Uudemokoli miilonga

0
253

Oshiwike shika omanga kuna ashike omasiku omashona opo tu ka tyapule omimvo 25 dhemanguluko, otwa mono omashina guudemokoli geli miilonga. Omuhogololwa Peresidende Omundohotola Hage Geingob okwa ulike Ekuya lya ka nale mekondjelomanguluko oshowo mopolitika Omundohotola  Nickey Iyambo ongo Omupevi Peresidende mepangelo lye omanga omunawino momahupilo omugundjuka  Saara Kuugongelwa-Amadhila okwa ulikwa Omuprima Minista gwaNamibia gwotango omukiintu.Omudiplomate a kalamo nale nomunawino miikwadiplomate Netumbo Nandi-Ndaitwah okwa pewa oshipundi shuuPrima wopevi.

Iinima mbika ihayi uvika olundji koshilongo oshiAfrika, unene tuu okushi talela mu Namibia ngoka eli oshilongo shuudemokoli oshigundjuka.  Eeno okushitalela mombepo yUukumwe wAfrika omauliko ngaka komuhogololwa Peresidende otaga koleke kutya orepubulika metsikilo mewiliko otayi nkondopeke, tayi lepaleke, nokukoleka ewiliko lyompango, ombili, egameno neyokomeho moNamibia.

Omanga mboka inaa ya nyanyukilwa shika taya ti etsikilo oshinima oshiwinayi, osha pumbiwa okutothwamo kutya, momauliko ngaka  ngaashi ashike melunduluko epe ndyoka omuhogololwa peresidende a etapo omuna iinima iipe. Naashika osho sha pumbiwa koshilongo oku adha eithikameno lyopamahupilo nokuyambapala.

Omahangano gekondjelomanguluko moAfrika oga kala nokupewa uusama kutya  ohaga kalako unene kiipundi yokulela  sigo otaga kanitha nondjila oshowo ondjodhi yago nekwatathano pokati kago noshigwana unene sho ethimbo ta li pitipo naasho oshigwana tashi tameke okupula  iinima nenge omayakulo omape ga li inaa ga gandjwa nale kakele kemanguluko.

Omupopyo ngoka itagu vulu okupopiwa moNamibia  nokombinga yaawiliki  yevi lyOmapenda okuza kemanguluko. Oshoka kehe petaambathano lyewiliko otwa kala nOmuperesidende gwoRepublika ngoka ena omalalakano  guuvitike no ga yela nawa okupalamena omashongo. Okuza tuu koku etapo uukumwe nedhiminathanepo, ko otaku landula ombili nengungumano nongashingeyi otaku longwa okufala oshilongo meyambapalo netidhopo lyoluhepo. Eeno omathimbo ngaka itashi ti ka ga li gena omashongo  niiyimbi nomandangalati mondjila ngoka wo taga kala noku tsakanekwa onkene ngaka ogena oku kandulwapo noonkambadhala oshowo niilonga yaana ezimbuko.

Ihe nando ongawo omalunduluko ngaka ga ningwa oga etamo iipala iipe, omadhiladhilo omape nomikalondjila omipe mewiliko lyoshilongo ndyoka tali longo oku adha iilalakanenwa oku etela oshilongo naantu yasho uuyamba nokutidhapo ondjala nuuthigona.

Kashishi oshiholekwa kutya oRepublika oya kondekwa komashongo gopankalathano ogendji nakehe gumwe gwetu okuna ehalo okumonena ngaka omayamukulo oku ga kandulapo mondjila yetu. Onkene oshi li mondjila kutya oshigwana otashi kala shina etegameno enene kewiliko epe naashika oshili mondjila. Ndele nee otashi kala oshiwanawa ngele Omuhogololwa Peresidende , ota pewa ethimbo okuhogolola Okabinete ke ko Okabinete taka etapo omathaneko guule womimvo ntano nkene omashongo nomandangalati mondjila ye yo komeho taga taagulukwa noku kuthwamo. Opo ihe uuna twa mona ondjila ndjoka ewiliko ndika epe lya tokola oku enda nayo nena oshigwana opo tashi vulu okutula ewiliko ndika koshiviha nokutala uudhigu nenge uupu walyo mekwatathano naashoka ndika lya etapo mokutula miilonga lyaa shoka lyo lya thaneke.Ngaashi omupopyo tagu ti uutoye wiikulya oto wu mono ashike moku yi lya.

LEAVE A REPLY

Please enter your comment!
Please enter your name here