Aanangeshefa yatokola ya humithe komeho odoolopa Okahao

0
283

WINDHOEK-Ombelewa yelelo lyodoolopa yOkahao oyali ya longekitha uulalelo mboka wowina pamwe naanangeshefa aanene mOkahao, ehulilo shiwike lya piti opo ya kundathane nkene yena okuyambulapo odoolopa ndjoka.

Elalakano lyuulalelo mbuka olyali okukundathana noku tula uukuni kumwe pokati Mayor gwodoolopa ndjika oshowo aanengeshefa yo popepi.

Mayor gwOkahao David Isai okwa li ataambako aanangeshefa mboka pamwe naanenentu mboka yali ya hiwa kuulalelo mbuka, wa li wa longekidhilwa owina.

Meithano ndika omwali woo mwa kwatelwa Omukwaniilwa gwAangandjera Johannes Mupiya, naMayor gwAngwediva  Jason Asino. Aanenentu ngaashi yomoOutapi, Oshikuku noRuacana oyali ishewe ya holoka.

Isai okwali a indile opo aanangeshefa ya kuutumbe pamwe yo ya kundathane nokuhokolola nkene yena okukandula po endangalati ndika.

Omukwateli komeho guulalelo mbuka omunangeshefa Andreas Nekwaya okwa kunkilile aanangeshefa opo ya longithe ompito ombaanawa no ku etapo omadhiladhilo gawo.

Omunangeshefa Sion Sheehama okwa gandja omupopyo gwe mpoka a li a shuna manga  aahiwa ooyakwawo konima noku popya nkene Okahao kali kaakena nando osha ethimbo a li omushona.

Okwali ishewe a gandja omapandulo kaanangeshefa mboka yali ya ningi oongeshefa dhawo tango modoolopa ndjika ngaashi Tobias Kashanu naAndreas Uushini.

Okwa indile ishewe oombelewa dhaKansela opo dhi gandje evi lyagwana kaanangeshefa opo ya vule okuninga oongeshefa dhawo.

Sheehama okwa hulitha neindilo lyaanamikunda opo nayo ya vule okutsamo olunyala mehumokomeho lyokuyambulapo odoolopa ndjika naashoka ta ya vulu okuninga.

Pehulilo lyuulalelo mbuka Mayor, aanangeshefa naahiwa oyali ya uvathana  moku etapo ethaneko lyokutungapo etungo lyaasimba mOkahao mboka yeli ta ya mono iihuna manga yeli ya tegelele okuvala kwawo.

Omwaalu gwa adha poodola N$ 29 000.00 ogwali gwa gwedhelwa notagu ka longithwa okutunga ondunda ndjika yaakiintu yeli momategelelo.

LEAVE A REPLY

Please enter your comment!
Please enter your name here