Ongeleka yandje kali na mo sha meso lyaSimon

0
396

ONGWEDIVA – Ngoka iihokolola kutya oye omukuluntu gwongeleka yoPentecostal mEenhana mpoka pwali pwa sile omuntu gumwe iiwike iyali ya piti okwa ti egongalo lye kalina mo sha moshinima shoka.

Omwedhi gwaziko omulumentu gwoomvula 54 gwokomukunda Etambo, moshikandjohogololo Epembe moshitopolwa shaHangwena okwali a hulithile molugumbo lwongeleka yedhina House of Liberty Prophet Ministry moka a li aningi omasiku ta galikanenwa.

Omulumentu ngoka inahala oku popya edhina lye ashike okwa lombwele Kundana pangodhi kutya oye omusita gwoneleka ndjoka, okwa ti nakusa Martin Simon okwali ena uupyakadhi wokugulu taku alukwa na okwali ta endele komampango.

Ta ti Etitano ndjoka a tsakanene nakusa lwotango, nakusa okwali a ende pamwe nomukulukadhi oshowo okatekulumati kawo.

Ta ti nonande mbaka oya adha ethimbo lyomagalikano lyapwa uusiku mboka, mbaka oya pula opo ya galikanenwe, nokuza pomagalikano Simon okwa kala ta ende kuye mwene, no inaa longitha we empango sigo Ometiyali lyoshiwike sha landula moka a mana oondjenda. Okuza Etitano, sigo Etiyali nakusa Simon anuwa okwa kala owala ha lala motenda ndjoka a dhiki molugumbo lwongeleka ndjoka.

Oshiwike sha ziko, Kundana okwa kundaneke kutya pastoli ngoka a ilikanene Simon oye Leonard Nakanyala, ashike, sho koshifo shika sha kambadhala oku ya naye moonkundathana pangodhi omulumentu ngoka tiiyithana kutya oye pastoli okwiipatana thiluthilu nokapopi nengeyo kutya ye haye Leonard Nakanyala.  Ta lombwele Kundana kutya Leonard Nakanyala omusita gwokeleka yimwe yiili, na okwa geya sho edhina lye lya longithwa moshifo.

Ashike mepeko lyopolisi otamu ulike Leonard Nakanyala na Jeremia Nakanyala ngoka iiholola kutya oye amushanga wegongalo, oyo aakomeho mongeleka ndyoka, na oyo ya li ya pulwapulwa kopolisi shinasha neso lyomulumentu nguka.

Pethimbo Kundana a kambadhala oku popya na pastoli, Jeremia Nakanyala okwa kutha ko ongodhi kwaangoka ta ti oye pastoli eta popi nongeyo, ta lundile Kundana kutya ina simaneka omumati gwaKalunga sho ta popi naye mongodhi.

“Kundana kena esimaneko na tate gwetu kaya. Oshike ena okupopya naye mongodhi pe hala lyokuya kongeleka eta popi naye? Pastoli okwati kutya ye pongeleka ye iha pu kempingwa [ningwa omasiku kaantu ya lala mootenda], ashike oha pu lalwa kwaamboka yeya komagalikano uuna oshiwike shomagalikano sha thika.

Konima pastoli okwa popi naKundana ta ti; “Nakusa Martin Simon okwali gumwe gwomwaamboka yeya komagalikano ashike sho eya okwati okuna uupyakadhi nokugulu kwe oshoka okweya po pongeleka ta endele komampango. Ngame onde mu galikanena mEtitano moka, ashike mOlyomakaya kandali po,” pastoli ta ti.

Ta ti nonando a lombwela Simon nofamili opo a ndola yaka konge ekwatho lyuunamiti kOshipangelo, mbaka oya tindi noya tokola oku kala pongeleka.

“Onde ya lombwele andola ya ye koshipangelo aka pangwe palutu, shaashi kongeleka tse ohatu gandja owala epango lyokomwenyo nenge lyopambepo, oshipangelo osho hashi panga palutu,” omusita ta fatulula.

Pastoli okwa tsikileko kutya aniwa ye moMaandaha okwa galikanena Simon ihe okwali ta ende kena omampango kwali ngeno ta ulike iizemo yili nawa.

“MEtiyali ngame kandali po onda yi kOndangwa, ashike lwokomatango onda dhengelwa ongodhi kutya Simon okwa hulitha, ondeya kongeleka na otwa yi konopolisi. Sho epeko lyopolisi lya paululwa onda gandja okatse kandje,” ati ngaaka.

Ashike mboka yeshi nawa ongeleka ndjika oya ti kutya yo oya mona po aantu oyendji pongeleka mpoka yena omauvu gi ii nogi ili unene ngaa yoshintona, ombanda noshowo iitumba ta ye ya nelalakano ya aaludhwe. Ashike Nakanyala okwati yo oha aaludha aantu pambepo omanga kolutu teya lombwele ya ka pangwe koshipangelo.

LEAVE A REPLY

Please enter your comment!
Please enter your name here