A lumatwa kondoongi

0
446

RUACANA-Omulumenhu umwe moshitukulwa sha Ruacana hanga a kanifa okwooko, ile nokuli omwenyo waye eshi a lumatwa nokumonifwa oshiponga kundongi.

Ota ku hokololwa kutya oshiponga eshi osha li shinene shaashi oshinamwenyo eshi osha mamula ko eenhumba adishe doshitukulwa shimwe shokwooko, ta shi fiye ekipa lili kombada.

Jackson Mwanyangapo weedula 45, oo eli omunailonga moRucana Vocational School, okwe li hanga mombete yoshipangelo, omo a kala a kambuka oule weevili donhumba eheshi apa eli omolwa molwaashi a kanifa ohonde ihapu neenghono nomolwa oyehame munene.

Nonande oondohotola va kendabala opo va hondjele ko onhumba oyo aishe yali ya mamulwa ko kondongi, Mwanyangapo ota hokolola kutya natango oku li mouyehame nokwooko kwaye okwa dinda neenghono.

Mwanyangapo ta hokolola kutya oshivike sha djako okwa li ta kendabala ngeno opo a tule eendoongi koshipululo, ye a ka pulule epya laye.

“Mbali domeendoongi eemhedi, omanga ei yonghadi ota i londwa. Eemhedi kadali deli hala ashike onda li nda hala ngeno opo ndi di tule ko adishe nhatu koshipululo, opo di longe noupu. Onda ka kendabala nee ngeno ndi lovelele ondoongo oyo ya li ya shiya kombinga ikwao, nelalakano ndii mange nawa. Ohaluka imwe yomhedi ei ya ama kwaame, oya mamula nge osho. Ondi wete kutya elalakano ka kwali lokulya nge ashike okwa li tai kendabala okulya ikwao, ndele mboli oya kwata ashike mokwooko kwange,” Mwanyangapo ta fatulula.

Mwanyangapo ta hokolola kutya konima eshi a mona oshiponga okwe lififida nokuya pokapangelo komoRuacana, ashike shaashi ka pali ta pa longo efiku olo okwa dengela opolifi opo i uye i mutwale koshipangelo kOutapi.

Ashike shaashi oshiponga osha li sha kula unene okwa kanifa ohonde ihapu neenghono, sha etaa fiyo ota kambuka.

“Konima yokudenga ongodi, onda kala po nda teelela ngeno opolifi i uye i twale nge koshipangelo, ashike, ina ndi mona va li eshi sha ningwa po, onde ke lihanga ashike nda nangala mombete yoshipangelo, ina ndi mona kutya onda ya mo ngahelipi,” Mwanyangapo ta yelifa.

LEAVE A REPLY

Please enter your comment!
Please enter your name here