Aahikingalo ya ulike uunongo wawo moPolytechnic

0
224

WINDHOEK-Yamwepo yomaahikingalo aaNamibia, oya li ya ulike uunongo wawo nokunyanyudha engathithi lyaatali moshiputudhilo shopombanda, shoPolytechnic  ya Namibia, ongulohi yEtitano lyaziko.

Oyendji mboka yali ya nyanyudhwa omwakwatelwa aanasikola ya yoolokathana yaza komanongelo galwe oshowo mboka yomoPolytechnic, naakwashigwana aakalimo yomoshilandopangelo.

Aahikingalo oyendji aashona naamboka yena omadhina gopombanda oyali ya ulike italenti yawo mokunyanyudha oshituthi shika kwali  shanuninwa  etaambo lyaanasikola yomenongelo ndika konima sho mbaka ya galuka mefudho lyopehulilo lyomumvo.

Oshiindingili shika oshowo sha ulike kutya osikola oya Tameka nomulongwa kehe okuna okumanga sha kola opo a pite iilongwa ye a vule oku ka longela oshigwana she okushi fala komeho.

Ongundu yaahikingalo aanyasha yoAma Daz Floor oyo yimwepo yali yanyanyudha noonkondo sho ya imbi oongalo dhawo Ndatu nokundaanisa kwawo okuwaanawa.

Ama Daz Floor oyali ya tameke nokangalo Eduwa, hoka taka popi monkalo moka yaza manga yali aashona ngaashi okudhana Odule, nuudhano uukwawo wOshiwambo mwakwatelwa Omauma. Oya imbi ishewe ongalo Jonny, osho woo Omilema, ndhoka dhali dhanyanyudha noonkondo.

Enzuna Freeda olyo ishewe limwe lyali lina aandanisi dhingi noyali ya tokola omahuli unene sho Freeda ali a imbi ongalo Boom Boom, eta ndaanisa pamwe nayo.

Omuhikingalo omunene Gazza okwali a edhileko komainyanyudho ngaka noku imba oongalo dhe Ndatu, mwakwatelwa Shuna Monima, Chaka Dimaz naKashuushuka, moka aatali oyendji ya li yi izizima noku imba pamwe naye.  Omainyanyudho ngaka oga endele nawa noonkondo.

LEAVE A REPLY

Please enter your comment!
Please enter your name here