Pohamba otaka topola oomiliyiyona dhe naanasikola

0
325

WINDHOEK-Omuperesidende Hifikepunye Pohamba otaka topola ondjambi ye ndjoka a sindana naailongi aaNamibia mboka ya za momazimo gakala konima yesiga.

Omutse gwoshilongo ngoka tagu thigipo iilonga omwedhi nguka konima yokuwilika evi lyomapendafule uule womimvo omulongo ogwa sindana ondjambi yedhina Ibrahim Prize for Achievement in African Leadership yomumvo 2014.

Peresidende Pohamba okwa pewa ondjambi ndjika yongushu yoodola oomiliona 58 , omolwa etokolo lye okugandja elongo lyopondondo yoprimary itaali futilwa oshowo eidhidhimiko lye oku idhidhimikila aanapolitika ooyakwawo. Etompelo ekwawo oondyoka sho omuperesidende nguka tayi moshipundi shevululuko a kala wo ha kongo omayele okuza koongundu dhompilameno oshowo kaawiliki yomahangano gaashi gepangelo muule wewiliko lye lyomimvo omulongo.

Omuperesidende Pohamba okwa pewa epapa ndika pamushangwa gwa zi koMo Ibrahim Foundation omolwashoka okwa kala wo omwiifupipiki uule womimvo adhihe dhelelo lye.Okwa kala wo ta longo nuudhiginini okumangela kumwe oshigwana she mombepo yedhiminathanepo. Naambika oyo ya fuula okommittee ndjoka hayi hogolola omusindani.

Omuperesidende Pohamba okwa tseyithilwe oye omusindani gwepapa ndika lya dhikwapo komunangeshefa omvalele ya Sudan oshowo ya Britania Omundohotola Mohamed Ibrahim, ngoka a dhikilepo ondjambi ndjika omimvo hetatu dha piti.

Etseyitho lyesindano lya Pohamba olya ningilwe mo Nairobi sha Kenya Omaandaha oshiwike shika.

Omunashipundi sha Mo Ibrahim Foundation Omundohotola Salim Ahmed Salim okwa li a tseyithile Omuprima Minista Hage Geingob kutya Omuperesidende Pohamba oye omusindani gwepapa ndika.

Omusamane Pohamba okwa thigipo aawiliki ooyakwawo mboka yali momusholondondo gwokupewa oshishani shika, yo mbaka oyo Mwai Kibaki gwa Kenya , na Armando Guebuza ngoka a zi miilonga mo Mozambique.

Pohamba okwa ti ondjambi ndjika ote yi taambako pehala lyaaNamibia ayehe mboka oyo ya pitika opo a wilike mombili nomengunumano noku mu pethitha epapa ndika, lyali tali vulu okupewa aawiliki yalwe mboka ya li wo ya hogololwa okutalika ngele ota ye li pewa.

Okwa pandula woo omuniimaliwa nguka Mo Ibrahim molwesimaneko ndika.

Iimaliwa mbyoka yoomiliona dhoodola dha Namibia 58 otayi futwa Omuperesidende Pohamba uule womimvo omulongo, opo konima yaashika ota kala ta pewa oodola oomiliona mbali dha Namibia uule wonkalamwenyo ye ayihe.

Aasindani yalwe yepapa ndika okuza nkene lya dhikilwepo oyendji yomuyo oya za muumbugantu wAfrika, mokati kaambaka omuna nakusa Nelson Mandela South Africa, Joaquim Chissano Mozambique, Festus Mogae Botswana oshowo omuperesidende nale gwa Cape Verde , omusamane Pedro Pires.Omimvo ndatu dhapiti okommitte yokuhogolola aasindani kaya  li ya vulu okuhogolola omuwiliki omuAfrica ngoka ta vulu okusimanekwa mokupewa epapa ndika.

Ondjambi ndjika pahapu dha Mo Ibrahim Foundation otayi tyapula nokuyalula iilonga iiwanawa  mewiliko lyaawiliki yAfrica. Oshikwawo otayi kumike aawiliki opo ya longe nawa oku taaguluka omashongo ngoka ga taalela iilongo yawo, noku hwepopeka onkalamwenyo nomuthikankalamwenyo gwaantu yawo.

LEAVE A REPLY

Please enter your comment!
Please enter your name here