Uutekete woku ya moNAMA  otawu landithwa

0
264

WINDHOEK-Okommittee ndjoka tayi longekidha egandjo lyomapapa kaahikingalo aaNamibia ngaashi hali takumwa Namibian Annual Music Awards oya tseyitha kutya uutekete wokuya moshinyanga moka tamu ka gandjelwa omapapa ngaka goNAMA nuumvo owa tameka okulandithwa ngashingeyi.

Ondando yokulanda uutikete oya topolwa moongundu mbali  kokutya uutekete waantu yasimana  mboka tawu landwa koodola N$500-00 omanga mboka womuntu kehe otawu landwa koN$250 adhike.Oshikwawo Ongundu Longekidhi oya etapo ondando ya shunwapevi  kwaamboka ya hala okulanda mbuka kuyele.Ondando oya shunithwa pevi noodola omilongo ntano.Tashi ti ngele owa landa okatekete koye omanga 31gaMaalitsa inaaga adha oto futu ashike oodola N$450 mokatekete kooN$500 oshowo  ooN$200 mokatekete kooN$250.

Ihe okuza mesiku lyotango lyApilili nuumvo opreisa yuutekete  otayi shuna pomuthika gwayo gwoshito kokutya ooN$500 oshowo 250 kwaa mboka taya yi koshiidingilli shika ayehe.

Uutekete otawu adhika koComputiket oshilongo ashihe nenge oto vulu okuwu landa okupitila pepandja  lyehangano ndika tali holoka mpaka: www.computicket.co.za.

Egandjo lyomapapa go NAMA nuumvo otali ka ningilwa poShiwakop moshinyanga shomaudhano shedhina Swakopmund Indoor Sports Centre okuza mesiku 1 nesiku  2 lyaMai 2015. Poshiithanene shika opwa ithanwa aahikingalo aanamadhina ngaashi Riana Nel nomumwayina  Nianell mboka ya tseyithilwe omasiku gaziko.Aahikingalo yalwe mboka woo taya ka ithanwa otaya ka tseyithwa mbala pahapu dhongundulongekidhi.Etyapulo lyomusiki  oshowo egandjo lyomapapa ndika olyo etitano okuza tuu nkene lyatotelwepo.

Egandjo lyomapapa hali ithanwa Industry Awards otali kalako mesiku 1 lyaMai 2015 naandika otali ka kalwa ashike kwaamboka ya ithanwa. Mesiku etiyali lyaMai omo tamu ka ningwa egandjo lyomapapa kaahikingalo naandika olya egulukila kehe  omuntu shampa ashike ngoka ena okatekete kokuya moshinyanga moka tamu ningilwa egandjo lyomapapa.Egandjo lyomapapa  osho oshiithanene shasimana mokaliindeli komusiki moNamibia.Iiningwanima ayihe mbika iyali otayi   ningilwa po Swakopmund Indoor Sports  Centre.

Mboka ya hogololwa okuthigathanapo mokupewa omapapa omadhina gawo otaga ka hololwa momasiku 27 gaMaalitsa nuumvo ,uuyelele  owindji otawu ka tseyithilwa oshigwana mbala. Okangundulongekidhi oka uvaneke kutya otaka ka ninga etseyitho motiivii yaNBC pethimbo omatseyitho taga ningwa,opo aakuthimbinga ayehe ya tale kutya omadhina goolye ga kuthwamo.

Nuumvo aasindani miitopolwa nomomaludhi goongalo otaya kapewa iimaliwa oodolaN$100 000-00 kehe gumwe.Oondjambi ndhika odha ndjekwapo okuza poodolaN$50 000 ngoka aasindani yomumvo gwayi ya li ya pewa.

Ondoolopa yaSwakopmund naandjoka yaNgwediva odho dhali  dha thigathanapo nuumvo okupewa ompito yokuningilwa egandjo lyomapapa ndika.Ihe Ongwediva ina  yi pitamo omolwa omatompelo goshinyanga shawo kaashilinawa pomuthika okuningilwa oshiithanene shika.Aakwashilipaleki yasimana yoshiithanene shika oyo MTC oshowo NBC okutumbulapo ashike yamwe.

LEAVE A REPLY

Please enter your comment!
Please enter your name here