Uundjugo wAangenga wa patululwa pambelewa

0
227

KuMaria Namupala

OKATYALI – Uundjugo mboka wa tungwa pOmukunda Ongenga osho wa gandjwa kooyene mboka yewu nuninwa pambelewa. Uundjugo mbuno owali wa gandjwa kooyene metitano lya sha ningilwa pOngenga mpoka.

Omukunda Ongenga oguna omagumbo geli 125, mono omagumbo omilongo ntano nagatatu (53)  lwaampoka gali ga monono ompito opo ga tungilwe uundjugo.

Uundjugo mbuno owali wa tungwa mewatelo lyUuministeli wUunamapya moshikondo sheyandjakaneko negandjo lyomeya momikunda.

Omunambelewa omukuluntu mUuministeli mbuka koshikondo sheyandjaneko lyomeya, oshowo ekalekopo lyuundjolowele moshitopolwa shaShana, Pataka  Justinus okwali eshi popi kutya Uuministeli wawo owali wa tokola wu tungile aanatu mboka yeli miitopolwa yokomikunda,opo ya kale yena uundjolowele yo ya kalekepo uuyogoki mokati kaantu.

“Okwa konekiwa kutya aantu oyendji momikunda nomomagumbo kayena uundjugo,noyendji ohaya longitha iihwa uuna ya pumbwa oku kiikwathela, naashino osha nika oshiponga kaakalimo yomomikunda,otwali twa tokola tu ninge omalolelo gotango tse tu tale kutya otatu shi enditha ngiini,” Pataka tati ngaaka.

Pataka okwali woo a holola kutya oyali ya hogolola oshikandjohogololo Okatyali omo ya ningile omalolelo guundjugo,yo ya tsikile komeho niikandjohogololo yilwe mOshana. ‘ Otuna edhiladhilo opo ku tungilwe uundjugo omagumbo geli 500 kehe moshitopolwa, mono ya gandja uuthemba kooyene yomikunda oshowo kookansela ya tale aanamikunda yawo mboka yeli mompumbwe yuundjugo,yo ya tulwe momisholondondo lyo epangelo li tungithe uundjugo mboka mbala,” ta gwedhapo ngaaka.

Omunambelewa a kalelapo uuministeli wUunamapya moshikandjohogololo Okatyali, Hilda Shiimi okwati okwali a ende noshikandjohogololo,nokwa mono kutya aantu oyendji mboka ya pumbwa uundjugo oyo mboka yomomukunda Ongenga. Shiimi tati uundjugo owa tungwa koshimaliwa shomilliona 1.2, mbyono ta ti oyazi moshiketha shepangelo.

Shiimi ta londodha ooyene yuundjugo yewu longithe nawa yo ya kale aluhe haye wu opaleke,yo taya kalekepo uuyogoki. Okwe ya indile woo ya kale taya yogo omake gawo konima yokulongitha okandjugo nomanga inaaya tameka okulongitha noku longekidha iikulya yawo.

Aanamukunda oyendji oyali ya nyanyukwa noonkondo. Mwene gwomukunda Ongenga ngono naye oye a tungilwa okandjugo Petrus Elago Shikongo okwati okwa pandula sho a tungilwa okandjugo,ta indile woo mboka ya hupako inaaya tungilwa kaaya kale yena oomwenyo oombwiinayi opo ya kale metegelelo kutya nayo otaya ka tungilwa uundjugo methimbo efupi.

Jesaya Shikongo naye okwa tungilwa okandjugo,tati kali nande ena okandjugo megumbo lye ihe okwa pandula unene no ku uvite etumba mo ku mona ompito yokutungilwa okandjugo haka. Ta pandula woo kansela gwawo Joseph Mupetami ngono ta kondjo nokulongela aantu ye uuwanawa.

LEAVE A REPLY

Please enter your comment!
Please enter your name here