Omalenga mOndonga ga fatululikwa ooveta

0
257

KuMaria Namupala

ONDANGWA – Elelo lyopamuthigululwakalo lyaNdonga olyali lya ningi oshigongi oshiwike sha piti, mono lyali lya ithana nolya tsakanene nomalenga, agehe, ooyene yomikunda, ooyene yiikandjo oshowo aalelwa yawo. Oshigongi shika oshali sha ningilwa poombelewa dhoshilongo shaNdonga mono nomukwaniilwa gwaNdonga tatekulu  Immanuel Kauluma Elifas, nomupeha gwe Fillemon Shuumbwa Nangolo omo ya li.

Konyala iikandjo ayihe yomelelo lyaNdonga oyali ya kalelwapo esiku ndyoka. Amushanga gwelelo lyOndonga tatekulu Josef Simaneka Asino okwali a kunkilile aakwashigwana ya simaneke ooveta dhoshilongo,yo yi iyuthe kudho ngaashi dha tulwapo.

Asino okwali woo a fatulula dhimwe dhomooveta, ta tseyitha kutya aluhe omuntu ngele owa taaguluka nenge wa yono oveta oho pewa egeelo noshilanduli shoye molwa eyono ndyoka wa ningi.

“Ngaashi omukulu gwonale ha tumbula kutya oshitunda nohedhi,oshilongo nomukalo gwasho oshowo natse melelo lyetu otuna mo oompango dhetu ndhono dha pumbwa kusimanekwa, ngaashi omuntu ngele okwa yono nena oha futithwa ,ha tulwa mondholongo,ha kuthwa uuthemba wokupangela ngele omuleli nenge a silwe ohenda uuna tashi vulika,” tatekulu Asino tati ngaa.

Tonata Ngulu okwali a yelitha kutya  ehalo lyawo ando opo omikunda adhihe mOndonga dhi kale dha langekwa ,dho dhi pewe ooyene mboka yedhi nuninwa komukwaniilwa ya yakule aashitwa mboka yelimo, no ku ya kwathela pomukalo ngoka ta vulu opo momikunda mwaakale omavundakano mo mu kale elongelokumwe mokati kaakwashigwana ayehe. Tati omikunda ka dhishi dhuukwazimo ano ihadhi thigululwa.

Ooyene yomikunda oyali ya kumagidhwa opo ya longele kumwe naalelwa yawo,yo ya kale taya talelepo omagumbo ngoka geli momikunda dhawo no ku tala nkene aantu yawo taya hupu,oshoka okwa konekiwa anuwa ooyene yomikunda dhimwe haya kala owala momagumbo no inaya hala ku enda omagumbo gaalelwa yawo nuuna pweya omaudhigu inaya hala ku kwathela.

Moshigongi omwali woo mwa kundathanwa kombinga yoondjembo,opo kehe ngoka ena ondjembo eyi kwate nawa dho dhi kale aluhe dhili megameno opo kaa dhi dhanwe dho dhi ete iiponga inaayi tegelelwa. Ta ku indilwa mboka taya ningi oondhalate shaali papitikilo yeshi hulithepo yo ya pule uuthemba kooyene yomikunda dhawo.

Aakwashigwana mboka yali ya holoka moshigongi oyali ya mono ompito yokupula omapulo ngono gali taga yamukulwa,nomolwaasho aantu oyali oyendji noonkondo omapulo gamwe ogali ga hupuko,nombelewa yelelo oyati oya longekidha ku kale iigongi itatu momvula opo aakwashigwana ya gandje omakemo oshowo omikundu nomadhiladhilo gawo,yo ombelewa yoshilongo yi kale yishi shoka tashi inyenge momikunda.

 

LEAVE A REPLY

Please enter your comment!
Please enter your name here