Omupeviperesidende nOmuprimaminista ya tseyithwa

0
234

WINDHOEK-Omuhogololwa Peresidende, Dr. Hage Geingob okwa ulike Dr. Nickey Iyambo oye a ninge Omupeviperesidende gwaNamibia. Geingob okwa tseyitha shika poshigongi shiinkundaneki mEtitatu lyoshiwike shika moVenduka.

Pethimbo olyo tuu ndyoka Geingob okwa tseyithile wo oshigwana kutya Saara Kuugongelwa-Amadhila ngoka sigo oompaka oye Ominista Yiimaliwa, oye ta kala Omuprima minista mepangelo ndyoka tali ka ganena iilonga yalyo momasiku 21 gaMaalitsa nuumvo.

Omuhogololwa Peresidende Geingob okwa lombwele aatoolinkundana nokutya, okwe ya ithana eya tseyithile aawiliki yaali mboka ye a hogolola mokupewa omayele koohailwa ooyakwawo kutya oyo naya ninge gumwe Omupeviperesidende nomukwawo Ominista yotango.

Mokuulika Omupeviperesidende, Geingob okwa ti okwa hogolola omuwiliki ngoka ta kala noku mu pa omayele, oshowo okumu guna mombepo yopakuluntu. A hogolola omuwiliki ngoka ta kala noku mu pukulula itaa lile okathima koluko.

A ti omuwiliki nguka ota kala noku mu pa omayele agehe naangoka ethimbo limwe taga tsu molupanda. Geingob okwa ti ina hogolola Omupevipersidende ngoka opo a kale te mu lombwele ashike shoka ye a hala okuuva andola ndele okwa hala omupevi peresidende ngoka te mu pe  omayele noku mu pukulula moonkalo dhomatokolo ga yooloka.

Geingob okwa dhenge omuthindo kutya nando ota kala nokuwilika moku konga omayele koohailwa oshowo kaawiliki poondondo dha yoolokathana oshowo okuza kiikondo ya yoolokathana, etokolo lya hugunina kombinga yoshinima shontumba nenge shongandi otali kala lye ongo Omuperesidende gwoshilongo.

Geingob okwa fatulula kutya nakuulikwa ongo omupevi Peresidende, omundohotola Nickey Iyambo ota ka ethapo uukwashilyo wegumbo Etoti lyoompango noku ka longa ethimbo alihe miilonga yuupeviperesidende.

Ehala lyiilonga yuupeviperesidende olya li lya etwapo konima sho ekotampango lya Namibia lya li lya lundululwa oku etamo oshipundi shoka oshowo okunenepeka aakalelipo yoshigwana megumbo ndyoka okuza paatotimpango 72 oku ya paatotimpango 96 inaamu kwatelwa aatotimpango yahetatu mboka haya ulikwa kOmutse gwoshilongo.

 

LEAVE A REPLY

Please enter your comment!
Please enter your name here