Peter ondume yomomufitu: Etsikilo lyondjila okuya koKunene

0
264

Oololi sho dha thiki komanda okwa tokola opo dhi kuthe po tango aanona, ngame,  Junias oshowo Amukwaya otwa thigala

po omanga Sam a yi pamwe nosheendo shotango shoka sha kuthwapo komahauto.

Ndika olya li etameko lyehanagukopo lyongundu yetu mboka tweende okuza kEenghala. Oshinima shika osha li sha nikitha ndje oluhodhi.Konima sho oololi dha thigipo okamba tse otwa lombwelwa tu shune komahala getu montanda tse tu tegelele oololi dhi galuke esiku lya landula.

Otwa li twa tegelele andola ndhika dhi galuke esiku lya landula ihe ndhika odha ka galuka ashike konima yomasiku gaali . Nomolweetho nduka oololi inadhi thigapo nando ogumwe gwaantu yomosheendo shetu . Atuhe otwa li twa londo noku falwa hoka twa falwa. Molwashoka omaloli oga li ga thiki kwatoka otwa li twa lombwelwa tu ilongekidhile ondjila esiku lya landula.

Ongulohi ndjoka otwa tokelwa tatu kundathana kombinga yonkalamwenyo yomuundjendi moka twa li. Twi iyadha hatu lala kohi nopomakota gomiti. Hatu ningi omasiku gevule gaali inaatu iyoga, hatu ende oompadhi kowala molwashoka oongaku dhetu odha li dha guguka noku kulupa. Twa li hatu li iikulya mbyoka omathimbo gamwe ya li yi na omulyo omwiinayi.Yamwe yomutse oya li ya nyenyeta kombinga yiikulya mbyoka twa li hatu pewa, omanga yalwe oya li ya popi kutya oya hala okushuna kegumbo. Ongula yesiku lya landula otwa penduka kuyele neinekelo kutya otatu ka thigapo ehala ndyoka mbala. Ihe nando ongaaka otwa ka thikama okuya noololi ndhoka ashike potundi ontimulongo yongula onene lwaampoka.

Omanga twa li twa tegelela oku ya otwa kala tatu imbi omaimbilo gopaKriste tatu indile ku Kalunga omunankondo awike opo etu endithe megameno lye noku tu thikitha nawa pehulilo lyolweendo lwetu.Konima yoku thigapo ontanda ndjoka otwa ende tuuka kuumbangalantu twa landula okandjila okashona hoka ka taakana miihwa ya thita. Ondjila ndjoka oya li ya nika iithulukutumbe oshowo oya li yina evugu nenge efululu oshowo oodalaye odhindji.Otwa ende konyala uule wootundi hamano no inaatu mona nando ogo omagumbo kakele koondunda ndhoka dha fikwapo oshowo omapya ngoka tomekwa omulilo.

Sho tweende miihwa moka onda ndhindhilike kutya opwa li aakwiita yomwaalu gwontumba puuntanda uushona mondjila, yamwe aakwiita yoSwapo na yamwe aakwiita yAngola.Ihe ekalepo lyaakwiita mbaka ka lyali li na nangame, shoka sha li momadhiladhilo gandje osho owala kutya oshinano shithike peni shiliko okuthika kehala hoka ngame tandi ka dheulilwa uukwiita noku pewa ondjembo yandje.

Pomukunda Oshitumbe moshitopolwa sha Kunene moAngola otwa thikimo potundi 17h00.Mokuthika mokamba ndjoka otwa topolwa moongundu ooshona dhaantu yaheyali oshowo yaantu yatano .Konima otwa ka ulukilwa omahala mpoka tatu kala hatu lala momatrencha  nenge miilambo yokuholama.Otwa falwa pehala limwe mpoka twa adha puna onyama oyindji noshithima shomahangu. Shika oshali shotango okumona iikulya oyindji yi thike mpaka okuza tuu nkene twa thigilepo Namibia, mbika oya li iikulya oyindji ya gwana ya pitilila nokuli.  Otwa li twa nyanyukwa  okumona iikulya yoludhi nduka, noshikwawo aakwiita oyetu lombwele tu lye nawa ngaashi twa hala sigo otatu kuta lela na otatu vulu okufaalela onyama komahala getu gokulala.”Aahaa tashi aantu moSWAPO osho haya li ngeyi? Osho mukwetu gumwe a pula nonando tse katwa li tatu vulu okumu yamukula, oshoka atuhe otwali aayenda pehala mpoka nomonkalo ndjoka.

Manga tatu li pokombitha yooguerrilla otwa uvu omitopelo dhoondjembo tadhi inyenge kuumbangalantu wetu. Opo wo pwa li pethimbo ndyoka sho twa lombwelwa kutya aakwiita ya UNITA oya li taya kondjele moshitopolwa shoka. Momudhingoloko ngoka aakwiita ya UNITA oya li mo taya inyenge opendji okuyeleka nehala hoka twa zi. Onde ke shi ndhindhilika unene moku mona aakwiita yoPLAN ya homata unene okuyeleka naakwiita mboka twa ende nayo okuza koNamibia. Manga tatu li omukwiita gumwe okweya putse eendelela nokwa ti natu mu landule mbala. Okwe tu fala komahala getu gokuholamena a ti opwa monika oshinkoti shaakwiita ya UNITA momudhingoloko nokwe tu lombwele kutya ngele opwa holoka omaumbathano hamuntu a kambadhala okufadhukapo.

