike inaa kala we oshilyo shomukweyo nongundu yetu ndele ayehe yalwe mboka twa li mosheendo otwa tulwa mongundu yimwe ndjika, onkene ngame, Sam, na Amukwaya otwa li tatu vulu okutsikila noku kundathana  oshindji molweendo lwetu okutaaguluka omakuti. Omanga twali tatu yi momikweyo aakwiita yamwe oya li taya ende nomikweyo ndhoka taye tu lombwele nkene tuna oku ihumbata molweendo lwetu okuya muundjendi.

“Ngele owu uvu kwatiwa holama owu na okulala egombe ngoye ino pitikwa nando okutya sha tuu nande olweendo aluhe, ngele owa pumbwa okuya kiihwa owuna oku indila opo tu thikame. Ino teya iitayi yiihwa nuuna twa ti thikama, thikama meendelelo no itoo kudhile nenge to popi” osho aakwiita mboka yaali ya lombwele aantu.

Omalongekidho gomikweyo oga kutha konyala uule wotundi yimwe oshoka okutula aanona mokati kaakuluntu okwa kutha ethimbo. Pehala mpoka twa li twa gongala nokutulwa momikweyo otwe li thigipo potundi konyala ontimulongo yuusiku twa ende tuuka uumbangalantu momikweyo dhili ndatu. Okugamena ongundu onene yithike mpoka oshali oshinakugwanithwa oshidhigu noshinene kaakwiita mboka. Konima sho twa ende konyala ookilometa heyali otwa lombwelwa tu thikame po manga. Opo konima aakwiita oyetu lombwele opo tu inyenge kashona okuza momikweyo dhetu  tu longekidhe omahala getu gokulala.

Olweendo lwetu, olwetu pititha mokuti kwa thita muna iilikama niikwakuti yilwe ngaashi oonkoshi, oongwe niilikama yilwe ya nika oshiponga. Pethimbo ndika opo nda ka ndhindhilika kutya nani aakwiita mboka yetu landula oyendji ye vule mboka ya li putse pethimbo ta tu tulwa momikweyo. Manga tatu kongo Omahala getu goku lala yo aakwiita oya li taya longekidha opo ya  wa pe okutu gamena. Ngame nando onda li nda sa ondjala onda li ndu uvite nawa oshoka ondili megameno lyaakwiita ayehe mboka. Molwashoka aakwashigwana yamwe kaya li yena iikumbatha mboka ya li ye na oya indilwa opo ya pe yakwawo ya vule oku igamena kuutalala, naashika osha ulike nale etameko lyuuhailwa mokati koshigwana.

Yamwe yomutse oya li ya tokola opo kaa ya kothe uusiku mboka ya hogolola oku kala yeegamena koondjato dhawo nenge komakota gomiti. Potundi ontine yongula onene aakwiita oyetu pendula opo tu ilongekidhe okutsikila ondjila yetu.Otwa ende tuuka muumbangalantu zilo moongundu dhetu ndatu. Molweendo lwetu onda koneke omwaalu omunene gwaakwiita ya homata lela tagu dhingoloka nomikweyo dhetu mbaka oya fuula ndje unene na onda li nda pula omukwiita gumwe opo ndi humbateko koshikuti shimwe shobazooka. Nguka okwe shi pendje eta londodha ndje kutya ina ndi shi ethela nando opevi. Potundi ontimugoyi otwa uvu omundundumo gwondhila konima yetu.

Ondhila ndjoka oye ya popepi natse na oya tuka kombanda yetu opo mpoka akwiita oye tu lombwele opo tu holame sho twa holama ondhila oya  tuka kombanda yetu iikando ine naakwiita yamwe okonyala ya vulwemo moonkandja, omanga inaaya umba yo ondhila oya tuka yuuka uuzilo no inaa yi galuka we.

Konima yokathimbo otwa lombwelwa opo tu tsikile olweendo lwetu tuuka uumbangalantuzilo. Sho tatu ende omwaalu gwaakwiita ogwa kala tagu ningi omushona  opo ihe otwa ka tseyithilwa kutya aakwiita mbaka oya kala monima okutu gamena oshoka pamwe ngiika oombulu odha li tadhi tu landula kolupadhi. Ethimbo limwe otwa li twa lombwelwa opo tu nyanyemo oshoka okwa li kwa dhiladhilwa kutya aatondi oye tu landula. Sho twa tsikile onkala oya hwepopala na otwa mono kutya aakwiita mboka ya li ya nena po sho ondhila ya li tayi tuka oya galuka.

 

LEAVE A REPLY

Please enter your comment!
Please enter your name here