Kanepolo ta kondjele uuthiga nOmuselekadhi gwamumwayina

0
371

WINDHOEK-Omahilathano nomanathano ngoka gaholoka omolwa ekondjelo lyuuthiga pokati komunangeshefa omunene gwomOndangwa Simon Mulunga, a tseyika nawa nedhina Kanepolo nomuselekadhi Maria Mulunga noyana 14, osho gahulile meyipumo mumwe.

Oshiningwanima shika oshali sha holoka Etitano lyaziko pethimbo lyompangu yElelo lyoshilongo shAandonga, mOluno mOndangwa.

Omuselekadhi naanona oyali yaholoka tango mompangu yelelo ndika momasiku shogali  19 Febuluali  moka omuselekadhi naanona ya tulile mo Kanepolo oshipotha opo a kale a galula ehala lyaanona yanakusa ndyoka lili pOnyaanya no ta kufekelwa eli landitha po.

Ompangu oyali ya uvu ehokololo lyomuselekadhi moka a popi kutya oye a li a ulikwa onga omutopoli gweliko lyomusamane gwe Paulus Mulunga, ngoka a sile momasiku sho gali Apilili 2, mo1997 nehala ndyoka okwali lyaanona ye.

Omutamanekwa Kanepolo naye okweshi holola kutya oyali mompangu moVenduka omvula nakusa Paulus Mulunga asa, nokwali kwa ningwa etokolo kutya omaliko agehe gomuushimba ogomuselekadhi noyana, mwakwatelwa egumbo ndyoka lyopOnyaanya. Shika oshali sha etitha ompangu yElelo lyoshilongo sAandonga opo yipule omutamaneki nomutamanekwa opo ya ete oombapila ndhoka tadhi kwasilipaleke uuyelele mbuka.

Etitano lyaziko omuselekadhi Maria Mulunga noyana ya 8 oyali ihe ya holoka pompangu mpaka mOluno ya holole uuyelele mbuka.

Oshifo Kundana osha ilongo kutya Omuselekadhi okwali apulwa oombaapila ndhoka tadhi kwashilipaleke kutya oye ngaa shili ali a ulikwa onga omutopoli gweliko lya nakusa Paulus Mulunga omanga Kanepolo a pulwa a gandje ompapila dhe, no kwa gandja etompelo kutya odha kanena kompangu yopombanda yoshilongo, ashike sigo oompaka kadhi wetike.

Omunashipundi gwompangu yElelo lyoshilongo shAandonga Peter Kauluma okwa ekelehi omipopyo ndhika ta ti ayehe mbaka yaali oya ndopa oku gandja omauyelele giihwapo ngoka taga kwashilipaleke kutya egumbo olya lye shili.

Kauluma okwa lombele ishewe oshifo Kundana tati, Kanepolo nOmuselekdhi nguka oyo ayeke yeshi kutya egumbo olya lye na oshipotha ita shi ka tokolwa omanga inaaya holola uuthemba wa gwana.

Kanepolo okwa indile ishewe opo apewe ethimbo lya gwana ye a ka konge oombapila dhe, nomupanguli okwati ompangu oya thika pehulilo.

Gumwepo gwomoyana ya nakusa Mulunga okwati eipumo mumwe olya holoka sho Kanepolo athikama mondunda yompangulilo etayi, shoka sha etitha opo ohauto ye yikondekwe koyana mbaka.

Aanona mbaka oyali yapata omiyelo dhompangu naKanepolo okwiipatele mohauto ye aakondekelwamo kaanona yanakusa Mulonga mboka yemupula azemo mohauto opo ya kundathane nkene ta ya kandulapo eipumo mumwe ndika lya holoka po, ihe okwa tindi okuzamo.

Kanepolo okwati okwa ningi konyala oowili mbali eli mohauto ye iipatelamo mpoka aatekelu ye ya tameke nokuli oku umba ohauto ye nopolisi yomOndangwa ya holoka noku ya ithana koshitaasi shopolisi.

“Ngame ondali ndina nale uuvu wosuuka, noku kala mohauto ethimbo ele te silemo uupyu molwa uumbanda oshali sha etelendje elondo lyombinzi nuuwehame wosuuka owali wa adhandje ishewe opo ndiye koshipangelo,” Kanepolo tati.

Oshipotha osha hulile munyengwi nasigo oompaka kapuna naana uyelele wa gwana kutya oshipotha tashi ka tsikila.

Kanepolo okwali ishewe a tulilemo omutekulu gwe ngoka alukilwa nakusa Mulunga oshipotha shokuteya okakende kohauto nokumuningila omatilitho, Opolisi oya mangapo omutekulu nokumu tula mokakuma moka a holokele mompangu Omaandaha.

Kanepolo okwa tindi okutya kosha kombinga yehala ndyoka lyopOnyaanya ta ti ashike olye.

Omuselekadhi sho apulwa koshifo sha Kundana kutya omolwashike shemu kutha oomvula odhindji opo a fale Kanepolo kompangu okwa ti pethimbo omusamane gwe ahulitha okwali anika oluhodhi nokwali ishewe a ningilwa omatilitho shoka shali shemu etele uumbanda.

“Uunona wandje owali uushona noonkondo nokapuna ngu ali ta vulu oku kwathela ndje opo ndi kondjithe Kanepolo. Sho uunona wandje wa koko nokehe ethimbo tawu ya kOwambo owa kala nokupulandje kutya oshike ehala lyetu lyopoOnyaanya tali mono iihuna omanga yakoka yo oyena omahala gawo mOwambo. Shika osha yematitha ndje noonkondo noshapendje oonkondo dhokuka kuthako oshigumbo shomusamane gwandje,” Mulunga tati.

Aanona oya holola kutya oya yematekwa nayi kompangu yElelo lyoshilongo shAandonga, ndyoka lya ndopa okuya mangulula moshinima shika.

LEAVE A REPLY

Please enter your comment!
Please enter your name here