Onkundana yekalepo lyaUNITA  momudhingoloko olya halutha oyendji yomosheendo shetu, molwashoka aantu ashike aashona yomosheendo shetu oyo ya li yena ontseyo oshona kombinga ya UNITA niilonga ye moAngola ethimbo ndyoka. Ngame onda li nda uvu omahokololo ga UNITA pethimbo ndali handi litha oongombe dha tate popepi  noongamba dhAngola momumvo 1976 onda li handi uvu omahokololo kombinga ya Unita kaasitangombe yaAngola.Yamwe yomosheendo shetu oya li ya dhiladhila kutya omutondi gwetu okwa li ashike South Africa nongundu ye mboka twa thigi moNamibia.Sho kwa toko otwa mono aakwiita taya dhimi omililo noshowo taya ende mokati kosheendo shetu noku lombwela aantu opo yaa kudhile nenge ya kale taya popi muule. Oku tala omainyengo gaambaka omuntu oto ndhindhilike kutya onkalo kaya li nawa. Uusiku mboka otwa kala tatu li onyama pondje yomahala getu gokuholamena na otwa yi ashike mugo konima sho aakwiita yetu lombwele opo tu kalale. Onda kala ndi uvite omitopo dhoondjembo tadhi inyenge muuzilo ihe ndhika inadhi tilitha ndje oshoka ngame onda li nda tseya kutya otuli megameno momahala getu goku halamena. Omanga etango inaali pita esiku lya landula aakwiita oye ya kutse noku tu lombwela tu gonye omakumbatha getu noku tegelela elombwelo lya landulako. Konima yokathimbo otwa li twa lombwelwa tu gongale pehalandjandja popepi notenda onene moka hamukala kommanda gwokamba ndjika.Pehala mpoka otwa tseyithilwa kutya otuli mehala lyolugodhi, onkene otwa pumbwa oku ihumbata onga aakondjelimanguluko ndele ha nga aakwashigwana .Kommanda okwa lombwele osheendo ashihe opo shi ilongekidhile oshiponokela sha UNITA unene tuu pethimbo lyuusiku. Okwe tu lombwele kutya aamati mboka ya kola otaya ka  longwa nkene taya longitha oondjembo okuza esiku lya landula.

Omanga inaatu halakana Kommanda okwa lombwele aakwiita ye opo ya hogolole aamati mboka taya vulu okudheulwa nkene taya longitha oondjembo. Amukwaya, Junias nangame otwa li twa hogololwa opamwe naamati yalwe opo tu dheulwe. Oyendji yomutse otwa taamba onkundana ndjika nomwenyo aguhe, oshoka omadhewo ngaka ogo twali tweendela. Molwashoka ongundu oya li onene ndjika oya topolwa muungundu  uushona opo aadheuli ya kale nuupu okutu dheula. Otwa dheulwa nokulongwa nkene tatu longitha oondjembo , nkene tatu dhi kutha kumwe oshowo oku dhi opaleka.Ongundu yetu ya li yi na aantu omilongo ndatu oya ithanwa yi landule omukwiita  gumwe ngoka etu fala pehala limwe pena ondumba yoondjembo dhomaludhi mwa kwatelwa naandjoka ndali nda hala yoAK 47 oshowo ndhoka dhooCalabines, niikondjitho yimwe mbyoka ya kuthwa miikaha yomutondi.Kehe gumwe gwetu okwa lombwelwa a hogolole ondjembo ndjoka a hala. Ngame onda kutha oAK-47  oshoka onda li popepi nondumba yoondjembo.Manga tatu dheulwa otwa uvu omidhumo dhoololi tadhi ya dho tadhi zi mokamba yetu .Otwa ka uva kutya ndhoka odha li tadhi kuthamo iilyo yosheendo shetu mbyoka inaa yi hogololwa okudheulilwa uukwiita opo mbika yi ye kokamba yoontauki koKassinga.

Ongula ayihe otwa kala tatu dheulwa lwopokati komutenya otwa fudhapo  opo tu lye omwiha . Konima yomwiha otwa tsikile natango okudheulwa. Omadheulo ngaka oga tsikile taga ningwa uule wiiwike iyali. Konima yaangaka yamwe oya pewa oondjembo okukala nadho ethimbo alihe yo taya pewa ishewe iikuti yadho opo ya keelele iiponokela ya UNITA ngele okwa kambadhala okuponokela okamba ndjoka.

Ngame ondali nda nyanyukwa oku humbata ondjembo nesiku limwe onda li nda pula kutya uunake ano tatu ka kondjitha UNITA. Nokudheulwa huka onda li tandi vulu oku ya pamwe naantu mboka aape miihwa popepi oku katyaya iikuni. Onda li woo nda patolola momudhingoloko gwokamba  yetu pamwe naakwiita aakulu. Pethimbo olyo tuu ndyono sho twa kala mokamba moka aantu oyendji oya tembudhwamo oku falwa koKassinga. Ngame onda kala tandi dhiladhila kutya ngiika konima yokudheulwa huka ngame onda pyokoka oku shuna kegumbo oku ka kondjitha Oombulu nomakakunya. Ihe kombinga yimwe ondali wo nomaipulo kutya okudheulwa huka okwa li tuu kwa gwana okumweneka omutondi.? Onda li nda itaala kutya onda li ndina okutelekwa manga opo ndi kale kapitaholo ngaashi ashike aakwiita mboka yetu pititha oongamba okuza koNamibia.

 

 

 

LEAVE A REPLY

Please enter your comment!
Please enter your name here