Peter ondume yomomufitu : Etsikilo lyondjila okuya koshitopolwa shaKunene

0
278

Konima yuulalelo oshowo okupulakena omaimbilo gekondjelomanguluko otwa kalala.Pethimbo tatu ilongekidhile okukotha aakwiita oya kala taya patolola momudhingoloko okutu gamena uusiku auhe.

Ongula onene yontano otwa pendulwa nonande oyendji yomutse otwa li twa penduka nale twi ilongekidhila ondjila.Ohaluka otwa uvu elombwelo kutya natu ende tu ye .Otwa li twa lombwelwa opo tu tungepo omikweyo dhili mbali.Pethimbo ndyoka otwa li twa pitikwa okuhogolola momukweyo moka twa hala okweenda.

Okuza mpoka otwa ende tuuka muumbangalantu zilo.Molweendo lwetu aakwiita oya kala taya imbi omaimbilo gekondjelomanguluko. Omanga tatu ende ngaaka ngame onda pula omukwiita gumwe opo a pendje ondjembo ye yomashina yoludhi lwoRPK. Omukwiita ngoka ondjembo okwe yi pendje konima sho eyi kutha iikuti ayihe.Ihe nani ondjembo ndjoka oya li ondhigu, ndele ngame ondi idhidhimike okuyi humbata nando ongaaka oshoka kandali nda hala okuulika kutya itandi yi vulu lwa nawa.Ooyakwetu mosheendo shetu mboka ya mono sho nda humbata ondjembo oya hedha pungame opo ye  yi gume.Sho twa tsikile olweendo mwene gwondjembo okwe ya nokwa ti nandi yi mu shunine.Okwa pandula ndje molweitulomo lyandje okuhumbatako kondjembo ndjoka nokwa uvaneke kutya otaka lombwela kommanda opo ngame ndi pewe ondjembo yoludhi ndoka .

Lwopotundi 12h00 otwa thiki pehala lyotango lyokamba oshona ndjoka ya ulike yafa ehala lyokulongithwa pa ka thimbo molwashoka pehala mpoka kapwali pwa tungwa oondunda nomagumbo kakele kiilambo yokuholama mbyoka ya li yafulwa momudhingoloko gwokamba ndjoka yali mokati kokuti.Otwali twa lombwelwa opo tu kuutumbe kohi yomiti ominene.Otwa kala pehala mpoka konyala uule wetata lyesiku inaatu lya sha oshowo inaatu nwa sha.Omanga ashike etango inaali yamo otwa topolwa moongundu dhaantu omulongo kehe notwa falwa pehala mpoka twaadha iikulya ya thikama moshithima shepungu eshunga shaana omahoka.Oshithima osha li sha tulwa miitata yoondoloma ndhoka dha li dha tetwa pomakati.

Oshithima shika oshali shina omulyo omwiinayi shafa ashike sha telekithwa omahooli.Molwashoka otwa li twa sa ondjala yamwe yetu oyali ya kambadhala okumakelamo.Yamwe yomaantu mboka ya li mo moshithima oya tameke taya kungu.Yamwe oya tindi okulya mo moshithima shoka .Shika osho oshithima oshiwinayi shoka nda makela monkalamwenyo yandje.Epulo ndyoka nda  li ndina kombinga yoshithima shika oondika ngele pamwe shika osha longekidhwa ongo omukalo gwotango gwokutu longekidha omanga inaatu ka telekwa.Konyala oshithima shoka otwe shi etha inaatu shilya.Aakwiita oye tu kumike kutya natu makelemo shinene moshithima oshoka shika osho iikulya mbyoka yili po pethimbo ndyoka.Aakwiita oye tu kwashilipaleke kutya okwa li kwa tegelelwa iikulya  yili nawa ,ihe nee ololi ndjoka yali tayi eta iikulya oya tekele mondjila.

Manga etango inaali yamo  ishewe,otwa ithanwa tu gongale pehalandjandja mpoka Kommanda gwokamba ndjoka ha ithanwa  Mundilo etu lombwele kombinga yaashoka SWAPO a tegelela tse tu ihumbate, okwa ti kapena omuntu ta kondjitha mukwawo tatuku mukwawo.Oshikwawo  uufuthi oshowo okwaa vulika itaku idhidhimikilwa mokati kiilyo yoSwapo.

Okwa kumike woo mboka pamwe ya tumwa ku South Africa okundaadha SWAPO ya thikame yiipopye,oshoka ngele mbaka oya ka monikamo konale otaya ka longwa nayo pwaana henda.

Kommanda okwe tu lombwele wo kutya otatu ka topolwa moongundu ooshona okuza mesiku lya landula,no inee tu pa etompelo kutya omolwashike.Okwe tu lombwele kutya otatu ka tsikila nolweendo lwetu okuya koombelewa  oonene,hoka tatu ka londa moololi ndhoka tadhi ke tu fala kookamba hoka tatu ka dheulilwa uukwiita.Komanda okwetu kumagidha opo kaapa kale nando omuntu gumwe ta kudhile mokamba unene tuu mokati kuusiku.Atuhe otwa li twa nyanyukwa molwashoka otuli poku thika koshilalakanenwa shetu.Otwa li ashike twa hala okuya tuukilila kosikola yoku dheulilwa uukwiita. Konima yoku halakana okuza pehalandjandja mpoka twali twa popithwa ku Kommanda aakwiita yamwe oye tu fala komahala mpoka tuna oku kalala uusiku mboka.Ehala mpoka twali olya li mokati kokuti moka omuntu itoo vulu okumona nando omukweni ngele okwayi miihwa.

Oongaku dhandje oshowo ndhoka dhAmukwaya odha li dha guguka noonkondo onkene tse otwa li ashike tatu ende koompadhi dhowala.Okuza mpoka otwa ende konyala uule wootundi omugoyi opo konima otwa thiki ishewe pokamba oshona.Pokamba ndjoka otwa tulwa ishewe pehala limwe twa kundukidhwa komwaalu omunene gwaakwiita.Kongulohi yesiku ndyoka otwa pewa oshithima shepungu eshunga nonyama ya yothwa.Iikulya mbika kaya li ya gwana unene okutala kutya otwa ende esiku alihe inaatu lyasha.Ihe oshithima shika osha li sha telekwa nawa okuyelaka naashoka twa li twapewa pokamba  yotango.

Konima yuulaleo otwa lombwelwa tu vululukwe.Ihe ka twali twapewa omeya  goku iyoga.Otwa pula epitikilo opo tu falwe tu ka teke omeya.Otwa pewa aakwiita yane yetu fale kehala hoka kuna omeya.Hoka otwa adhako aantu oyendji yomokamba ndjika taya teke wo omeya gawo.Otwa teke omeya etatu yi miihwa moka twi iyogele omanga inaa tu shuna kontanda    yetu.

Otwa kala montanda ndjoka uule womasiku gaali inaatu tseya kutya uunake tatu zimo tuye hoka tuna okutumwa.Aakwiita yamwe mboka twa popi nayo oyati otatu  yi ishewe kokamba yimwe omanga inaatu thikithwa kokamba yoontauki yaCassinga.Otwa kala nokugalikana opo oololi ndhoka dhina okutu ila dhiye mbala oshoka otwali twa vulwa mo mehala ndyoka.

Mesiku etitano oololi odheya ihe ndhika odha li owala dhili mbali .Molwaashoka otwali otundji Kommanda okwa tokola opo aanona oyo ya ye tango manga tse aakuluntu twa thigalapo twa tegelela oololi dhilwe dhi thike opo dhi tu ile.

LEAVE A REPLY

Please enter your comment!
Please enter your name here