Ya hogolola iilyo iipe yehangano lyawo

0
200

ONDANGWA – Aanafaalama yaMangetti oyali ya gongala momasiku gaheyali gomwedhi nguka, metala lyiigongi pombelewa yoshilongo shOndonga nelalakano okuhogololo iilyo iipe yewiliko nonande yali ya tseyitha petameko lyomvula kutya iilyo mbyono iikulu oyo tayi kala noku ya wilika.

Omundohotola Shekutamba V.V Nambala oye a li a kwatele omahogololo ngaka giilyo iipe yehangano lyo Mangetti Farmers Association komeho. Petameko okwali a indile aanafaalama ayehe mboka yali ya holoka yaza kiitopolwa ya yoolokathana moshilongo opo ya hogolole omuntu nguka ta vulu ku tula ehangano kolutenda nota vulu oku gwanithapo iilonga yehangano pethimbo.

Omahogololo ngono otaku hokololwa kutya ogali ga ende pauyuuki,oshoka aahogololi oyali a hogolola shi ikwatela koompango nokomilandu dhomahogololo ngaashi hashi landulwa.

Ewiliko  epe lyaMangetti olya thikamapo maawiliki yeli omugoyi,taya kala nokukwatela komeho aanafaalama aakwawo.

Shali Kamati okwa hogololwa oye a ninge omunashipundi gwehangano,nomupeha gwe Kashona ka Malulu, Lasarus Emvula okwa inekelelwa a ninge omudhiginini gwiiniwe yehangano,na amushanga okwa hogololwa Quitto Mulunga.

Ehangano olya li lya hogolola wo iilyo ya gwedhwapo onomenawina mbyono tayi kala nayo mokangundumutima kehangano,iilyo mbyono oya kwatelamo Justina Haufiku,Simon Kanepolo Mulung, Abner Gideon, Julius Ambondo na Hosea Mbandeka.

Omunashipundi Shali Kamati okwa indile aanafaalama ya longe muukumwe yo ya yambulepo ehangano lyawo,nokupaathana uuyelele nkene yena oku kaleka iimuna yawo yina uukolele oshowo nkene taya longo iipalutha yagwana momapya gawo.

Omundohotola Nambala okwa ganithile aawiliki mbaka miilonga te ya indile ya longe nomukumo nonuudhiginini, yo taya kala aakwatelikomeho gehangano yena omitima dhokukwatha aanafaalama ooyakwawo.

Ehangano ndika lya totelwepo omumvo 1997 olililepo okupopila aanafaalama kombinga yomashongo ge ya taalela, oku ya pukulula nkene taya muni iimuna pamukalo gwoshinanena, nonkene taya gamene iimuna yawo komikithi dhomikwayu. Ehangano oha li longo wo aanafaalama nkene taya longo omapya gawo pamukalo omupe ngoka tagu ya etele eteyo olindji.

Ohali kwatakanitha wo aaniimuna naanamapya nokuume moshilongo noshowo pondje yoshilongo opo mbaka ya vule okumona uunongo wa yooloka miilonga yawo yokupalutha oshilongo noshigwana.

Omunashipundi okwa yelithile kuyele oshiwike shayi kutya uukwashilyo wehangano ndika owa egulukila omunafaalama kehe, shampa ashike nguka ta ningi eindilo lyuuka kewilikongundu lyehangano. Iilyo iipe ohayi futu ooN$170-00 dhuukwashilyo .

Iilyo yehangano oyi na uuthemba okuhogolola momahogololo gaawiliki yehangano.Aayambidhidhi yehangano oshowo ookuume kehangano oyo ayeke yaana uuthemba woku kutha ombinga momahogololo ngoka , ngaashi ga ningilwe ehuliloshiwike lyapiti.

 

LEAVE A REPLY

Please enter your comment!
Please enter your name here